ចិន រិះគន់ចាស់ដៃថា រឿងដែលអាមេរិក បង្ខំវ៉េណេ​ស៊ុយអេឡា ឲ្យប្រគល់ប្រេង គឺជាការ «សម្លុតគំរាម»

ទីក្រុងប៉េកាំង បានចេញមុខរិះគន់សហរដ្ឋអាមេរិកយ៉ាងចាស់ដៃ រឿងបង្ខំវ៉េណេស៊ុយអេឡា ឲ្យប្រគល់ប្រេងរាប់លានបារ៉ែល ដោយក្រសួងការបរទេសចិន បានបន្ទោសសកម្មភាពនេះថាជាការ «សម្លុតគំរាម»។

អ្នកនាំពាក្យក្រសួង លោកស្រី Mao Ning ថ្លែងក្នុងសន្និសីទកាសែតកាលពីថ្ងៃពុធទី៧ខែមករាឆ្នាំ២០២៦ថា៖ «វេណេស៊ុយអេឡា គឺជាប្រទេសមានអធិបតេយ្យភាពមួយ ហើយទទួលបាននូវអធិបតេយ្យភាពពេញលេញ និងអចិន្ត្រៃយ៍លើធនធានធម្មជាតិរបស់ខ្លួន ក៏ដូចជាសកម្មភាពសេដ្ឋកិច្ចទាំងអស់នៅក្នុងទឹកដីរបស់ខ្លួន។ សហរដ្ឋអាមេរិក បានប្រើប្រាស់កម្លាំងយ៉ាងកំរោលលើវ៉េណេស៊ុយអេឡា និងបង្ខំឲ្យវ៉េណេស៊ុយអេឡា បោះបង់ធនធានប្រេងរបស់ខ្លួន ក្រោមគោលនយោបាយ America First។

លោកស្រីបន្តថា នេះគឺជាសកម្មភាពសម្លុតគំរាម បែបធម្មតារបស់អាមេរិក ហើយជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និងជាការរំលោភបំពានយ៉ាងធ្ងន់ធ្ងរលើអធិបតេយ្យភាពរបស់វ៉េណេស៊ុយអេឡា ព្រមទាំងជាការវាយប្រហារយ៉ាងខ្លាំងក្លាលើសិទ្ធិរបស់ប្រជាជនវ៉េណេស៊ុយអេឡា។

សេចក្តីថ្លែងការណ៍របស់ចិន កើតឡើងបន្ទាប់ពីប្រមុខសេតវិមាន​ ដូណាល់ ត្រាំ បញ្ជាក់ថា វ៉េណេស៊ុយអេឡានឹងប្រគល់ប្រេងចន្លោះពី ៣០លាន ទៅ ៥០លានបារ៉ែល ឲ្យ​អាមេរិក ដោយប្រេងឆៅទាំងនោះនឹងត្រូវលក់ក្នុងតម្លៃទីផ្សារ ហើយចំណូលដែលទទួលបាននឹងត្រូវគ្រប់គ្រងដោយទីក្រុងវ៉ាស៊ីនតោន។

នៅក្នុងការបង្ហោះលើបណ្តាញសង្គម Truth Social កាលពីថ្ងៃពុធ លោកត្រាំ​លើកឡើងថា អាជ្ញាធរបណ្តោះអាសន្នរបស់វ៉េណេស៊ុយអេឡានឹងផ្ទេរ «ប្រេងដែលជាប់ទណ្ឌកម្ម» ឲ្យ​ក្រុង​វ៉ាស៊ីនតោន។ ប្រាក់ចំណូលដែលទទួលបាននឹងត្រូវប្រើប្រាស់ «ដើម្បីជាប្រយោជន៍ដល់ប្រជាជនវ៉េណេស៊ុយអេឡា និង​​អាមេរិក»។

ស្របពេលជាមួយគ្នានោះ មន្ត្រីជាន់ខ្ពស់នៃរដ្ឋបាល​អាមេរិកម្នាក់បាន​ប្រាប់ CNN ថា ប្រេងទាំងនោះត្រូវបានផលិតរួចរាល់ហើយ ដោយភាគច្រើនកំពុងស្ថិតនៅលើនាវាដឹកប្រេង ដែលនឹងត្រូវប្តូរទិសដៅទៅកាន់រោងចក្រចម្រាញ់ប្រេងនៅតំបន់ឆ្នេរឈូងសមុទ្ររបស់អាមេរិក។ ការផ្ទេរនេះត្រូវបានគេរំពឹងថានឹងកើតឡើងយ៉ាងឆាប់រហ័ស ពីព្រោះប្រេងឆៅធុនធ្ងន់របស់វ៉េណេស៊ុយអេឡាមិនអាចរក្សាទុកក្នុងរយៈពេលយូរបានទេ។

តម្លៃប្រេងនៅ​អាមេរិកបានធ្លាក់ចុះប្រហែល ១ដុល្លារក្នុងមួយបារ៉ែល ឬជិត ២% បន្ទាប់ពីការប្រកាសរបស់លោកត្រាំ ដោយបានមកនៅត្រឹមតម្លៃជិត​៥៦ដុល្លារ​ក្នុង​មួយ​បារ៉ែល។ ផ្អែកលើតម្លៃបច្ចុប្បន្ននេះ ការលក់ប្រេងរហូតដល់៥០​លានបារ៉ែល អាចនឹងបង្កើតចំណូលបាន ២,៧៥​ពាន់លានដុល្លារ៕

អត្ថបទ៖ សុខ សុវណ្ណ