ក្រសួងការបរទេស ៖ ការបញ្ជូនខ្លួនលោក ចេន ហ្ស៊ី គោរពច្បាប់ជាតិ និងអន្តរជាតិ

អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ សូម​ធ្វើ​ការ​បំភ្លឺឆ្លើយតបទៅនឹងការសាកសួររបស់ប្រព័ន្ធផ្សព្វផ្សាយ ពាក់ព័ន្ធនឹងដំណើរការផ្លូវច្បាប់ និងការបញ្ជូនខ្លួនលោក ចេន ហ្ស៊ី ដូចខាងក្រោម៖

ការ​សម្រេចចិត្តរបស់ព្រះរាជាណាចក្រកម្ពុជា ក្នុងការបញ្ជូនខ្លួនលោក ចេន ហ្ស៊ី ទៅកាន់សាធារណរដ្ឋប្រជាមានិតចិន ដែលជាប្រទេសដើមកំណើតរបស់ខ្លួន គឺធ្វើឡើងដោយផ្អែកលើមូលដ្ឋានច្បាប់ និងការប្តេជ្ញាចិត្តរបស់កម្ពុជា ក្នុងការអនុវត្តជំនួយផ្លូវច្បាប់ទៅវិញទៅមក និងកិច្ចសហប្រតិបត្តិការផ្នែកយុត្តិធម៌រវាងប្រទេសទាំងពីរ។

ការ​ដកហូតសញ្ជាតិកម្ពុជាពីលោក ចេន ហ្ស៊ី ត្រូវ​បាន​អនុវត្តយ៉ាងហ្មត់ចត់ តាមច្បាប់ស្តីពីវិសោធនកម្មច្បាប់ស្តីពីសញ្ជាតិ (ចុះថ្ងៃទី៥ ខែកញ្ញា ឆ្នាំ២០២៥) ជាពិសេសមាត្រា២៩ថ្មី កថាខណ្ឌទី៤ និងអនុក្រឹត្យស្តីពីការអនុវត្តច្បាប់ស្តីពីសញ្ជាតិ (ចុះថ្ងៃទី១ ខែធ្នូ ឆ្នាំ២០២៥) មាត្រា៥២ កថាខណ្ឌទី៤។ ផ្អែកលើបទប្បញ្ញត្តិទាំងនេះ ការដកហូតសញ្ជាតិខ្មែរ ពីពលរដ្ឋដែលទទួលបានសញ្ជាតូបនីយកម្ម អាចត្រូវអនុវត្ត ប្រសិនបើរកឃើញថាបុគ្គលនោះ បានទទួលសញ្ជាតិខ្មែរតាមរយៈការក្លែងបន្លំ ឬដោយការផ្តល់ព័ត៌មានមិនពិត ក្នុងអំឡុងពេលដាក់ពាក្យស្នើសុំសញ្ជាតិ។

ការ​បញ្ជូន​ខ្លួននេះ គឺជាសិទ្ធិសម្រេចដោយអធិបតេយ្យរបស់កម្ពុជា ដោយ​ផ្អែក​លើការរកឃើញភាពមិនប្រក្រតីនៃការទទួលបានសញ្ជាតិ ហើយ​បង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការគោរពនិងអនុវត្តនីតិរដ្ឋ។

ជាក់ស្តែង នេះជានីតិវិធីច្បាប់ប្រកបដោយស្តង់ដារ ហើយមិនគួរត្រូវបានយកទៅបកស្រាយខុស ឬបំភ្លៃដោយគ្មានមូលដ្ឋានច្បាប់នោះឡើយ។

ប្រព័ន្ធត្រួតពិនិត្យ និងតុល្យភាពអំណាចរបស់កម្ពុជា នៅតែមានភាពរឹងមាំ។ ការបញ្ជូនខ្លួនបុគ្គលក្នុងក្របខ័ណ្ឌច្បាប់ គឺជាដំណើរការផ្លូវការនៃជំនួយផ្នែកច្បាប់ទៅវិញទៅមក និងកិច្ចសហប្រតិបត្តិការផ្នែកយុត្តិធម៌ ដែលឆ្លុះ​បញ្ចាំង​ពី​ការទទួលខុសត្រូវ​របស់រាជរដ្ឋាភិបាល​កម្ពុជា ចំពោះច្បាប់ជាតិ និងកាតព្វកិច្ចអន្តរជាតិរបស់ខ្លួន។

ការ​អនុវត្តច្បាប់យ៉ាងម៉ឺងម៉ាត់បែបនេះ បញ្ជាក់​ពី​ការ​ប្តេជ្ញាចិត្ត​ឥត​ងាករេ​របស់កម្ពុជា ក្នុងការពង្រឹងកិច្ចសហប្រតិបត្តិការអន្តរជាតិ ដើម្បី​ថែរក្សាសន្តិភាព ស្ថិរភាព និងការអភិវឌ្ឍសង្គម-សេដ្ឋកិច្ច ព្រមទាំងការប្រយុទ្ធប្រឆាំងឧក្រិដ្ឋកម្មឆ្លងដែនប្រកបដោយប្រសិទ្ធភាព៕