ព័ត៌មានអន្ដរជាតិ

ព្រឹទ្ធសភាអាមេរិកបរាជ័យក្នុងការរារាំង ត្រាំ ពីអំណាចសង្គ្រាមនៅអ៊ីរ៉ង់ ទោះបីលទ្ធផលគាំទ្រលើស១សំឡេង

បានផុស

២៣ វិនាទី មុន

នៅ

ថ្ងៃពុធ ១៧ មិថុនា ២០២៦

ដោយ

ព្រឹទ្ធសភាសហរដ្ឋអាមេរិក បានបោះឆ្នោតយ៉ាងប្រកៀកប្រកិត នៅថ្ងៃអង្គារ (ម៉ោងនៅអាមេរិក ត្រូវព្រឹកថ្ងៃពុធម៉ោងនៅកម្ពុជា) ដើម្បីព្យាយាមរារាំងអំណាចសង្គ្រាម ក្នុងកិច្ចខិតខំប្រឹងប្រែងលើកទី៩ ដឹកនាំដោយគណបក្សប្រជាធិបតេយ្យ ដើម្បីបញ្ចប់សង្គ្រាមក្នុងប្រទេសអ៊ីរ៉ង់ ចាប់តាំងពីអ៊ីស្រាអែលនិងសហរដ្ឋអាមេរិករួមគ្នា ចាប់ផ្តើមការវាយប្រហារតាមអាកាស លើអ៊ីរ៉ង់កាលពីចុងខែកុម្ភៈ។

យោងតាមទីភ្នាក់ងាររ៉យទ័រ ផ្សាយថ្ងៃទី១៧ ខែមិថុនា ឆ្នាំ២០២៦ ព្រឹទ្ធសភាបានបោះឆ្នោតដោយសំឡេង ៤៨ ទល់នឹង ៤៧ ដើម្បីរារាំងអំណាច ប្រធានាធិបតី ដូណាល់ ត្រាំ ក្រោមច្បាប់អំណាចសង្គ្រាម បន្ទាប់ពីកិច្ចព្រមព្រៀងក្របខ័ណ្ឌដែលបានប្រកាសនៅសប្តាហ៍នេះ ដោយសេតវិមាន និងទីក្រុងតេហេរ៉ង់ សម្រាប់បទឈប់បាញ់បន្ថែមទៀត ដើម្បីបញ្ចប់ជម្លោះ។

ទោះបីលទ្ធផលនេះ បង្ហាញថា ការបោះឆ្នោតគាំទ្រដកអំណាចបញ្ជាសង្គ្រាមពីប្រធានាធិបតីមានចំនួនលើស១សំឡេង ក៏មិនអាចគ្រប់គ្រាន់ដើម្បីរារាំងអំណាចរបស់ប្រធានាធិបតីនោះទេ។ តាមច្បាប់របស់សហរដ្ឋអាមេរិក លទ្ធផលគាំទ្រ៦០សំឡេង ទើបអាចរារាំងអំណាចប្រធានាធិបតីជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះឆ្នោតនេះបានកើតឡើង ខណៈសមាជិកព្រឹទ្ធសភាកំពុងរង់ចាំរដ្ឋបាល ប្រធានាធិបតីអាមេរិក លោក ដូណាល់ ត្រាំ ដើម្បីផ្តល់ព័ត៌មានលម្អិតដល់ពួកគេអំពីអនុស្សរណៈនៃការយោគយល់គ្នា ប្រកាសដោយ លោក ត្រាំ កាលពីថ្ងៃអាទិត្យ ដើម្បីបញ្ចប់សង្គ្រាម។

ក្រុមអ្នកប្រជាធិបតេយ្យ និងសមាជិកគណបក្សសាធារណរដ្ឋមួយចំនួនរបស់ លោក ត្រាំ បានអំពាវនាវដល់រដ្ឋបាល ត្រាំ ឱ្យផ្តល់ព័ត៌មានជាក់លាក់អំពីផែនការនេះ[ព័ត៌មានលម្អិត ដើម្បីបញ្ចប់សង្រ្គាម] ដោយក្រុមប្រជាធិបតេយ្យលើកឡើង ថា ពួកគេមានអារម្មណ៍ថា «មានភាពមិនច្បាស់លាស់»។

គួរបញ្ជាក់ថា ក្រុមព្រឹទ្ធសមាជិកមកពីគណបក្សសាធារណរដ្ឋរបស់ លោក ត្រាំ មានសំឡេងតិចតួចប៉ុណ្ណោះ ទាំងនៅក្នុងព្រឹទ្ធសភា និងសភាតំណាងរាស្ត្រ។ កាលពីថ្មីៗនេះសភាជាន់ទាបក៏បានគាំទ្រ សេចក្តីសម្រេចមួយដែលនឹងបញ្ចប់សង្គ្រាមអ៊ីរ៉ង់ផងដែរ៕

សម្រួល៖ ណឺ មិនា