នយោបាយ

សម្ដេចធិបតី រំពឹងថាក្រុមប្រឹក្សាសន្តិភាពនឹងជួយដោះស្រាយភាពផុយស្រួយនៅតាមព្រំដែនកម្ពុជា-ថៃ

បានផុស

៣ ខែ មុន

នៅ

ថ្ងៃពុធ ១៨ កុម្ភៈ ២០២៦

ដោយ

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានលើកឡើងប្រាប់ Reuters ថាកងទ័ពថៃបានឈ្លានពានលើទឹកដីកម្ពុជាបើទោះបីមានកិច្ចព្រមព្រៀងដែលសម្រុះសម្រួលដោយប្រធានាធិបតីអាមេរិកក្ដី ខណៈសម្ដេចសង្ឃឹមថាយន្តការរបស់ក្រុមប្រឹក្សាសន្ដិភាពអាចនឹងជួយកាត់បន្ថយកម្ដៅនៅតាមព្រំដែនកម្ពុជា-ថៃបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត បានប្រាប់ Reuters កាលពីថ្ងៃអង្គារ(ម៉ោងនៅអាមេរិក)ថា កម្ពុជាមិនអាចទទួលយកបានឡើយចំពោះការរំលោភលើអធិបតេយ្យភាព និងបូរណភាពទឹកដី ពីប្រទេសថៃលើកម្ពុជា និងអំពាវនាវឱ្យថៃចូលប្រជុំJBC និងបញ្ជូនអ្នកបច្ចេកទេសដើម្បីវាស់វែងព្រំដែនឱ្យបានត្រឹមត្រូវឡើងវិញ។

សម្ដេចថា៖ «ពេលនេះការបោះឆ្នោត(នៅថៃ)រួចរាល់ហើយ យើងសង្ឃឹមថាប្រទេសថៃអាចចាប់ផ្តើមបាន យ៉ាងហោចណាស់លើកម្រិតបច្ចេកទេស ចាប់ផ្តើមវាស់វែង ចាប់ផ្ដើមបោះបង្គោលព្រំដែននៅតំបន់ក្ដៅ ទើបយើងអាចត្រឡប់ទៅរស់នៅឡើងវិញបាន»។

សម្ដេច ហ៊ុន ម៉ាណែត បានបញ្ជាក់ទៅកាន់សារព័ត៌មានអន្តរជាតិនេះផងដែរថា ក្រោយបទឈប់បាញ់ និងមានកិច្ចព្រមព្រៀងដែលសម្រុះសម្រួលដោយលោកប្រធានាធិបតី ដូណាល់ ត្រាំ ក្ដីក៏កងកម្លាំងយោធារបស់ប្រទេសថៃ នៅតែបន្តកាន់កាប់ទឹកដីកម្ពុជាលើសពីព្រំដែនដែលគេទាមទារទៅទៀត ដោយមានការដាក់បន្លាលួស ទូកុងតឺន័រហាមមិនឱ្យពលរដ្ឋខ្មែរត្រលប់ទៅផ្ទះសំបែងរបស់គេវិញ។

សម្ដេចថា៖ «នេះមិនមែនជាការចោទប្រកាន់ទេ តែវាជាអ្វីដែលកើតឡើងលើដីជាក់ស្ដែង»។

បន្ទាប់ពីសម្រេចបានបទឈប់បាញ់ជាលើកទី២ កាលពីថ្ងៃទី២៧ ខែធ្នូ ឆ្នាំ២០២៥ យោធាថៃបានបន្តរាយលួសបន្លា ដាក់កុងតឺន័រ បំផ្លិចបំផ្លាញផ្ទះសំបែងរបស់ប្រជាពលរដ្ឋខ្មែរក្នុងទឹកដីដែលពួកគេឈរជើងបាន និងហាមមិនឱ្យពលរដ្ឋខ្មែរត្រលប់ទៅកាន់ភូមិឋានពួកគេវិញផងដែរ។

គិតត្រឹមថ្ងៃទី១៦ ខែកុម្ភៈ ឆ្នាំ២០២៦ មានពលរដ្ឋខ្មែរជាង៧ម៉ឺន៥ពាន់នាក់នៅមិនទាន់អាចត្រលប់ទៅកាន់ផ្ទះសំបែងពួកគេបានវិញនៅឡើយទេ។

សម្ដេចធិបតីបានចាត់ទុកស្ថានភាពនៅតាមព្រំដែនកម្ពុជា-ថៃបច្ចុប្បន្នមានភាព «ផុយស្រួយ» នឹងសង្ឃឹមថាក្រុមប្រឹក្សាសន្ដិភាពរបស់លោកដូណាល់ត្រាំនឹងអាចដើរតួនាទីក្នុងការកាត់បន្ថយស្ថានការណ៍នៅតាមព្រំដែនកម្ពុជា-ថៃបាន។

គួរឱ្យដឹងផងដែរថានាយករដ្ឋមន្ត្រីកម្ពុជាបានដឹកនាំប្រតិភូកម្ពុជាទៅចូលរួមកិច្ចប្រជុំដំបូងរបស់ក្រុមប្រឹក្សាសន្តិភាពនៅរដ្ឋធានីវ៉ាស៊ីនតោនក្នុងសប្ដាហ៍នេះ បន្ទាប់ពីកម្ពុជាបានសម្រេចចិត្តចូលរួមជាសមាជិកស្ថាប័នថ្មីនេះកាលពីខែមករាកន្លងទៅ៕

អត្ថបទដោយ ហ៊ុន សិរីវឌ្ឍន៍