សង្គ្រាមមជ្ឈិមបូព៌ា កំពុងដុត​បំផ្លាញ​ប្រជាប្រិយភាពបក្សលោក ត្រាំ មុនការបោះឆ្នោតពាក់កណ្ដាលអាណត្តិ

គណបក្សសាធារណរដ្ឋរបស់លោកប្រធានាធិបតី ដូណាល់ ត្រាំ កំពុងតែធ្លាក់ក្នុងស្ថានភាពព្រួយបារម្ភយ៉ាងខ្លាំង ខណៈដែលការបោះឆ្នោតពាក់កណ្ដាលអាណត្តិ ជិតចូលមកដល់នៅចុងឆ្នាំ២០២៦ នេះ។ មូលហេតុចម្បង ដែលកំពុងទាញទម្លាក់ប្រជាប្រិយភាពរបស់លោក ត្រាំ និងបក្ស គឺដោយសារតែការមិនពេញចិត្តរបស់ប្រជាជនអាមេរិកទៅលើការសម្រេចចិត្តចូលរួម ក្នុងសង្គ្រាមនៅតំបន់មជ្ឈិមបូព៌ា ជាពិសេសគឺជម្លោះយោធាជាមួយប្រទេសអ៊ីរ៉ង់។

យោងតាមការស្ទង់មតិចុងក្រោយបង្អស់ដែលចេញផ្សាយដោយ The New York Times អត្រាគាំទ្ររបស់លោក ដូណាល់ ត្រាំ បានធ្លាក់ចុះមកនៅត្រឹម ៣៧% ប៉ុណ្ណោះ ដែលនេះជាចំណុចទាបបំផុតមួយ ចាប់តាំងពីលោកបានវិលត្រឡប់មកកាន់តំណែងនៅក្នុងអាណត្តិទីពីរនេះ។ ការស្ទង់មតិនេះ បានគូសបញ្ជាក់ថា ម្ចាស់ឆ្នោតអាមេរិកភាគច្រើនមានអារម្មណ៍ធុញទ្រាន់ និងមិនពេញចិត្តចំពោះការបន្តអូសបន្លាយនៃសង្គ្រាម ដែលនាំមកនូវផលប៉ះពាល់អវិជ្ជមានជាច្រើនដល់សេដ្ឋកិច្ចជាតិ។

សង្គ្រាមនៅមជ្ឈិមបូព៌ាមិនត្រឹមតែបង្កជាក្តីបារម្ភផ្នែកសន្តិសុខពិភពលោកប៉ុណ្ណោះទេ ប៉ុន្តែវាបានជះឥទ្ធិពលផ្ទាល់ដល់កាបូបលុយរបស់ប្រជាជនអាមេរិកម្នាក់ៗ។ របាយការណ៍ស្ទង់មតិរួមគ្នារបស់ NPR និង Marist Poll បានរកឃើញថា ជិត ៦០% នៃប្រជាពលរដ្ឋអាមេរិកយល់ឃើញថា សកម្មភាពយោធារបស់អាមេរិកនៅអ៊ីរ៉ង់ផ្ដល់ផល​អាក្រក់​ច្រើនជាងផលល្អ។ អ្វីដែលរឹតតែធ្ងន់ធ្ងរនោះ គឺសង្គ្រាមនេះបានធ្វើឱ្យតម្លៃប្រេងឥន្ធនៈហក់ឡើងខ្ពស់ និងបង្កជាវិបត្តិអតិផរណា ដែលជាចំណុចខ្សោយដ៏ធំមួយ ធ្វើឱ្យអ្នកបោះឆ្នោតឯករាជ្យដែល​មិនលំអៀងទៅខាងណា (Independent Voters) ចាប់ផ្ដើមងាកចេញពីគណបក្សសាធារណរដ្ឋ។

ក្រៅពីប្រជាពលរដ្ឋ សូម្បីតែសមាជិកសភាមកពីបក្សសាធារណរដ្ឋខ្លួនឯង ក៏ចាប់ផ្ដើមបង្ហាញការប្រឆាំងនឹងលោក ត្រាំ ផងដែរ។ យោងតាមអត្ថបទវិភាគរបស់វិទ្យាស្ថាន Brookings និងសារព័ត៌មាន The Guardian សមាជិកសភារបស់បក្សសាធារណរដ្ឋមួយចំនួន បាន​​បោះឆ្នោតគាំទ្រសេចក្តីសម្រេចកំណត់អំណាចសង្គ្រាមរបស់ប្រធានាធិបតី (War Powers Resolution) រួមជាមួយខាងគណបក្សប្រជាធិបតេយ្យ។ ពួកគេធ្វើបែបនេះ ក៏ព្រោះតែខ្លាចរងឥទ្ធិពលអាក្រក់ និងត្រូវបាត់បង់អាសនៈ នៅក្នុងការបោះឆ្នោតពាក់កណ្ដាលអាណត្តិខាងមុខ ប្រសិនបើពួកគេនៅតែបន្តឈរខាងលោក ត្រាំ ក្នុងរឿងសង្គ្រាមនេះ។

ដើមឡើយ លោក ដូណាល់ ត្រាំ ធ្លាប់បានឃោសនាស្វែងរកសំឡេងឆ្នោត ដោយសន្យាថានឹងនាំអាមេរិកចេញពី «សង្គ្រាមដែលមិនចេះចប់មិនចេះហើយ» ប៉ុន្តែការធ្លាក់ចូលក្នុងជម្លោះនៅមជ្ឈិមបូព៌ានាពេលនេះ កំពុងតែធ្វើឱ្យអ្នកគាំទ្ររបស់លោកមួយចំនួនមានការខកចិត្ត។

បច្ចុប្បន្ន គណបក្សប្រជាធិបតេយ្យដែលជាបក្សប្រឆាំង កំពុងតែទាញយកផលប្រយោជន៍នយោបាយយ៉ាងខ្លាំងពីបញ្ហានេះ ដោយការផ្សារភ្ជាប់រឿងសង្គ្រាមទៅនឹងបញ្ហាតម្លៃទំនិញឡើងថ្លៃ ដើម្បីទាក់ទាញចិត្តអ្នកបោះឆ្នោត។ បើរដ្ឋបាលរបស់លោក ដូណាល់ ត្រាំ មិនអាចរកផ្លូវចេញ​តាមរយៈកិច្ចព្រមព្រៀងសន្តិភាព ឬបទឈប់បាញ់ណាមួយឱ្យបានឆាប់រហ័សនោះទេ គណបក្សសាធារណរដ្ឋ អាចនឹងប្រឈមមុខនឹងការបាត់បង់សំឡេងភាគច្រើននៅក្នុងសភាទាំងពីរ ដែលវានឹងក្លាយជាឧបសគ្គដ៏ធំសម្រាប់ការដឹកនាំរបស់លោក ត្រាំ នៅក្នុងអាណត្តិដែលនៅសេសសល់៕

អត្ថបទ៖ ឈាង