កីឡា

ក្លឹបប្រដាល់ថ្មីរបស់លោក ផាត សូដា នៅខ្វះស័ង្កសីដំបូង ជញ្ជាំង ប៉ុន្តែផ្អាកសិនព្រោះជំពាក់លុយដេប៉ូជាង ៤,០០០ដុល្លារហើយ

បានផុស

៤ ខែ មុន

នៅ

ថ្ងៃព្រហស្បតិ៍ ១៩ កុម្ភៈ ២០២៦

ដោយ

លោក ផាត សូដា គ្រូប្រដាល់ល្បីឈ្មោះខាងបណ្ដុះថ្នាលតូចៗកំពុងដំណើរការសាងសងក្លឹបថ្មីនៅលើដីខ្លួនឯងផ្ទាល់ឯខណ្ឌព្រែកព្រៅ រាជធានីភ្នំពេញជិតរួចរាល់ ប៉ុន្តែនៅខ្វះស័ង្កសីដំបូង និងជញ្ជាំងបន្តិចទៀតមិនទាន់មានលទ្ធភាពបន្តឡើយ ព្រោះជំពាក់ដេប៉ូ ៤,០០០ដុល្លារហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីតាំងក្លឹបថ្មីកំពុងសាងសង

នេះបើតាមការឲ្យដឹងពីលោក ផាត សូដា បានបញ្ជាក់មកថា បើមែនទែនទៅក្លឹបប្រដាល់ដែលសាងសង់នេះត្រូវរួចរាល់ហើយ ប៉ុន្តែដោយសារលោកជំពាក់លុយថ្លៃគ្រឿងសំណង់ដេប៉ូប្រហែល ៤,០០០ដុល្លារទៅហើយ ដូច្នេះក៏មិនហ៊ានយកសម្ភារបន្ថែមទៀតមកបង្ហើយការងារ។

គ្រូបង្វឹករបស់កីឡាករ រិទ្ធី គីងកុង រូបនេះបន្ថែមទៀតថា ចាំមើលសន្សំលុយដើម្បីសងដេប៉ូលក់គ្រឿងសំណង់នោះរួចរាល់សិនចាំគិតរឿងសាងសងបង្ហើយដំបូលក្លឹបដែលនៅសល់នោះ។ ឥលូវនេះខ្លួនសន្សំថវិកាបានប្រហែល ១,០០០ដុល្លារហើយ ដូច្នេះរង់ចាំមើល ២-៣ខែទៀតអាចនឹងគ្រប់សងដេប៉ូទើបចាប់ផ្ដើមគិតសាងសងបន្ត។

សិស្សលោក ផាត សូដា

បញ្ជាក់ដែរថា លោក ផាត សូដា ជាគ្រូបង្វឹកក្លឹបប្រដាល់គុនខ្មែរស៊ុបពើហ្វៃដែលគេស្គាល់ថាជាកន្លែងបណ្ដុះធនធានថ្នាលបានច្រើននាពេលកន្លងមក។ លោកបានបណ្ដុះ រិទ្ធី គីងកុង រិទ្ធី បូរិន គឿម សុវណ្ណឃីម និងកីឡាករល្អៗមួយចំនួនទៀត។ កន្លងទៅក្លឹបប្រដាល់របស់លោកបានផ្លាស់ប្ដូរពីកន្លែងមួយទៅកន្លែងមួយដោយជួលដីប៉ុណ្ណោះ ទើបតែប៉ុន្មានខែនេះលោកសម្រេចសាងសងក្លឹបថ្មីនៅលើទីតាំងដីរបស់លោកផ្ទាល់ដែលបានសន្សំថវិកាទិញម្ដងបន្តិចៗកន្លងមក។ ក្លឹបថ្មីរបស់លោកគឺនៅខណ្ឌព្រែកព្រៅ រាជធានីភ្នំពេញ៕