ព័ត៌មានអន្ដរជាតិ

តើប្រទេសណាខ្លះ ដែលអគ្គលេខាធិការណាតូលើកសរសើរ ព្រោះផ្តល់ជំនួយដល់អ៊ុយក្រែនច្រើន?

បានផុស

២ ខែ មុន

នៅ

ថ្ងៃសុក្រ ២២ ឧសភា ២០២៦

ដោយ

លោក Mark Rutte ប្រធានសម្ព័ន្ធមិត្តណាតូ បានលើកឡើងនៅថ្ងៃព្រហស្បតិ៍ថា សមាជិកណាតូជាច្រើនមិនបានរួមចំណែកគ្រប់គ្រាន់ ដើម្បីជួយផ្គត់ផ្គង់អ៊ុយក្រែនប្រយុទ្ធប្រឆាំងការឈ្លានពានទ្រង់ទ្រាយធំរបស់រុស្ស៊ីនោះទេ។

យោងតាមភ្នាក់ងារសារព័ត៌មាន AFP ផ្សាយថ្ងៃទី២១ ខែឧសភា ឆ្នាំ២០២៦ លោក Rutte ប្រាប់អ្នកយកព័ត៌មាននៅទីក្រុង Helsingborg ប្រទេសស៊ុយអែត មុនកិច្ចប្រជុំរដ្ឋមន្ត្រីការបរទេសណាតូថា៖ « ឥឡូវនេះជំនួយសម្រាប់អ៊ុយក្រែន ពីសមាជិកណាតូមិនសូម្បីទទួលស្មើគ្នាទេ»។

លោក Mark Rutte ប្រធានសម្ព័ន្ធមិត្តណាតូ. រូបភាព៖ AFP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លើកឡើងថា៖ « មានប្រទេសមួយចំនួនជួយច្រើន រួមទាំងប្រទេសស៊ុយអែតដែលពិតជាកំពុងប្រឹងប្រែងហួសពីសមត្ថភាពរបស់ខ្លួនទាក់ទងនឹងការគាំទ្រអ៊ុយក្រែននិងប្រទេសដទៃទៀតដូចជា កាណាដា និងអាល្លឺម៉ង់ ហូឡង់ ដាណឺម៉ាក ន័រវែស និងប្រទេសមួយចំនួនទៀត»។

លោកបន្ថែមថា៖ « ប៉ុន្តែក៏មានប្រទេសជាច្រើនដែលមិនបានចំណាយគ្រប់គ្រាន់ទាក់ទងនឹងការគាំទ្រដល់ប្រទេសអ៊ុយក្រែនសោះ»។

កាលពីសប្តាហ៍មុន លោក Rutte ស្នើឱ្យសម្ព័ន្ធមិត្តគួរតែយកផលិតផលក្នុងស្រុកសរុប ០.២៥ភាគរយរបស់ពួកគេទៅជួយអ៊ុយក្រែន។

យោងតាមសារព័ត៌មាន Politico សំណើនោះអាចជាជំនួយបន្ថែមរាប់សិបពាន់លានដុល្លារ តែប្រឈមនឹងការប្រឆាំងយ៉ាងខ្លាងពីប្រទេសសមាជិកសំខាន់ៗមួយចំនួន។

លោក Rutte ទទួលស្គាល់កាលពីថ្ងៃព្រហស្បតិ៍ថា៖ « សំណើនេះនឹងមិនបានឯកភាពគ្នាទេ ដូច្នេះវានឹងមិនអាចដំណើរការ។ ប៉ុន្តែយ៉ាងហោចណាស់វាបានចាប់ផ្តើមការជជែកវែកញែករវាងសម្ព័ន្ធមិត្ត ថាប្រសិនបើយើងទាំងអស់គ្នាកំពុងចង់ជួយអ៊ុយក្រែន ត្រូវតែធ្វើឱ្យប្រាកដថាខ្លួននៅតែស្ថិតក្នុងសមរភូមិឱ្យខ្លាំងតាមដែលអាចធ្វើទៅបាន ហើយនាំការប្រយុទ្ធទៅរកសន្តិភាព នោះជាអ្វីដែលយើងទាំងអស់គ្នាត្រូវតែចូលរួមដោយស្មើភាពគ្នា»៕

សម្រួល៖ ណឺ មិនា