អ៊ីរ៉ង់ទារ ៣០០ពាន់លានដុល្លារពីអាមេរិក ដូរនឹងការបញ្ចប់សង្គ្រាម

យោងតាមសេចក្ដី​ព្រាងកិច្ចព្រមព្រៀងបឋមមួយ ដែលបានលេចធ្លាយពីប្រព័ន្ធផ្សព្វផ្សាយរដ្ឋអ៊ីរ៉ង់ និង​ត្រូវ​បាន​ចុះផ្សាយ​ដោយ​សារព័ត៌មាន Independent កាលពី​ថ្ងៃទី​១២ ខែមិថុនា ឆ្នាំ​២០២៦ ទីក្រុងតេហេរ៉ង់ បានទាមទារឱ្យសហរដ្ឋអាមេរិក និងសម្ព័ន្ធមិត្តបង់ប្រាក់សំណងសង្គ្រាម និងជំនួយស្តារប្រទេសឡើងវិញយ៉ាងហោចណាស់ ៣០០ពាន់លានដុល្លារ ព្រមទាំងបញ្ចេញ​ទ្រព្យសម្បត្តិបង្កក ២៤ពាន់លានដុល្លារទៀតផង ដើម្បីជាថ្នូរនឹងការបញ្ចប់សង្គ្រាម។

យ៉ាង​ណាមិញ អ៊ីរ៉ង់ដាច់ខាតមិនព្រមបោះបង់សិទ្ធិគ្រប់គ្រងលើច្រកសមុទ្រយុទ្ធសាស្ត្រហ័រមូស (Hormuz) ដែលខ្លួនបានក្តោបក្តាប់តាំងពីសង្គ្រាមផ្ទុះឡើង កាលពីចុងខែកុម្ភៈនោះឡើយ។

ព័ត៌មាននេះ បានលេចឡើងចំពេលមានការរំពឹងទុកថា អនុប្រធានាធិបតីអាមេរិក លោក JD Vance នឹងធ្វើដំណើរទៅកាន់​ទីក្រុងហ្សឺណែវ ដើម្បីចុះហត្ថលេខាលើកិច្ចព្រមព្រៀងបឋម មុនពេលកិច្ចប្រជុំក្រុមប្រទេស G7 ចាប់ផ្តើមនា​សប្តាហ៍ក្រោយ។ តាមពិតទៅ ឯកសារដែលបានលេចធ្លាយនេះ គ្រាន់តែជាកិច្ចព្រមព្រៀងយោគយល់គ្នា ពោលគឺគ្រាន់តែជាការសន្យាថានឹងបន្តចរចាគ្នាប៉ុណ្ណោះ មិនទាន់ជាកិច្ចព្រមព្រៀងសន្តិភាពពេញលេញនោះឡើយ។

ភ្លាមៗនោះ លោកប្រធានាធិបតី ដូណាល់ ត្រាំ បានចេញមុខច្រានចោលដំណឹង​នេះ​ ដោយ​ថា ព័ត៌មានដែលអ៊ីរ៉ង់ផ្សាយមិនមែនជាការពិត​ឡើយ។

មែនទែន​ទៅ បច្ចុប្បន្ន ភាគីទាំងពីរ ត្រូវបានបង្ខំឱ្យមកអង្គុយតុចរចា ដោយសារតែវិបត្តិសេដ្ឋកិច្ចរៀងៗខ្លួន ពោលគឺខណៈពេលដែលអាមេរិកឈឺក្បាលរឿងតម្លៃហ្គាស និងប្រេងឡើងថ្លៃព្រោះតែអ៊ីរ៉ង់បិទច្រកសមុទ្រ អ៊ីរ៉ង់ឯណោះវិញក៏កំពុងតែដង្ហក់យ៉ាងខ្លាំង ដោយសារការបិទខ្ទប់ផ្លូវទឹកពីសំណាក់កងទ័ពជើងទឹកអាមេរិក។

ទោះជាយ៉ាងណា ប្រសិនបើកិច្ចព្រមព្រៀងនេះ ត្រូវបានចុះហត្ថលេខាមែន លោក ត្រាំ ច្បាស់ជាប្រឈមមុខនឹងការរិះគន់យ៉ាងចាស់ដៃ ពីអ្នកនយោបាយអាមេរិកទាំងពីរគណបក្ស ព្រោះវាហាក់ដូចជាការផ្តល់សម្បទានដ៏ធំធេងទៅឱ្យអ៊ីរ៉ង់ ដើម្បីដូរយកត្រឹមតែការសន្យាថានឹងចរចាប៉ុណ្ណោះ ខណៈដែលនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ក៏បានប្រកាសរួចហើយថា អ៊ីស្រាអែលមិនបាន​ដឹងឮ ឬពាក់ព័ន្ធនឹងកិច្ចព្រមព្រៀងបឋមនេះឡើយ តែ​​ទាមទារ​យ៉ាង​កំហិត​ឱ្យលោក ត្រាំ ធានាថា អ៊ីរ៉ង់ត្រូវតែបោះបង់អាវុធនុយក្លេអ៊ែរទាំងស្រុង នៅក្នុងកិច្ចព្រមព្រៀងចុងក្រោយ៕

ប្រែសម្រួល៖ ឈាង