ម្តងទៀតហើយ! លោក ត្រាំ ពន្លះណាតូ ខ្លាំងៗ រឿងសង្គ្រាមនៅអ៊ីរ៉ង់

ជាថ្មីម្តងទៀត ប្រធានាធិបតីអាមេរិក ដូណាល់ ត្រាំ បានបន្ទោសអង្គកាណាតូ ខ្លាំងៗរឿងសង្គ្រាមនៅអ៊ីរ៉ង់ ដោយលើកនេះ ប្រមុខសេតវិមានស្តីឲ្យថា ណាតូ មិនបាននៅទីនោះទេ នៅពេលដែលយើងត្រូវការពួកគេ។

តាមរយៈសារបង្ហោះលើបណ្តាញសង្គម Truth Social កាលពីថ្ងៃពុធទី៨ខែមេសាឆ្នាំ២០២៦ មេដឹកនាំអាមេរិកសរសេរថា៖ «ណាតូ មិនបាននៅទីនោះទេ នៅពេលយើងត្រូវការពួកគេ ហើយពួកគេក៏នឹងមិននៅទីនោះដែរ ប្រសិនបើយើងត្រូវការពួកគេម្តងទៀត។ សូមចងចាំរឿងកោះហ្គ្រីនឡែន ដែលជាផ្ទាំងទឹកកកដ៏ធំ គ្រប់គ្រងយ៉ាងអន់ និងក្រីក្រនោះទៅ!!!»។

ការបង្ហោះសារនេះកើតឡើងក្រោយពេលលោក ត្រាំ ជួបជាមួយប្រមុខអង្គការណាតូ ម៉ាក រូតេ នៅសេតវិមាន ដើម្បីពិភាក្សាបញ្ហាសន្តិសុខពិភពលោក។

ជំនួបនេះទៀតសោតកើតឡើង បន្ទាប់ពីរបាយការណ៍របស់ Reuters និង The Guardian បង្ហាញថា ទំនាក់ទំនងណាតូ និងអាមេរិក បានធ្លាក់ចុះដល់ចំណុចទាបបំផុត​ក្នុងរយៈពេល៧៧ឆ្នាំ។

មុននេះ លោកត្រាំ បានប្រកាសជាចំហថា លោកកំពុង «ពិចារណាយ៉ាងម៉ឺងម៉ាត់» ក្នុងការដកសហរដ្ឋអាមេរិកចេញពីសម្ព័ន្ធភាពណាតូ។ ការថ្លែងបែបនេះបានធ្វើ​ឲ្យ​ពិភពលោកមានការភ្ញាក់ផ្អើលយ៉ាងខ្លាំង ខណៈដែលអង្គការមួយនេះទើបតែប្រារព្ធខួប​៧៧ឆ្នាំនៃវត្តមានរបស់ខ្លួន។

ភាពតានតឹងបានផ្ទុះឡើងខ្លាំង បន្ទាប់ពីបណ្តាប្រទេសជាសមាជិកណាតូនៅអឺរ៉ុប បានបដិសេធសំណើរបស់ទីក្រុងវ៉ាស៊ីនតោន ក្នុងការបញ្ជូនកងទ័ពជើងទឹកទៅកាន់ច្រកសមុទ្រ Hormuz ដើម្បីរួមដៃជាមួយអាមេរិក និងអ៊ីស្រាអែលក្នុងការប្រឈមមុខដាក់គ្នាជាមួយអ៊ីរ៉ង់។

លោក ដូណាល់ ត្រាំ បានសម្តែងការមិនពេញចិត្តយ៉ាងខ្លាំង ដោយលោកហៅអង្គការណាតូថាជា «ខ្លាក្រដាស» ដែលចាំតែយកប្រយោជន៍ពីអាមេរិក ប៉ុន្តែមិនព្រមជួយនៅពេលអាមេរិកត្រូវការ៕

អត្ថបទ៖ សុខ សុវណ្ណ