ព័ត៌មានជាតិ

រដ្ឋបាលសង្កាត់ចោមចៅទី ៣ សហការជាមួយមន្ត្រីសាលារាជធានី ចុះបូមស្តារប្រព័ន្ធលូតាមបណ្តោយផ្លូវសហព័ន្ធរុស្សី

បានផុស

២ ខែ មុន

នៅ

ថ្ងៃពុធ ២៩ មេសា ២០២៦

ដោយ

កាលពីព្រឹកថ្ងៃទី ២៩ ខែមេសា ឆ្នាំ ២០២៦ នេះ រដ្ឋបាលសង្កាត់ចោមចៅទី ៣ ដឹកនាំដោយ លោក វ៉ា សាវឿន ចៅសង្កាត់ និង លោក សុទ្ធ សុជាតិ ចៅសង្កាត់រងទី ១ បានសហការជាមួយមន្ត្រីសាលារាជធានីភ្នំពេញ ចុះបូមស្តារ សម្អាតប្រព័ន្ធលូ ជូនប្រជាពលរដ្ឋ នៅតាមបណ្តោយផ្លូវសហព័ន្ធរុស្សី ភូមិព្រៃជីសាក់ សង្កាត់ចោមចៅទី ៣ ខណ្ឌពោធិ៍សែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ា សាវឿន បានឲ្យដឹងថា ដើម្បីកុំឲ្យមានការស្ទះចរន្តទឹកហូរ និងបញ្ចៀសការជន់លិចនារដូវវស្សាខាងមុខនេះ លោកបានស្នើសុំរថយន្តបូមលូ ១ គ្រឿង ពីសាលារាជធានីភ្នំពេញ មកធ្វើការបូម ក៏ដូចជាបាញ់លាងសម្អាតកាកសំណល់ភក់ដីដែលកកក្តាំងនៅក្នុងប្រព័ន្ធលូចេញ។

លោកចៅសង្កាត់ បន្តថា ការបូមស្តារប្រព័ន្ធលូខាងលើនេះ ធ្វើឡើងដោយចាប់ពីមុខអតីតព្រលានចាស់ ព្រំប្រទល់ជាមួយសង្កាត់កាកាបទី ២ រហូតទៅដល់ស្ពានអាកាសចោមចៅ លើកំណាត់ផ្លូវសហព័ន្ធរុស្ស៉ី គោលបំណងបញ្ចៀសការជន់លិចនារដូវវស្សា និងមិនឲ្យប៉ះពាល់លំនៅឋានប្រជាពលរដ្ឋក្នុងមូលដ្ឋាន។

ជាមួយគ្នានេះ លោកចៅសង្កាត់ តំណាងឲ្យ រដ្ឋបាលសង្កាត់ចោមចៅទី ៣ ទាំងមូល សូមអរគុណដល់ លោក សាំង ពិសិដ្ឋ ប្រធានមន្ទីរសាធារណការ និងដឹកជញ្ជូន និង លោក ឃួង ស្រេង អភិបាល នៃគណៈអភិបាលរាជធានីភ្នំពេញ ដែលបានផ្តល់រថយន្តសម្រាប់បូមលូទាន់ពេលវេលា។ ក្នុងនោះ លោកក៏បានអំពាវនាវដល់ប្រជាពលរដ្ឋទាំងអស់ សូមមេត្តាជួយថែរក្សាបរិស្ថានឲ្យបានស្អាតទាំងអស់គ្នា ចៀសវាងបោះចោលគ្មានសណ្តាប់ធ្នាប់ ងាយនឹងហើរ ឬ ធ្លាក់ចូលប្រព័ន្ធលូ បង្កការកកស្ទះចរន្តទឹកហូរ៕
អត្ថបទ ៖ សុខា