ថៃ និងមីយ៉ាន់ម៉ា យល់ព្រមបើកផ្លូវពាណិជ្ជកម្មព្រំដែនឡើងវិញ

ថៃ និងមីយ៉ាន់ម៉ា បាន​ឯកភាពគ្នា​បើកច្រកទ្វារព្រំដែនមីយ៉ាវ៉ាឌី-ម៉េសុត (Myawaddy–Mae Sot) ឡើងវិញ ដែលជាផ្នែកមួយនៃកិច្ចព្រមព្រៀង​លើវិស័យសំខាន់ៗចំនួន ៣ នៃកិច្ចសហប្រតិបត្តិការរវាងប្រទេសទាំង២។ នេះបើតាមការចុះផ្សាយរបស់សារព័ត៌មាន Thai Enquirer នាព្រឹកថ្ងៃព្រហស្បតិ៍ (២៣ មេសា) នេះ។

ការព្រមព្រៀងគ្នាដដែល សម្រេចឡើងក្នុងអំឡុង​ទស្សនកិច្ចជាផ្លូវការរបស់ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ (Sihasak Phuangketkeow) ​នៅថ្ងៃទី ២១-២២ មេសា កន្លងទៅ។

​លោក ស៊ីហាសាក់ បានមាន​និយាយថា ដំណើរទស្សនកិច្ច​របស់លោក បានបង្ហាញពីវឌ្ឍនភាពវិជ្ជមានក្នុងទំនាក់ទំនងទ្វេភាគី បន្ទាប់ពីកិច្ចពិភាក្សាជាមួយថ្នាក់ដឹកនាំកំពូលរបស់មីយ៉ាន់ម៉ា រួមទាំងមេដឹកនាំយោធា លោក​ មីន អ៊ុងឡាំង (Min Aung Hlaing)។

លោកថា ការបើកច្រកទ្វារព្រំដែនមីយ៉ាវ៉ាឌី-ម៉េសុត ​​ជាថ្មីតាមការគ្រោងទុកនោះ​ នឹងធ្វើឱ្យពាណិជ្ជកម្មព្រំដែន​ឡើងវិញ ព្រោះច្រកនេះ រួមចំណែករហូតដល់ ៨០% នៃ​ពាណិជ្ជកម្មសរុបរវាងប្រទេសទាំង២។

ជាមួយគ្នានោះ លោក ស៊ីហាសាក់ ថៃលើកទឹកចិត្តដល់ការវិនិយោគ និងផ្តល់ការគាំទ្រដល់ការអភិវឌ្ឍលើគ្រប់វិស័យដូចជា កសិកម្ម សុខាភិបាល និងហេដ្ឋារចនាសម្ព័ន្ធ។ ធុរកិច្ចថៃបានបង្ហាញចំណាប់អារម្មណ៍ក្នុងការពង្រីកប្រតិបត្តិការនៅ​មីយ៉ាន់ម៉ាក្រោមរដ្ឋាភិបាលថ្មីរបស់ខ្លួន។

គួរគូសបញ្ជាក់ថា មីយ៉ាន់ម៉ាបាន​បញ្ជាឱ្យបិទច្រកព្រំដែនមីយ៉ាវ៉ាឌី-ម៉េសុតកាលពីខែសីហាឆ្នាំមុន ក្រោម​​បញ្ជាពីរដ្ឋាភិបាល​យោធាមីយ៉ាន់ម៉ា ​ដើម្បីផ្លាស់ប្ដូរលំហូរប្រាក់ចំណូលពាណិជ្ជកម្មតាមព្រំដែនទៅកាន់រដ្ឋ ជាជាងក្រុមប្រដាប់អាវុធ​ក្នុងតំបន់ដែលប្រឆាំងរដ្ឋាភិបាល ដូចជា ​ដូចជា KNU និង PDF ជាដើម។

ដោយឡែក កិច្ចសហប្រតិបត្តិការ ២ ទៀត ដែលសម្រេចឡើងអំឡុងដំណើរទស្សនកិច្ចដដែល រួមមាន​ ​​ការដោះស្រាយផលប៉ះពាល់ពីជម្លោះផ្ទៃក្នុងរបស់មីយ៉ាន់ម៉ា និងការបង្កើនកិច្ចខិតខំប្រឹងប្រែងរួមគ្នា ដើម្បីដោះស្រាយបញ្ហាចុះអ័ព្ទផ្សែងឆ្លងដែន។

ជុំវិញបញ្ហាសន្ដិសុខដោយសារតែជម្លោះក្នុងស្រុកមីយ៉ាន់ម៉ាវិញ ​​លោក លោក ស៊ីហាសាក់ បានលើកឡើងពីការព្រួយបារម្ភអំពីផលប៉ះពាល់ចូលមកក្នុងទឹកដីថៃ ដោយជំរុញឱ្យមានវិធានការទប់ស្កាត់បញ្ហានេះ​ ខណៈ​បានបញ្ជាក់ជាថ្មីថា ​ថៃនឹង «ឆ្លើយតប» ទៅនឹងការរំលោភបំពានណាមួយលើអធិបតេយ្យភាពរបស់ខ្លួន។

​ប្រទេសទាំង២ ក៏បានព្រមព្រៀងគ្នាក្នុងការបង្កើនកិច្ចសហប្រតិបត្តិការប្រឆាំងនឹងឧក្រិដ្ឋកម្មឆ្លងដែន ជាពិសេសបណ្តាញក្រុមឆបោក​ ផងដែរ ខណៈមីយ៉ាន់ម៉ាបាន​បង្ហាញការត្រៀមខ្លួនក្នុងការដោះស្រាយបញ្ហាអ័ព្ទផ្សែងឆ្លងដែនជាមួយថៃ ដែលបង្កជាកង្វល់បរិស្ថាន និងការបំពុលខ្យល់កាន់តែអាក្រក់ទៅៗ។

លើសពីនោះ លោក ស៊ីហាសាក់ ថា ប្រទេសថៃគាំទ្រការចូលរួមឡើងវិញរបស់មីយ៉ាន់ម៉ា​ក្នុងអាស៊ាន ក្រោមការឯកភាពគ្នា ៥ ចំណុចរបស់ប្លុក ​និង​ជំរុញឱ្យមានវឌ្ឍនភាពលើសន្តិភាព និងការផ្សះផ្សាជាតិមីយ៉ាន់ម៉ា​ ​ខណៈថា ដំណើរទស្សនកិច្ចរបស់លោក មានគោលបំណងការពារផលប្រយោជន៍ជាតិរបស់​ថៃ ជាពិសេសស្ថិរភាពព្រំដែន និងការតភ្ជាប់សេដ្ឋកិច្ច៕