លេចធ្លាយរូបភាពយន្តហោះ «ភ្នែកទិព្វ» របស់អាមេរិក ដែល​ត្រូវអ៊ីរ៉ង់​បំផ្លាញ

រូបភាពថ្មីៗដែលបានផ្សព្វផ្សាយនៅថ្ងៃទី២៩​ខែមីនា​នេះ បង្ហាញថា យន្តហោះ E-3 Sentry របស់សហរដ្ឋអាមេរិក ដែលមានតម្លៃជាង ៥០០លានដុល្លារ ហាក់ដូចជាត្រូវបានបំផ្លាញទាំងស្រុង នៅក្នុងការវាយប្រហារដោយមីស៊ីល និងដ្រូនរបស់អ៊ីរ៉ង់ លើមូលដ្ឋានទ័ពអាកាស Prince Sultan ក្នុងប្រទេសអារ៉ាប៊ីសាអូឌីត។

តាមរយៈរូបភាព ផ្នែកកន្ទុយយន្តហោះត្រូវបានឆេះខ្លោច ចំណែកឯថាសរ៉ាដាដ៏ធំនៅលើខ្នងយន្តហោះបានធ្លាក់មកដី ដែលអ្នកជំនាញអាកាសចរណ៍យោធាអះអាងថា ការខូចខាតនេះធ្ងន់ធ្ងររហូតមិនអាចជួសជុលបានឡើយ។

យន្តហោះដែលរងគ្រោះមានលេខសម្គាល់ «81-0005» គឺជាយន្តហោះមួយក្នុងចំណោមយន្តហោះ E-3 ចំនួន​៦គ្រឿងដែលអាមេរិកបានដាក់ពង្រាយនៅអារ៉ាប៊ីសាអូឌីត មុនពេលជម្លោះផ្ទុះឡើង។ កាសែត Wall Street Journal បានរាយការណ៍ថា ការវាយប្រហារកាលពីថ្ងៃទី២៨មីនា ក៏បានបណ្តាល​ឲ្យ​កងទ័ពអាមេរិក​១២​នាក់រងរបួស និងខូចខាតយន្តហោះចាក់សាំងលើអាកាសជាច្រើនគ្រឿងទៀតផងដែរ។ ការបាត់បង់នេះគឺជាការប៉ះទង្គិចយ៉ាងខ្លាំងដល់សមត្ថភាពឃ្លាំមើលតាមអាកាសរបស់អាមេរិក ដ្បិត​បច្ចុប្បន្នអាមេរិកមានយន្តហោះប្រភេទនេះតែ១៦​គ្រឿងប៉ុណ្ណោះនៅក្នុងបញ្ជីសកម្ម។

យន្តហោះ E-3 Sentry ត្រូវបានគេប្រៀបប្រដូចទៅនឹង «ភ្នែកទិព្វ» ដោយសារសមត្ថភាពអាចរកឃើញយន្តហោះសត្រូវពីចម្ងាយរាប់រយគីឡូម៉ែត្រ។ ទោះបីជារូបភាពផ្កាយរណបបង្ហាញពីស្នាមឆេះយ៉ាងធំនៅលើទីលានចតយន្តហោះក៏ដោយ ប៉ុន្តែបញ្ជាការដ្ឋានកណ្តាលអាមេរិក (CENTCOM) មិនទាន់ចេញមុខបញ្ជាក់ជាផ្លូវការជុំវិញព័ត៌មាន និងរូបភាពដែលបានលេចធ្លាយនេះនៅឡើយទេ៕

ប្រែសម្រួល៖ ឈាង