ព័ត៌មានអន្ដរជាតិ

ត្រឹម១ថ្ងៃអាទិត្យ ជើងហោះហើរ៣៤០០ នៅមជ្ឈិមបូព៌ាត្រូវលុបចោល

បានផុស

៤ ខែ មុន

នៅ

ថ្ងៃចន្ទ ២ មីនា ២០២៦

ដោយ

ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ បានរំខានដល់ជើងហោះហើរនៅទូទាំងមជ្ឈិមបូព៌ា ខណៈប្រទេសនានានៅជុំវិញតំបន់បានបិទជើងហោះហើរតាមអាកាសរបស់ពួកគេ ជាពិសេសអាកាសយានដ្ឋានសំខាន់ៗភ្ជាប់ជាមួយអឺរ៉ុប អាហ្វ្រិក និងលោកខាងលិចទៅអាស៊ីទទួលរងការវាយប្រហារដោយផ្ទាល់។

យោងតាមកម្មវិធីតាមដានជើងហោះហើរ Flightradar២៤ ជើងហោះហើរជាង៣ ៤០០ ត្រូវបានលុបចោលកាលពីថ្ងៃអាទិត្យទូទាំងអាកាសយានដ្ឋានចំនួន៧ នៅមជ្ឈិមបូព៌ា។

យន្តហោះ Emirates, Qatar និង Etihad ។ រូបភាព៖ Simple Flying

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al.com នៅថ្ងៃទី០១ខែមីនា ឆ្នាំ២០២៦ ឱ្យដឹងថា អាកាសយានដ្ឋានដែលបានបិទរួមមាន អាកាសយានដ្ឋានទីក្រុងឌូបៃ និងអាប៊ូដាប៊ី(Abu Dhabi ) ក្នុងប្រទេសអារ៉ាប់រួម និងរដ្ឋធានីដូហាប្រទេសកាតា និងម៉ាណាម៉ា (Manama) ក្នុងប្រទេសបារ៉ែន។

ក្រុមហ៊ុនអាកាសចរណ៍ Emirates Airlines បានផ្អាកជើងហោះហើរទាំងអស់ចេញ-ចូលទីក្រុងឌូបៃចាប់ពីថ្ងៃអាទិត្យ ពេលដែលភាគីជម្លោះចាប់ផ្តើមវាយប្រហារគ្នាទៅវិញទៅមកយ៉ាងព្រៃផ្សៃដោយសារការផ្លោងមីស៊ីល និងការវាយប្រហារតាមផ្លូវអាកាស។

ចំណែកក្រុមហ៊ុនអាកាសចរណ៍ El Al របស់អ៊ីស្រាអែល បាននិយាយថា ខ្លួនកំពុងរៀបចំស្តារឡើងវិញដើម្បីនាំជនជាតិអ៊ីស្រាអែលដែលជាប់គាំងនៅបរទេសត្រឡប់ទៅផ្ទះវិញ ពេលដែនអាកាសបានបើកឡើងវិញ។

យ៉ាងណាមិញ អ្នកធ្វើដំណើរជាច្រើនបានជាប់គាំង ឬបង្វែរទៅកាន់អាកាសយានដ្ឋានផ្សេងទៀតនៅថ្ងៃសៅរ៍ បន្ទាប់ពីអ៊ីស្រាអែល កាតា ស៊ីរី អ៊ីរ៉ង់ អ៊ីរ៉ាក់ គុយវ៉ែត និងបារ៉ែន បានបិទដែនអាកាសរបស់ពួកគេ។

កម្មវិធី FlightRadar២៤ បានបន្តថា គ្មានសកម្មភាពហោះហើរលើប្រទេស អារ៉ាប់រួមនោះទេ បន្ទាប់ពីរដ្ឋាភិបាលប្រទេសនេះបានប្រកាសពីការបិទដែនអាកាសរបស់ខ្លួនជាបណ្តោះអាសន្ន។

យោងតាមក្រុមហ៊ុនវិភាគអាកាសចរណ៍ Cirium បានឱ្យដឹងថា ក្រុមហ៊ុនអាកាសចរណ៍ធំៗទាំងបីដែលធ្វើប្រតិបត្តិការនៅអាកាសយានដ្ឋានទាំងនោះគឺ Emirates, Qatar Airways និង Etihad ជាធម្មតាមានអ្នកដំណើរប្រហែល ៩០ ០០០នាក់ ក្នុងមួយថ្ងៃ៕

ប្រែសម្រួល៖ ណឺ មិនា