រដ្ឋបាលខណ្ឌសែនសុខ បូមស្តារប្រព័ន្ធលូ លាងសំអាតផ្លូវលេខ១៩៣៨ ដើម្បីសម្រួលការធ្វើដំណើរប្រជាពលរដ្ឋ

នៅព្រឹកថ្ងៃទី២៣ ខែមករា ឆ្នាំ២០២៦ ក្រុមការងាររដ្ឋបាលខណ្ឌសែនសុខ បានដាក់រថយន្តបូមស្តាររីហ្គា ប្រព័ន្ធលូ និងបាញ់ទឹកលាងសំអាតផ្លូវលេខ១៩៣៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ក្រោយពីមានស្ថានភាពហៀរទឹកដក់លើផ្លូវបេតុង ដែលបង្កការលំបាកដល់ការធ្វើដំណើរឆ្លងកាត់របស់ ប្រជាពលរដ្ឋ។

សកម្មភាពខាងលើ ត្រូវបានអនុវត្តដោយក្រុមការងារជំនាញរបស់ខណ្ឌ ដោយប្រើប្រាស់រថយន្តបូមស្តារប្រព័ន្ធលូ ដើម្បីដោះស្រាយការកកស្ទះ និងការហៀរទឹកនៅតាមរីហ្គា ព្រមទាំងបាញ់ទឹកលាងសំអាតផ្លូវ ដើម្បីស្តារសភាពអនាម័យ បរិស្ថាន និងសុវត្ថិភាពចរាចរណ៍ឱ្យបានប្រសើរឡើងវិញ។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ និងដឹកជញ្ជូន ខណ្ឌសែនសុខ បានមានប្រសាសន៍ឱ្យដឹងថា ការចុះរបស់ក្រុមការងារនាពេលនេះ គឺជាលទ្ធផលនៃការយកចិត្តទុកដាក់ខ្ពស់ពីលោកអភិបាលខណ្ឌសែនសុខ ចំពោះការងារអភិវឌ្ឍន៍ហេដ្ឋារចនាសម្ព័ន្ធក្នុងមូលដ្ឋាន ជាពិសេសការថែទាំ និងស្តារប្រព័ន្ធលូ ផ្លូវថ្នល់ និងបរិស្ថានទីក្រុង ដើម្បីបម្រើជូនប្រជាពលរដ្ឋឱ្យបានទាន់ពេលវេលា និងមានប្រសិទ្ធភាព។

លោកបានបន្ថែមថា ខណ្ឌសែនសុខ នឹងបន្តតាមដានស្ថានភាពប្រព័ន្ធលូ និងផ្លូវថ្នល់នៅតាមតំបន់ផ្សេងៗ ក្នុងមូលដ្ឋានជាប្រចាំ ហើយនឹងចាត់វិធានការអន្តរាគមន៍ភ្លាមៗ នៅពេលមានបញ្ហាកើតឡើង ដើម្បីកាត់បន្ថយការលំបាក និងហានិភ័យដល់ការធ្វើដំណើររបស់ប្រជាពលរដ្ឋ។

ជាមួយគ្នានេះ រដ្ឋបាលខណ្ឌសែនសុខ ក៏បានអំពាវនាវដល់ប្រជាពលរដ្ឋ សូមចូលរួមថែរក្សាអនាម័យ និងបរិស្ថាន ដោយមិនបោះសំរាមចូលក្នុងប្រព័ន្ធលូ ឬតាមដងផ្លូវ ដែលអាចបណ្តាលឱ្យកើតមានការកកស្ទះ និងហៀរទឹកឡើងវិញ ជាពិសេសនៅរដូវវស្សា៕ អត្ថបទ សំណាង