តើកិច្ចព្រមព្រៀងអាវុធខ្នាតធំ ណាតូ អាចទិញចិត្ត ត្រាំ ឲ្យបន្តគាំទ្រសម្ព័ន្ធភាពនេះបានកម្រិតណា?

បណ្តាប្រទេសសម្ព័ន្ធមិត្តណាតូ បាននិងកំពុងប្រើប្រាស់យុទ្ធសាស្ត្រទិញដូរអាវុធខ្នាតធំតម្លៃរាប់សិបពាន់លានដុល្លារ នៅឯកិច្ចប្រជុំកំពូលក្នុងទីក្រុងអង់ការ៉ា ដើម្បីធ្វើជាខ្នងបង្អែកការទូតក្នុងការទិញចិត្ត និងបន្ធូរបន្ថយកំហឹងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។

យោងតាមទីភ្នាក់ងារ Reuters, ការជះលុយយ៉ាងសន្ធឹកសន្ធាប់លើវិស័យយោធានេះ អាចជួយទិញចិត្តលោក ត្រាំ បានក្នុងកម្រិតខ្ពស់មួយ ព្រោះវាបានឆ្លើយតបចំគោលដៅចម្បងរបស់លោក ដែលតែងតែទាមទារឲ្យអឺរ៉ុបបង្កើនកញ្ចប់ថវិកាការពារជាតិឲ្យដល់ ៥% នៃ GDP និងបញ្ឈប់ការផ្អែកលើលុយអាមេរិកតែម្ខាងក្នុងការការពារទ្វីបអឺរ៉ុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងលេចធ្លោទាំងនោះ រួមមានការដែលកាណាដាសម្រេចចិត្តទិញនាវាមុជទឹកពីអាល្លឺម៉ង់ និងការដែលហូឡង់បោះទុនជាង ៣ ពាន់លានអឺរ៉ូ លើប្រព័ន្ធការពារដែនអាកាស ដែលសកម្មភាពទាំងនេះបានសបញ្ជាក់ទៅលោក ត្រាំ ថា អឺរ៉ុបកំពុងចាត់វិធានការណ៍ជាក់ស្តែង មិនមែនមានតែពាក្យសន្យានោះឡើយ។

ទោះជាយ៉ាងណាក៏ដោយ កញ្ចប់លុយទិញអាវុធទាំងនេះអាចទិញចិត្តលោក ត្រាំ បានតែលើទិដ្ឋភាពសេដ្ឋកិច្ច និងការចែករំលែកបន្ទុកហិរញ្ញវត្ថុប៉ុណ្ណោះ ប៉ុន្តែវានៅមិនទាន់អាចធានាបានទាំងស្រុងនូវការគាំទ្រយូរអង្វែងរបស់អាមេរិកលើសម្ព័ន្ធភាពនេះទេ បើពិនិត្យលើបញ្ហានយោបាយផ្ទៃក្នុង។

លោក ត្រាំ នៅតែមានការអាក់អន់ចិត្តយ៉ាងខ្លាំង ចំពោះការដែលបណ្តាប្រទេសអឺរ៉ុបបានបដិសេធមិនព្រមបើកដៃឲ្យកងទ័ពអាមេរិកប្រើប្រាស់មូលដ្ឋានទ័ព និងដែនអាកាសដើម្បីវាយប្រហារប្រទេសអ៊ីរ៉ង់កាលពីពេលថ្មីៗនេះ។

ភាពរកាំរកូសខាងភូមិសាស្ត្រនយោបាយនេះ បូករួមទាំងចរិតលក្ខណៈប្រែប្រួលលឿនរបស់លោក ត្រាំ ធ្វើឲ្យក្រុមអ្នកការទូតយល់ឃើញថា ទោះបីជាណាតូព្យាយាមផ្គាប់ចិត្តលោកដោយការទិញអាវុធក៏ដោយ ក៏សម្ព័ន្ធភាពនេះនៅតែត្រូវប្រឈមមុខនឹងភាពមិនច្បាស់លាស់ ដរាបណាអឺរ៉ុបមិនព្រមដើរតាមបន្ទាត់នយោបាយការបរទេសរបស់អាមេរិកក្នុងតំបន់មជ្ឈិមបូព៌ានោះឡើយ។

ចាប់តាំងពីអាណត្តិដំបូងរបស់ ត្រាំ លោកតែងតែចោទប្រកាន់បណ្តាប្រទេសអឺរ៉ុបថាជា «អ្នកជិះហ្វ្រី» ដោយពឹងផ្អែកទាំងស្រុងលើកម្លាំងយោធានិងថវិការបស់អាមេរិកដើម្បីការពារខ្លួន។ ភាពរកាំរកូសចុងក្រោយបង្អស់ដែលធ្វើឲ្យលោកក្តៅក្រហាយខ្លាំង គឺកើតឡើងបន្ទាប់ពីអាមេរិកផ្ទុះសង្គ្រាមយោធាជាមួយអ៊ីរ៉ង់។ ក្នុងអំឡុងពេលសង្គ្រាមនោះ បណ្តាប្រទេសអឺរ៉ុបជាច្រើនបានដាក់ការរឹតបន្តឹង មិនអនុញ្ញាតឲ្យកងទ័ពអាមេរិកប្រើប្រាស់ដែនអាកាស ឬមូលដ្ឋានទ័ពដែលស្ថិតនៅក្នុងប្រទេសរបស់ពួកគេដើម្បីទៅវាយប្រហារអ៊ីរ៉ង់ឡើយ។ ចំណុចនេះធ្វើឲ្យ ត្រាំ ចាត់ទុកថាអឺរ៉ុប «មិនស្មោះត្រង់» និងមិនជួយអាមេរិកក្នុងគ្រាអាសន្ន៕

អត្ថបទ ៖ សាង ស្រីល័ក្ខ

មេដឹកនាំ​ណាតូ ត្រៀមបង្ហាញកិច្ចព្រមព្រៀងអាវុធខ្នាតធំ ចំពោះ​លោក ត្រាំ នៅលើទឹកដីតួកគី