ព័ត៌មានអន្ដរជាតិ

យោធាអាមេរិកស្ទាក់ចាប់នាវាអ៊ីរ៉ង់មួយគ្រឿងដែលព្យាយាមទម្លុះខ្សែទឹក និង បញ្ជូននាវិកទៅប៉ាគីស្ថាន

បានផុស

២ ខែ មុន

នៅ

ថ្ងៃចន្ទ ៤ ឧសភា ២០២៦

ដោយ

នាវាអ៊ីរ៉ង់មួយគ្រឿងត្រូវបានយោធាសហរដ្ឋអាមេរិកស្ទាក់ចាប់ បន្ទាប់ពីព្យាយាមបំបែកការបិទខ្ទប់ផ្លូវទឹកចូលកំពង់ផែអ៊ីរ៉ង់ និងនាំទៅកាន់ប្រទេសប៉ាគីស្ថាន ដើម្បីបញ្ជូនត្រឡប់ទៅប្រទេសអ៊ីរ៉ង់វិញ រួមទាំងក្រុមនាវិកផងដែរ។ នេះបើយោងតាមប្រព័ន្ធផ្សព្វផ្សាយអាមេរិកកាលពីថ្ងៃអាទិត្យ ចុះផ្សាយបន្តដោយសារព័ត៌មានតួកគី Anadolu ថ្ងៃទី៤ ខែឧសភា ឆ្នាំ២០២៦ ដកស្រង់ការប្រកាសរបស់បញ្ជាការកណ្តាលអាមេរិក (CENTCOM)។

ក្រោយជម្លោះរបស់សហរដ្ឋអាមេរិក-អ៊ីស្រាអែល លើអ៊ីរ៉ង់ជាង២ខែកន្លងមកនេះ តម្លៃថាមពលសកលនៅតែបន្តហក់ឡើង ព្រោះអ៊ីរ៉ង់បិទច្រក Hormuz មិនឲ្យនាវាដឹកប្រេងឆ្លងកាត់ ហើយ បន្ទាប់មក អាមេរិកក៏សងសឹកវិញដោយបិទផ្លូវសមុទ្ររបស់អ៊ីរ៉ង់វិញ។ ជម្លោះមិនចាញ់មិនឈ្នះរបស់ភាគីជម្លោះក៏បានបង្កភាពតានតឹងកាន់តែខ្លាំង បើទោះបីជា បទឈប់បាញ់ដ៏ផុយស្រួយនៃប្រទេសទាំងពីរត្រូវបានពន្យារពេលម្តងហើយម្តងទៀត។

នាវា M/V Touska របស់អ៊ីរ៉ង់។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន ABC News បានដកស្រង់សម្តីអ្នកនាំពាក្យ CENTCOM លោក Tim Hawkins ថា៖ « ថ្ងៃនេះ កងកម្លាំងអាមេរិកបានបញ្ចប់ការផ្ទេរសមាជិកនាវិកចំនួន ២២នាក់នៃនាវា M/V Touska ទៅកាន់ប្រទេសប៉ាគីស្ថាន ដើម្បីបញ្ជូនត្រឡប់ទៅប្រទេសអ៊ីរ៉ងវិញ»។

លោក Hawkins បន្ថែមថា អ្នកដំណើរចំនួន ៦នាក់ផ្សេងទៀតត្រូវបញ្ជូនទៅកាន់ប្រទេសក្នុងតំបន់រួចហើយ ដើម្បីបញ្ជូនត្រឡប់ទៅប្រទេសពួកគេវិញកាលពីសប្តាហ៍មុន។

ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា បុគ្គលទាំង៦នាក់នោះ គឺជាសមាជិកគ្រួសាររបស់ក្រុមនាវិកមួយចំនួន ដែលយោធាអាមេរិកស្ទាក់ចាប់។

ទោះបីយ៉ាងណា អង្គភាពបញ្ជាការកណ្តាលអាមេរិកមិនបានឆ្លើយតបទៅនឹងសំណើសុំការបញ្ជាក់លើបញ្ហានេះនោះទេ។ ដោយឡែក អាជ្ញាធរប៉ាគីស្ថាននិងអ៊ីរ៉ង់ក៏មិនទាន់បានបញ្ជាក់ពីរបាយការណ៍នេះដែរ៕

ប្រែសម្រួល៖ ណឺ មិនា