ព័ត៌មានអន្ដរជាតិ

អាល្លឺម៉ង់ និងប៉ូឡូញ ឈប់គិតអតីតកាល ងាកមករួមគ្នាក្នុងវិស័យយោធា ក្រោមកិច្ចព្រមព្រៀងការពារជាតិថ្មី

បានផុស

៣២ វិនាទី មុន

នៅ

ថ្ងៃពុធ ១៧ មិថុនា ២០២៦

ដោយ

ប្រទេសអាល្លឺម៉ង់ និងប៉ូឡូញ បានចុះហត្ថលេខាលើកិច្ចព្រមព្រៀងការពារជាតិថ្មីមួយនៅថ្ងៃពុធ នេះ ដោយដាក់អតីតកាលដ៏ស្មុគស្មាញរបស់ពួកគេមួយឡែក ដើម្បីពង្រឹងកិច្ចសហប្រតិបត្តិការយោធាអឺរ៉ុបឡើងវិញ ចំពេលមានភាពតានតឹងកាន់តែខ្លាំងជាមួយរុស្ស៊ី និងភាពមិនប្រាកដប្រជាលើការចូលរួមរបស់សហរដ្ឋអាមេរិកនៅអឺរ៉ុប។

សារព័ត៌មាន EuroNews ផ្សាយនៅថ្ងៃទី១៧ ខែមិថុនា ឆ្នាំ២០២៦ ទំនាក់ទំនងរវាងប្រទេសជិតខាងទាំងពីរក្នុងរយៈពេលប៉ុន្មានឆ្នាំចុងក្រោយស្តែងឱ្យឃើញយ៉ាងច្បាស់ពីការសហការគ្នា បន្ទាប់ពីសង្គ្រាមទ្រង់ទ្រាយធំរបស់រុស្ស៊ីលើអ៊ុយក្រែនឆ្នាំ២០២២ និងការឡើងកាន់អំណាចរបស់រដ្ឋាភិបាលសេរី នៅប៉ូឡូញឆ្នាំ២០២៣ ។

លោក Friedrich Merz និង លោក Donald Tusk ។ រូបភាព៖ TABLE

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខណៈសហរដ្ឋអាមេរិកកំពុងថ្លឹងថ្លែងពីការកាត់បន្ថយវត្តមានយោធាមួយផ្នែករបស់ខ្លួននៅអឺរ៉ុប។ ការណ៍នេះប្រទេសប៉ូឡូញចង់ធានាថា សម្ព័ន្ធមិត្តសំខាន់ៗរបស់អឺរ៉ុបនៅតែដើរតួនាទីកាន់តែធំក្នុងការការពារផ្នែកខាងកើតនៃទ្វីបនេះ។

អធិការបតីអាល្លឺម៉ង់ លោក Friedrich Merz កំពុងស្វែងរកដៃគូក្នុងកិច្ចខិតខំប្រឹងប្រែង ដើម្បីធ្វើឱ្យយោធារបស់អាល្លឺម៉ង់រស់ឡើងវិញ គឺ កងកម្លាំងប្រដាប់អាវុធបង្រួបបង្រួម Bundeswehr បន្ទាប់ពីការធ្វេសប្រហែសអស់ជាច្រើនទសវត្សរ៍ជាមួយនឹងមហិច្ឆតាក្នុងការកសាងកងទ័ពធម្មតាដ៏រឹងមាំបំផុត នៅអឺរ៉ុប។

អធិការបតីអាល្លឺម៉ង់ លោក Merz មានប្រសាសន៍ បន្ទាប់ពីជួបជាមួយនាយករដ្ឋមន្ត្រីប៉ូឡូញ លោក Donald Tusk កាលពីខែធ្នូថា៖ « យើងជាជនជាតិអាល្លឺម៉ង់ត្រូវការប្រទេសប៉ូឡូញជាដៃគូដ៏រឹងមាំស្មើគ្នា។ វាគឺស្ថិតនៅក្នុងផលប្រយោជន៍ជាមូលដ្ឋានរបស់យើង»។

គួរបញ្ជាក់ថា កិច្ចព្រមព្រៀងការពារជាតិរវាងប្រទេសទាំងពីរត្រូវបានកំណត់ឱ្យរួមបញ្ចូលផែនការ ការពារតំបន់សមុទ្របាល់ទិក ព័ត៌មានលម្អិតអំពីកិច្ចសហប្រតិបត្តិការលើការចល័តយោធា ហេដ្ឋារចនាសម្ព័ន្ធ សន្តិសុខតាមអ៊ីនធឺណិត និងបច្ចេកវិទ្យាថ្មីៗ។

មិនតែប៉ុណ្ណោះ បណ្តាប្រទេសបាល់ទិកនឹងត្រូវបានកំណត់គោលដៅសម្រាប់រុស្ស៊ី ប្រសិនបើទីក្រុងមូស្គូវាយប្រហារទឹកដីណាតូណាមួយនាពេលអនាគត ដោយពង្រីកអរិភាពហួសពីអ៊ុយក្រែន អំឡុងពេលឈ្លានពានទ្រង់ទ្រាយធំក្នុងខែកុម្ភៈ ឆ្នាំ២០២២ ទៅទៀត។

កិច្ចព្រមព្រៀងការពារជាតិរវាងប្រទេសទាំងពីររំពឹងថានឹងបញ្ជាក់ជាថ្មីនូវកាតព្វកិច្ចការពារសន្តិសុខទៅវិញទៅមក ដែលបានចែងក្នុងសន្ធិសញ្ញាណាតូ និងសហភាពអឺរ៉ុប៕

សម្រួល៖ ណឺ មិនា