ព័ត៌មានអន្ដរជាតិ

ប្រមុខណាតូ គាំទ្រការវាយប្រហាររបស់អាមេរិកលើអ៊ីរ៉ង់ ព្រោះជារឿងចៀសមិនរួច

បានផុស

១៣ វិនាទី មុន

នៅ

ថ្ងៃពុធ ៨ កក្កដា ២០២៦

ដោយ

ស្ថានការណ៍នៅមជ្ឈិមបូព៌ាបានតានតឹងជាថ្មី ក្រោយយោធាអាមេរិកបើកការវាយប្រហារលើទីតាំងនានានៅភាគខាងត្បូងអ៊ីរ៉ង់ កាលពីយប់ថ្ងៃអង្គារ ដើម្បីឆ្លើយតបទៅនឹងអ៊ីរ៉ង់ដែលវាយប្រហារលើកប៉ាល់ដឹកជញ្ជូនពាណិជ្ជកម្មចំនួន ៣គ្រឿងនៅក្នុងច្រកសមុទ្រ Hormuz ។

ជុំវិញបញ្ហានេះ អគ្គលេខាធិការអង្គការណាតូ លោក Mark Rutte លើកឡើងនៅថ្ងៃពុធ ទី៨ ខែកក្កដា ឆ្នាំ២០២៦ ថា ការវាយប្រហារជាថ្មីរបស់សហរដ្ឋអាមេរិកលើប្រទេសអ៊ីរ៉ង់ គឺចាំបាច់បំផុត។

អគ្គលេខាធិការអង្គការណាតូ លោក Mark Rutte ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Reuters ផ្សាយថា យោធាសហរដ្ឋអាមេរិក បានបើកការវាយប្រហារជាថ្មី ប្រឆាំងនឹងប្រទេសអ៊ីរ៉ង់កាលពីថ្ងៃអង្គារ និងបានដកអាជ្ញាប័ណ្ណដែលអនុញ្ញាតឱ្យទីក្រុងតេហេរ៉ង់ លក់ប្រេង បន្ទាប់ពីកប៉ាល់ដឹកប្រេងចំនួន ៣គ្រឿងត្រូវបានវាយប្រហារដោយគ្រាប់ផ្លោងក្នុងច្រកសមុទ្រ Hormuz ។

លោក Rutte ប្រាប់អ្នកយកព័ត៌មានមុនកិច្ចប្រជុំកំពូលរបស់មេដឹកនាំណាតូ នៅទីក្រុងអង់ការ៉ាថា៖ « មានបទឈប់បាញ់រវាងអាមេរិក-អ៊ីរ៉ង់ រួចហើយ តែភាគីអ៊ីរ៉ង់កំពុងរំលោភលើបទឈប់បាញ់ ខ្ញុំគិតថាវាមានសារៈសំខាន់ខ្លាំងណាស់ ដែលសហរដ្ឋអាមេរិក ត្រូវឆ្លើយតបដោយបង្ខំ»។

ក្នុងកិច្ចប្រជុំកំពូលនៅតួកគី មេដឹកនាំអឺរ៉ុបមានគោលបំណងបញ្ចុះបញ្ចូល លោក ដូណាល់ ត្រាំ ឱ្យប្តេជ្ញាចិត្តចំពោះសម្ព័ន្ធភាពយោធាអឺរ៉ុបឡើងវិញ បន្ទាប់ពីប្រធានាធិបតីអាមេរិកអន់ចិត្ត ព្រមទាំងគំរាមដកទ័ពចេញពីអឺរ៉ុបទៀតផង ព្រោះមិនជួយខ្លួនលើសង្គ្រាមអ៊ីរ៉ង់ និងបញ្ហានៅកោះ Greenland ។

លោក Rutte បន្ថែមថា៖ « មិនមានការសង្ស័យ លើការប្តេជ្ញាចិត្តទាំងស្រុងរបស់សហរដ្ឋអាមេរិក ចំពោះអង្គការណាតូទេ។ យើងក៏ធ្វើការ ដើម្បីការពារសហរដ្ឋអាមេរិកផងដែរ»៕

សម្រួល៖ ណឺ មិនា