សមិទ្ធផលថ្មីរង្វង់មូលឆ្នាំង កំពុងសាងសង់ក្នុងស្រុករលាប្អៀរ ខេត្តកំពង់ឆ្នាំង

ក្រោមការដឹកនាំរបស់លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង សមិទ្ធផលថ្មីមួយគឺ “រង្វង់មូលឆ្នាំង” ស្ថិតនៅក្នុងស្រុករលាប្អៀរ កំពុងដំណើរការសាងសង់បន្តដើម្បីបន្ថែមសោភ័ណភាព និងលើកកម្ពស់ហេដ្ឋារចនាសម្ព័ន្ធក្នុងតំបន់។

លោក ស៊ុន សុវណ្ណារិទ្ធិ អភិបាលខេត្ត បានថ្លែងថា គម្រោងសាងសង់រង្វង់មូលនេះ ត្រូវបានរំពឹងថានឹងក្លាយជាចំណុចសំខាន់មួយសម្រាប់ការធ្វើចរាចរណ៍ ក៏ដូចជាក្លាយជាគោលដៅទេសចរណ៍ថ្មីមួយសម្រាប់ប្រជាពលរដ្ឋ និងភ្ញៀវទេសចរ ដែលមកទស្សនាខេត្តកំពង់ឆ្នាំង ជាពិសេសស្រុករលាប្អៀរ ដែលជាតំបន់មានប្រវត្តិសាស្ត្រ និងវប្បធម៌សម្បូរបែប។ រង្វង់មូលឆ្នាំងក៏ត្រូវបានរចនាឡើងដោយបង្ហាញអត្តសញ្ញាណនៃខេត្តកំពង់ឆ្នាំង ដែលល្បីល្បាញពីផលិតផលឆ្នាំងដី និងសិប្បកម្មប្រពៃណី។ វាមិនត្រឹមតែជាសំណង់សាធារណៈប៉ុណ្ណោះទេ ប៉ុន្តែជាសញ្ញាបង្ហាញពីការរីកចម្រើន និងការយកចិត្តទុកដាក់លើការអភិវឌ្ឍន៍របស់អាជ្ញាធរខេត្តផងដែរ។

លោកបានអះអាងថា គម្រោងនេះនឹងបញ្ចប់ក្នុងពេលឆាប់ៗខាងមុខ ហើយនឹងនាំមកនូវអត្ថប្រយោជន៍ជាច្រើន ដូចជា ការកែលម្អចរាចរណ៍ ការបង្កើនសោភ័ណភាពទីក្រុង និងជំរុញសេដ្ឋកិច្ចមូលដ្ឋានឲ្យកាន់តែរីកចម្រើន។

ប្រជាពលរដ្ឋក្នុងតំបន់បានសម្តែងការសប្បាយរីករាយ និងគាំទ្រយ៉ាងខ្លាំងចំពោះសមិទ្ធផលថ្មីនេះ ដែលពួកគេជឿជាក់ថា នឹងធ្វើឲ្យស្រុករលាប្អៀរ ក្លាយជាទីកន្លែងកាន់តែទាក់ទាញ និងមានការអភិវឌ្ឍន៍ខ្លាំង៕

អត្ថបទ៖ វ៉ាន់ សេដ្ឋា