ព័ត៌មានអន្ដរជាតិ

អ៊ុយក្រែន និងស៊ីរី ផ្តើមទំនាក់ទំនងក្នុងវិស័យសន្តិសុខ និងការពារជាតិ ក្រោយរបបស្និទ្ធរុស្ស៊ីដួលរលំ

បានផុស

៣ សប្តាហ៍ មុន

នៅ

ថ្ងៃចន្ទ ៦ មេសា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានលើកឡើងថា អ៊ុយក្រែន និងស៊ីរី សន្យាសហការគ្នាលើវិស៏យសន្តិសុខនិងការពារជាតិឲ្យកាន់តែខ្លាំងឡើង នៅក្នុងជំនួបកំពូលលើកដំបូងកាលពីថ្ងៃអាទិត្យទី៥មេសា បន្ទាប់ពីមេដឹកនាំសេរីថ្មី លោក អាមេដ អាល់-សារ៉ា (Ahmed al-Sharaa) ឡើងកាន់អំណាច ក្រោយផ្តួចរំលំរបបដឹកនាំ របស់ Bashar al-Assad កាលពីចុងឆ្នាំ២០២៤។

រដ្ឋាភិបាលអ៊ុយក្រែងរបស់លោក ហ្សេលេនស្គី ដែលកំពុងជាប់ផុងក្នុងសង្គ្រាមជាមួយមហាអំណាចរុស្ស៊ីជាង៤ឆ្នាំកន្លងមកនេះ កំពុងស្វែងរកការលើកកម្ពស់ជំនាញយោធារបស់ខ្លួននៅទូទាំងតំបន់ បន្ទាប់ពីការផ្ទុះឡើងនៃសង្គ្រាមអាមេរិក-អ៊ីស្រាអែលលើអ៊ីរ៉ង់ និងពង្រីកទំនាក់ទំនងកាន់តែស៊ីជម្រៅជាមួយបណ្តារដ្ឋអារ៉ាប់ផ្សេងៗទៀតដែលរងការវាយប្រហារពីអ៊ីរ៉ង់។

យោងតាមទីភ្នាក់ងារព័ត៌មាន Reuters ប្រធានាធិបតី ហ្សេលេនស្គី បានសរសេរនៅលើបណ្ដាញសង្គម Telegram ថា៖ «ប្រទេសទាំងពីរបានព្រមព្រៀងគ្នាធ្វើការរួមគ្នាដើម្បីផ្តល់ «សន្តិសុខ និងឱកាសកាន់តែច្រើនសម្រាប់ការអភិវឌ្ឍសម្រាប់សង្គមរបស់យើង។ ជាពិសេសនោះ យើងបានពិភាក្សាគ្នាអំពីអ្វីៗគ្រប់យ៉ាង រាប់ចាប់ពីការការពារជាតិ និងស្ថានភាពនៅក្នុងតំបន់ ដោយសារតែព្រឹត្តិការណ៍ទាំងអស់ជុំវិញអ៊ីរ៉ង់ រហូតដល់កិច្ចសហប្រតិបត្តិការថាមពល និងហេដ្ឋារចនាសម្ព័ន្ធរវាងប្រទេសរបស់យើង»។

ការបញ្ចាក់របស់ លោក ហ្សេលេនស្គី បានកើតឡើងក្នុងអំឡុងពេលនៃដំណើរទស្សនកិច្ចទៅកាន់ប្រទេសស៊ីរី ដោយប្រធានាធិបតីអ៊ុយក្រែន បានជួបពិភាក្សាជាមួយប្រធានាធិបតីស៊ីរី លោក Ahmed al-Sharaa។ យ៉ាងណា ដំណើរទស្សនកិច្ចនេះក៏ជាលើកដំបូងរបស់លោកទៅកាន់រដ្ឋធានីស៊ីរី ចាប់តាំងពីអតីតមេដឹកនាំ Bashar al-Assad ត្រូវបានបណ្តេញចេញកាលពីខែធ្នូឆ្នាំ២០២៤។

មិនតែប៉ុណ្ណោះ ក្នុងអំឡុងពេលដំណើរទស្សនកិច្ចរបស់លោកទៅកាន់ប្រទេសឈូងសមុទ្រកាលពីសប្តាហ៍មុន មេដឹកនាំអ៊ុយក្រែនក៏បានចុះហត្ថលេខាលើកិច្ចព្រមព្រៀងសហប្រតិបត្តិការយោធារយៈពេលវែងជាមួយអារ៉ាប៊ីសាអូឌីត និងកាតាផងដែរ៕

អត្ថបទ៖ សាង ស្រីល័ក្ខ