ត្រាំ ដាក់សម្ពាធឲ្យ កូរ៉េខាងត្បូង ចូលរួមក្នុងប្រតិបត្តិការយោធានៅច្រក Hormuz

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃទី៤ ខែឧសភា បានអំពាវនាវឲ្យប្រទេសកូរ៉េខាងត្បូង​ដែល​នាវារង​ការ​បំផ្លាញ​ដោយ​អ៊ីរ៉ង់ ចូលរួមក្នុងប្រតិបត្តិការយោធា​ប្រឆាំង​អ៊ីរ៉ង់​​ បន្ទាប់ពីមានការផ្ទុះ និងឆេះលើនាវារបស់កូរ៉េមួយគ្រឿង នៅច្រកសមុទ្រ Hormuz។ ជាការឆ្លើយតប ក្រសួងការពារជាតិរបស់កូរ៉េខាងត្បូង បានរក្សាជំហរប្រុងប្រយ័ត្នខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយពីទីភ្នាក់ងារ chosun ក្រសួង​ការ​ពារ​ជាតិ​កូរ៉េខាងត្បូង​ បានបញ្ជាក់នៅថ្ងៃទី៥ ខែឧសភា នេះ ថា៖ «យើងនឹងពិនិត្យមើលឲ្យបានល្អិតល្អន់នូវគោលជំហររបស់យើង ដោយគិតគូរពីច្បាប់អន្តរជាតិ សុវត្ថិភាពនៃផ្លូវសមុទ្រអន្តរជាតិ សម្ព័ន្ធភាពរវាងកូរ៉េខាងត្បូង និងសហរដ្ឋអាមេរិក ស្ថានភាពសន្តិសុខនៅលើឧបទ្វីបកូរ៉េ និងនីតិវិធីច្បាប់នៅក្នុងស្រុក»។

ក្រសួង​កូរ៉េខា​ងត្បូង​​ បានបន្ថែមថា «កន្លងមក យើងបានចូលរួមយ៉ាងសកម្មនៅក្នុងការពិភាក្សាអន្តរជាតិ ដើម្បីធានាឲ្យបាននូវការធ្វើដំណើរប្រកបដោយសុវត្ថិភាពឆ្លងកាត់ច្រក Hormuz និងបានរក្សាទំនាក់ទំនងយ៉ាងជិតស្និទ្ធជាមួយបណ្តាប្រទេសពាក់ព័ន្ធ រួមទាំងសហរដ្ឋអាមេរិកផងដែរ»។

ទាកទិននឹងហេតុការណ៍នេះដែរ បន្ទាប់ពីលោក ត្រាំ បានសរសេរនៅលើបណ្តាញសង្គមកាលពីថ្ងៃទី៤ ថា អ៊ីរ៉ង់បានបាញ់ប្រហារជាច្រើនលើកទៅលើនាវានៃបណ្តាប្រទេសដែលមិនពាក់ព័ន្ធ រួមទាំងនាវាដឹកទំនិញរបស់កូរ៉េខាងត្បូងផងដែរ ពាក់ព័ន្ធនឹង​ចល័ត​​នាវាដែលទាក់ទងនឹង «ប្រតិបត្តិការសេរីភាព» វាហាក់ដូចជាកូរ៉េខាងត្បូងគួរតែចូលរួមក្នុងប្រតិបត្តិការនេះ។

«ប្រតិបត្តិការសេរីភាព» ដែលលើកឡើងដោយលោកត្រាំ នោះ គឺជាកិច្ចប្រតិបត្តិការរបស់សហរដ្ឋអាមេរិក ក្នុងការអមដំណើរនាវាស៊ីវិលដែលជាប់គាំងនៅក្នុងតំបន់ឈូងសមុទ្រ (ឈូងសមុទ្រពែរ្ស) ឆ្លងកាត់ច្រកសមុទ្រ Hormuz ដោយប្រើប្រាស់យន្តហោះចម្បាំង និងនាវាចម្បាំង ដែលប្រតិបត្តិការនេះបានចាប់ផ្ដើមឡើងកាលពីថ្ងៃទី៤។

នៅដើមថ្ងៃដដែលនោះ មានការផ្ទុះ និងឆេះមួយបានកើតឡើងនៅលើនាវា «HMM Namu-ho» ដែលបង្ហូតទង់ជាតិប្រទេសប៉ាណាម៉ា និងគ្រប់គ្រងដោយក្រុមហ៊ុនដឹកជញ្ជូនរបស់កូរ៉េខាងត្បូង ខណៈពេលដែលនាវានោះកំពុងបោះយុថ្កានៅជិតសហរដ្ឋអាមេរិកអារ៉ាប់ (UAE) ក្នុងច្រកសមុទ្រ Hormuz។ លោក ត្រាំ បានអះអាងថា នេះគឺជា ការវាយប្រហារដោយអ៊ីរ៉ង់ ហើយបានដាក់សម្ពាធឲ្យកូរ៉េខាងត្បូងចូលរួមក្នុងប្រតិបត្តិការនេះឲ្យបាន៕

អត្ថបទ៖ សាង ស្រីល័ក្ខ