ត្រាំ ប្រកាសថា កម្លាំងទ័ពអាមេរិក នៅតែព័ទ្ធជុំវិញអ៊ីរ៉ង់ រហូតដល់កិច្ចព្រមព្រៀងពិតប្រាកដ ត្រូវបានអនុវត្ត

ដ្បិតតែអាមេរិកនិងអ៊ីរ៉ង់ ឈានដល់បទឈប់បាញ់ ធ្វើឲ្យសង្គ្រាមមជ្ឈិមបូព៌ា ហាក់ធូរស្បើយបន្តិចក៏ពិតមែន ប៉ុន្តែកិច្ចព្រមព្រៀងនោះ នៅតែផុយស្រួយ ហើយឥឡូវ លោក ដូណាល់ ត្រាំ ប្រកាសថា កងកម្លាំងសហរដ្ឋអាមេរិកនឹងនៅតែបន្តឈរជើងតាមគោលដៅដដែល ព័ទ្ធជុំវិញប្រទេសអ៊ីរ៉ង់ រហូតដល់កិច្ចព្រមព្រៀងពិតប្រាកដ ត្រូវបានអនុវត្តតាម។

ជាការគំរាមទៅអ៊ីរ៉ង់ ឲ្យអនុវត្តតាមបទឈប់បាញ់, ប្រធានាធិបតីអាមេរិក បង្ហោះសារលើបណ្តាញសង្គម Truth Social នៅថ្ងៃព្រហស្បតិ៍ទី៩ខែមេសាឆ្នាំ២០២៦ថា៖ «រាល់នាវា, យន្តហោះ និងយោធាសហរដ្ឋអាមេរិកទាំងអស់ រួមជាមួយគ្រាប់រំសេវ គ្រឿងសព្វាវុធបន្ថែម និងអ្វីៗផ្សេងទៀតដែលសមស្រប និងចាំបាច់ សម្រាប់ការតាមកម្ទេច និងបំផ្លាញសត្រូវដែលកំពុងតែចុះខ្សោយស្រាប់ឲ្យខ្ទេចខ្ទីនោះ នឹងបន្ត នៅនឹងកន្លែង ទាំងក្នុងនិងជុំវិញប្រទេសអ៊ីរ៉ង់ រហូតទាល់តែកិច្ចព្រមព្រៀងពិតប្រាកដដែលសម្រេចបាននោះ ត្រូវបានគោរពតាមទាំងស្រុង»។

លោកបន្តថា៖ បើមិនអនុវត្តតាមកិច្ចព្រមព្រៀង ការបាញ់ប្រហារនឹងចាប់ផ្តើមដែលនឹងកាន់តែធំ កាន់តែជឿនលឿន និងខ្លាំងក្លាជាងអ្វីដែលពិភពលោកធ្លាប់បានឃើញពីមុនមក។ ក្នុងពេលជាមួយគ្នានេះ កងទ័ពដ៏អស្ចារ្យរបស់អាមេរិកកំពុងតែត្រៀមគ្រឿងយុទ្ធភណ្ឌ និងសម្រាក ដើម្បីរង់ចាំមើលទៅមុខ ចំពោះការដណ្តើមជ័យជម្នះបន្ទាប់របស់ខ្លួន។

ជុំវិញបទឈប់បាញ់នេះដែរ អនុ​ប្រធានាធិបតី​អាមេរិក JD Vance បានព្រមានខ្លាំងៗទៅអីរ៉ង់ ថា កុំ​ឲ្យ​ធ្វើរឿង «ល្ងង់ខ្លៅ» ព្រោះតែការវាយប្រហាររបស់អ៊ីស្រាអែលនៅប្រទេសលីបង់ឲ្យសោះ។

លោក JD Vance បញ្ជាក់យ៉ាងច្បាស់ៗថា សហរដ្ឋអាមេរិកមិនដែល​យល់ស្រប​ថា អ៊ីស្រាអែលត្រូវតែបញ្ឈប់ការវាយប្រហារនៅលីបង់ ក្នុងក្របខណ្ឌនៃកិច្ចព្រមព្រៀងឈប់បាញ់នេះឡើយ។ បើអីរ៉ង់ចង់​ឲ្យ​ការចរចានេះរលាយសាបសូន្យព្រោះតែរឿងលីបង់ ដែលមិនពាក់ព័ន្ធនឹងខ្លួនសោះនោះ វាក៏ជាជម្រើសរបស់អីរ៉ង់ដែរ ប៉ុន្តែវាជាជម្រើសដ៏ខុសឆ្គងបំផុត។

យ៉ាង​ណាមិញ ភាពចម្រូងចម្រាសបានកើតឡើងនៅត្រង់ថា តើកិច្ចព្រមព្រៀងនេះគ្របដណ្តប់ដល់ប្រទេសលីបង់ដែរឬទេ? កាលពីថ្ងៃពុធ រដ្ឋមន្ត្រីការបរទេសអីរ៉ង់ Abbas Araghchi បានលើកយកសេចក្តីថ្លែងការណ៍របស់នាយករដ្ឋមន្ត្រីប៉ាគីស្ថាន ដែលជាអ្នកសម្របសម្រួលការឈប់បាញ់នេះមកបង្ហាញ ដោយបញ្ជាក់ថា លីបង់គឺស្ថិតក្នុងកិច្ចព្រមព្រៀងនេះដែរ៕

អត្ថបទ៖ សុខ សុវណ្ណ