កីឡាកររៀមច្បង ១០នាក់ នៅមានឈ្មោះលេងពានសម្តេចតេជោ ហ៊ុន សែន លើក​ទី​១៩

ការប្រកួតពានរង្វាន់សម្តេចអគ្គមហាសេនាបតីតេជោ ហ៊ុន សែន លើក​ទី​១៩ ថ្នាក់ជាតិ រដូវកាល ២០២៥-២០២៦ បានដំណើការហើយ ខណៈ​រឿង​គួរឱ្យចាប់អារម្មណ៍ ក្នុងរដូវកាលថ្មីនេះ មានកីឡាកររៀមច្បង​ច្រើន​នាក់​នៅ​មាន​ឱកាស​លេង។

ក្នុងពានសម្តេចតេជោ បានដំណើការ ១៩ រដូវកាលហើយ ដោយគិតទាំងរដូវកាលថ្មីនេះ។ បើក្រឡេកមើលអំពីកីឡាករជំនាន់ចាស់ៗ ដែលបន្តលេងមកដល់បច្ចុប្បន្ន មានមិនច្រើននោះទេ។ ក្នុងនោះ ឃើញមានកីឡាករ ១០ នាក់ ត្រូវបានចាត់ទុកជាកីឡាករខ្មែរមានវ័យចំណាស់ជាងគេ និងត្រូវបានចាត់ទុកជាកីឡាកររៀមច្បង ដែលកំពុងបង្ហាញខ្លួនក្នុងពានសម្តេចតេជោ។

កីឡាករ ដែលត្រូវបានចាប់អារម្មណ៍ជាងគេ មានខ្សែបម្រើរបស់ ណាហ្គាវើលដ៍ កីឡាករ គួច សុកុម្ភៈ និង សុះ ស៊ូហាណា, ខ្សែប្រយុទ្ធរបស់ បឹងកេត កីឡាករ ចាន់ វឌ្ឍនាកា, ខ្សែប្រយុទ្ធរបស់ ព្រះខ័នរាជស្វាយរៀង កីឡាករ ប្រាក់ មុន្នីឧត្តម និង ខ្សែការពារ សឿយ វិសាល។

ដោយឡែកកីឡាករផ្សេងៗទៀត ដែលត្រូវបានចាត់ទុកជាកីឡាកររៀមច្បងក្នុងពានសម្តេចតេជោនេះដែរ រួមមាន ខ្សែបម្រើរបស់ គិរីវង្សសុខសែនជ័យ គួច ដានី, ខ្សែការពាររបស់ ណាហ្គាវើលដ៍ កីឡាករ នេន សុធារដ្ឋ, ខ្សែបម្រើក្រុម ព្រះខ័នរាជស្វាយរៀង សួន សុវណ្ណ, អ្នកចាំទីក្រុម ភ្នំពេញក្រោន អ៊ុំ វិចិត្រ និងខ្សែការពាររបស់ឡាយហ្វ ខេត្តព្រះសីហនុ ធារី ចន្ថាប៊ីន។

ក្នុងចំណោមកីឡាករខាងលើ មានតែប្រធានក្រុមវ័យ ៣៨ ឆ្នាំរបស់ក្រុម ណាហ្គាវើលដ៍ កីឡាករ គួច សុកុម្ភៈ ម្នាក់គត់ ដែលមានវ័យចំណាស់ និងបង្ហាញខ្លួនយូរជាងគេក្នុងពានសម្តេចតេជោនេះ ដោយកីឡាករបង្ហាញខ្លួនតាំងពីឆ្នាំ ២០០៩ ជាមួយអតីតក្រុមខេមរាកីឡា៕

អត្ថបទ៖ សេម កុសល