ព័ត៌មានអន្ដរជាតិ

នាយក IAEA ជំរុញឱ្យមេដឹកនាំពិភពលោក ឈរលើសន្ធិសញ្ញាមិនរីកសាយភាយនុយក្លេអ៊ែរ

បានផុស

២ ខែ មុន

នៅ

ថ្ងៃអង្គារ ២៨ មេសា ២០២៦

ដោយ

ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិ (IAEA) ជំរុញឱ្យមេដឹកនាំពិភពលោក ឈរយ៉ាងរឹងមាំនៅពីក្រោយសន្ធិសញ្ញាមិនរីកសាយភាយអាវុធនុយក្លេអ៊ែរ (NPT) ដ៏សំខាន់ ដែលរចនាឡើងដើម្បីទប់ស្កាត់ការរីករាលដាលអាវុធនុយក្លេអ៊ែរដ៏គួរឲ្យភ័យខ្លាច ខណៈអនុសញ្ញាអន្តរជាតិនេះ បានពិនិត្យឡើងវិញនៅក្នុងកិច្ចប្រជុំនៅឯមហាសន្និបាតអង្គការសហប្រជាជាតិ(UN)។ នេះបើយោងតាមសារព័ត៌មានតួកគី Anadolu ផ្សាយថ្ងៃទី២៨ ខែមេសា ឆ្នាំ២០២៦ ។

បេក្ខជនប្រជែងតំណែងអគ្គលេខាធិការអង្គការសហប្រជាជាតិ លោក Rafael Grossi បច្ចុប្បន្នអគ្គនាយកទីភ្នាក់ងារថាមពលបរមាណូអន្តរជាតិ (IAEA) ប្រាប់អ្នកតំណាងប្រទេសនានាថា៖ « យើងនៅទីនេះដើម្បីពិនិត្យឡើងវិញនូវឧបករណ៍សំខាន់បំផុតមួយក្នុងច្បាប់អន្តរជាតិ និងក្នុងនយោបាយអន្តរជាតិទាំងមូល»។

លោក Rafael Grossi អគ្គនាយកទីភ្នាក់ងារថាមពលអាតូមិកអន្តរជាតិ (IAEA). រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរកត់សម្គាល់ថាមានប្រទេសចំនួន១៩១ បានពឹងផ្អែកលើកិច្ចព្រមព្រៀងនេះ ចាប់តាំងពីចូលជាធរមាននៅឆ្នាំ ១៩៧០។ដោយអ្នកជំនាញហៅសន្ធិសញ្ញានេះថា ជាពន្លឺភ្លើងនៃភាពប្រាកដប្រជាក្នុងពិភពលោកដែលមានបទដ្ឋានអន្តរជាតិកាន់តែស្តើងទៅៗ។

លោក Grossi និយាយថា៖ « កិច្ចព្រមព្រៀងនេះនៅតែជាចំណុចស្ថិរភាពដ៏កម្រមួយ ពេលមានភាពតានតឹងសកល សង្គ្រាមនិងការបែកបាក់អន្តរជាតិកើនឡើង»។

លោកផ្តល់សញ្ញាជោគជ័យមួយលើកិច្ចខិតខំប្រឹងប្រែង ដើម្បីបញ្ឈប់ការរីករាលដាលនៃអាវុធនុយក្លេអ៊ែរ និងលើកឡើងថា៖ « ពិភពលោក ជិតឈានដល់សកលភាពមួយ ដោយប្រទេសសមាជិកទាំងអស់ បានចុះហត្ថលេខាលើកិច្ចព្រមព្រៀងត្រួតពិនិត្យនុយក្លេអ៊ែរអន្តរជាតិ»។

លោក Grossi ក៏បានបង្ហាញពីការកើនឡើងយ៉ាងខ្លាំង នៅក្នុងប្រទេសដែលងាកទៅរកថាមពលនុយក្លេអ៊ែរ ហើយកត់សម្គាល់ថា៖ « តម្រូវការកំពុងកើនឡើង នៅគ្រប់ទ្វីប វាលែងត្រូវបានកំណត់ចំពោះក្រុមតូចមួយនៃមហាអំណាចនុយក្លេអ៊ែរប្រពៃណីទៀតហើយ»។

លោកមានប្រសាសន៍ថា៖ « យើងឃើញវាស្ទើរតែរាល់ថ្ងៃ ពីប្រទេសបង់ក្លាដែស ដល់ប្រទេសតួកគី ដល់ប្រទេសអេហ្ស៊ីប។ ប្រទេសជាច្រើនកំពុងឈានទៅរកការកេងប្រវ័ញ្ចនុយក្លេអ៊ែរ»។

លោកសង្កត់ធ្ងន់លើគោលការណ៍គ្រឹះនៃសន្ធិសញ្ញានេះថា៖ « ប្រទេសមួយចំនួនតូចមានអាវុធនុយក្លេអ៊ែរគឺប្រសើរជាងប្រទេសជាច្រើនដែលមានវាដែរ។ ការរំសាយអាវុធនុយក្លេអ៊ែរ នៅតែជាការប្តេជ្ញាចិត្តរបស់យើង ហើយបច្ចេកវិទ្យានុយក្លេអ៊ែរត្រូវតែសម្រាប់ទាំងអស់គ្នា និងវានៅតែមានសុពលភាពដូចថ្ងៃដែលបានព្រាងឡើងជាលើកដំបូង»៕

ប្រែសម្រួល៖ ណឺ មិនា