​​ខណៈ​​​​​​​កិច្ចខិតខំ​​​​​បញ្ចប់ជម្លោះ​មជ្ឈិមបូព៌ា លោក ហ្សេលេនស្គី ដាក់​សំណើឈប់បាញ់​ជាមួយ​​​រុស្ស៊ី​​តាមរយៈ​​អាមេរិក

ប្រធានាធិបតីអ៊ុយក្រែន លោក​  វ៉ូឡូឌីមៀរ ហ្សេលេនស្គី បាននិយាយ​នៅ​ថ្ងៃចន្ទទី៦មេសា ថា លោកគាំទ្រសំណើ​បទ​ឈប់​បាញ់​​ដែលធ្វើឡើងទៅកាន់ប្រទេសរុស្ស៊ី ហើយ​ថា វាក៏អាស្រ័យលើទីក្រុងមូស្គូ ដើម្បីបញ្ឈប់ការវាយប្រហារទាំងអស់លើហេដ្ឋារចនាសម្ព័ន្ធថាមពលដែរ។ នេះបើយោងតាមការចុះផ្សាយពីសារព័ត៌មាន Reuters ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុង​វីដេអូពេលយប់កាលពីថ្ងៃចន្ទទី៦មេសា លោក ហ្សេលេនស្គី បានបញ្ចាក់ថា សំណើនេះត្រូវបានបញ្ជូនទៅកាន់ទីក្រុងមូស្គូតាមរយៈ​ភាគីអាមេរិក។ ការងារកំពុងបន្តជាមួយអ្នកចរចាអាមេរិកលើការធានាសន្តិសុខ ដែលលោកហៅថា ជាគន្លឹះនៃសន្តិភាពយូរអង្វែង។

លោក ហ្សេលេនស្គី ដែល​បាន​​​​ដឹកនាំ​អ៊ុយក្រែន​ប្រយុទ្ធ​​ទប់​ទល់​ការឈ្លាន​ពាន​​របស់​រុស្ស៊ី​អស់​រយៈពេល​​ជាង​៤ឆ្នាំ និយាយ​ថា «ប្រសិនបើរុស្ស៊ីត្រៀមខ្លួនបញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់យើង យើងនឹងត្រៀមខ្លួនឆ្លើយ​តប​វិញភ្លាមៗ​​។ ជាក់ស្ដែងសំណើមួយនេះ កំពុងបញ្ជូនទៅកាន់ភាគីរុស្ស៊ីតាមរយៈអាមេរិករួចហើយ»។

លោកហ្សេលេនស្គី ​ បានស្នើកាលពីសប្តាហ៍មុន ដើម្បីសង្កេតមើលបទឈប់បាញ់ក្រោមលក្ខខណ្ឌស្រដៀងគ្នាសម្រាប់បុណ្យ Easter ប៉ុន្តែបន្ទាប់ពីការវាយប្រហារថ្មីៗរបស់រុស្ស៊ី លោកថា ទីក្រុងមូស្កូបានឆ្លើយតបទៅនឹងសំណើនេះ ដោយ​ការ​វាយ​ប្រហារ​ដោយ​យន្តហោះគ្មានមនុស្សបើក Shahed ដែលរចនាដោយអ៊ីរ៉ង់ទៅវិញ។

នៅក្នុងសុន្ទរកថាមួយទៀត​នៅ​ថ្ងៃចន្ទដដែល បន្ទាប់ពីការវាយប្រហារលើកំពង់ផែ Odesa ជាប់​សមុទ្រខ្មៅ ដោយសម្លាប់មនុស្សបីនាក់ លោក ហ្សេលេនស្គី បាននិយាយថា រុស្ស៊ីហាក់ដូចជា មិន​យល់ព្រមចំពោះបទឈប់បាញ់នៅថ្ងៃបុណ្យ Easter ទេ។ ជាក់ស្ដែង ទីក្រុងកៀវបានស្នើម្តងហើយម្តងទៀតដល់រុស្ស៊ីនូវបទឈប់បាញ់យ៉ាងហោចណាស់សម្រាប់ថ្ងៃបុណ្យដ៏ពិសិដ្ឋ ដែលជាពេលវេលាពិសេសមួយក្នុងមួយឆ្នាំមានម្ដង៕

អត្ថបទ៖ សាង ស្រីល័ក្ខ

អ៊ុយក្រែន និងស៊ីរី ផ្តើម​ទំនាក់ទំនង​ក្នុង​វិស័យ​សន្តិសុខ និងការពារជាតិ ក្រោយ​របបស្និទ្ធរុស្ស៊ី​ដួលរលំ​​