លោក រ័ត្ន តុលា ត្រូវ​បាន​តែងតែងជាប្រធានមន្ទីររ៉ែ និង​ថាមពលខេត្តក្រចេះ ជំនួសលោក សុខ គីរីរត្ន ផ្ទេរភារកិច្ចទៅក្រសួង

លោក រ័ត្ន តុលា ត្រូវបានប្រកាសតែងតាំងជាប្រធានមន្ទីររ៉ែ និងថាមពលខេត្តក្រចេះ ជំនួសលោក សុខ គីរីរត្ន័ ដោយទទួលភារកិច្ចថ្មីនៅក្រសួងរ៉ែ និងថាមពល ដើម្បីបន្តនិរន្តរភាពការងារ និងពង្រឹងប្រសិទ្ធភាពគ្រប់គ្រងធនធានរ៉ែក្នុងខេត្ត។

នៅក្នុងពិធីប្រកាសតែងតាំងមុខតំណែងប្រធានមន្ទីរ៉ែនេះ ធ្វើឡើង នៅសាលមហោស្រពខេត្តក្រចេះ កាល​ពីព្រឹកថ្ងៃទី១០ ខែមិនា ឆ្នាំ២០២៦ ក្រោមអធិបតីភាព លោក អ៊ិត ប្រាំង រដ្ឋលេខាធិការនៃក្រសួង​រ៉ែ និងថាមពល និងលោក​ វ៉ា ថន អភិបាលនៃគណៈអភិបាលខេត្តក្រចេះ។

លោក វ៉ា ថន អភិបាលនៃគណៈអភិបាលខេត្តក្រចេះ មានប្រសាសន៍ថា វិស័យរ៉ែ និងថាមពលខេត្តក្រចេះ មានក្រុមហ៊ុនសហគ្រាសសរុបចំនួន ៥៦ ក្រុមហ៊ុន ស្មើនឹង ៦១អាជ្ញាបណ្ណ។

ខេត្តមានក្រុមហ៊ុនធ្វើអាជីវកម្មរ៉ែមាសចំនួន ១ កន្លែង ស្ថិតនៅស្រុកអូរគ្រៀងសែនជ័យ វិនិយោគិនមកពីប្រទេសចិន សម្រេចការចម្រាញ់មាសសុទ្ធចាប់ពីខែតុលា ឆ្នាំ២០២២ រហូតមកបច្ចុប្បន្នសរុបចំនួន ៤៧៧,៩៥១គីឡូក្រាម។

លោកអភិបាលក៍បានជម្រុញឲ្យ​លោកប្រធានមន្ទីថ្មីត្រូវបន្តពង្រឹងសាមគ្គីភាពផ្ទៃក្នុងជាមួយថ្នាក់ដឹកនាំរដ្ឋបាលខេត្ត មន្ទីរ-អង្គភាពជុំវិញខេត្ត រដ្ឋបាលក្រុង ស្រុក ឃុំ សង្កាត់ និងមន្ត្រីក្រោមឱវាទ ព្រមទាំងបង្កើនកិច្ចសហការ និង ទំនាក់ទំនងល្អជាមួយដៃគូអភិវឌ្ឍ ក្រុមហ៊ុន/សហគ្រាសដែលវិនិយោគក្នុងវិស័យ រ៉ែឱ្យបានល្អប្រសើរ និង​ត្រូវបន្តពង្រឹងការគ្រប់គ្រង ទប់ស្កាត់ និងបង្ក្រាប លុបបំបាត់ការធ្វើអាជីវកម្មរ៉ែខុសច្បាប់ និង អនាធិបតេយ្យ ដោយដើរទន្ទឹមនឹងការផ្សព្វផ្សាយ អប់រំ និងណែនាំជូនដល់ក្រុមហ៊ុនសហគ្រាស/អាជីវករ និងបងប្អូនប្រជាពលរដ្ឋឱ្យបានជាប់ជាប្រចាំបន្តពង្រឹង និងជំរុញការផ្តល់សេវារដ្ឋបាលនានាក្នុងវិស័យរ៉ែ និងថាមពលជូនដល់ ប្រជាពលរដ្ឋឱ្យបានឆាប់រហ័ស ប្រកបដោយតម្លាភាព និងមានប្រសិទ្ធភាព។

លោក អ៊ិត ប្រាំង រដ្ឋលេខាធិការប្រចាំការនៃក្រសួងរ៉ែ និងថាមពល បញ្ជាក់ថា ការបន្តនិរន្តរភាព និងពង្រឹងសមត្ថភាពដឹកនាំប្រធានមន្ទីរថ្មីត្រូវចេះប្រមូលផ្តុំកម្លាំងសាមគ្គីភាពផ្ទៃក្នុងជាមួយមន្ត្រីរាជការគ្រប់ជាន់ថ្នាក់ ដើម្បីបង្កើនប្រសិទ្ធភាពការងារ និងបរិយាកាសការងារល្អ។ចាត់វិធានការច្បាប់ឱ្យបានតឹងរ៉ឹងចំពោះការធ្វើអាជីវកម្មរ៉ែដែលគ្មានអាជ្ញាបណ្ណ ជាពិសេសការដ្ឋានខ្សាច់ និងការដ្ឋានរ៉ែផ្សេងៗក្នុងខេត្ត ធានាថាការប្រមូលកម្រៃសេវា និងការបង់ពន្ធលើពីវិស័យរ៉ែ ត្រូវបានធ្វើឡើងដោយតម្លាភាព ដើម្បីរួមចំណែកដល់ថវិកាជាតិ។ លោកបន្តរថាលោកប្រធានមន្ទីរថ្មី តួនាទីនេះមិនមែនត្រឹមតែជាបុណ្យស័ក្តិឡើយ ប៉ុន្តែគឺជា “ការទទួលខុសត្រូវ” ដ៏ធ្ងន់ធ្ងរចំពោះមុខច្បាប់ និងប្រជាពលរដ្ឋ ជាមួយគ្នានោះ លោកបានស្នើសុំលោកអភិបាលខេត្ត ក្រុមប្រឹក្សាខេត្ត រដ្ឋបាលក្រុងស្រុក និងអង្គភាពពាក់ព័ន្ធគ្រប់លំដាប់ថ្នាក់ មេត្តាបន្តជួយសហការ សម្របសម្រួល ជាមួយមន្ទីររ៉ែ និងថាមពល ដើម្បីអភិវឌ្ឍវិស័យរ៉ែ ថាមពល និងប្រេងកាត ក្នុងខេត្តក្រចេះ ឱ្យបានរីកចម្រើនជាបន្តបន្ទាប់៕

អត្ថបទ៖ ប្រុញ វិធិន