កងឆ្មាំបដិវត្តន៍អ៊ីរ៉ង់​ អះអាង​ពីការ​កម្ទេចទីបញ្ជាការដ្ឋានរបស់​ក្រុម​ប្រឆាំងខ្លួន នៅភាគខាងជើងអ៊ីរ៉ាក់

កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានប្រកាសថា ខ្លួនបានបើកការវាយប្រហារលើទីតាំងមួយ ដែលពិពណ៌នាថា ជា ទីបញ្ជាការដ្ឋានរបស់ «ក្រុមភេរវករ» នៅក្នុងខេត្ត Sulaymaniyah ភាគខាងជើងប្រទេសអ៊ីរ៉ាក់។ នេះបើយោងតាមសេចក្តីថ្លែងការណ៍ ដែលរាយការណ៍ដោយប្រព័ន្ធផ្សព្វផ្សាយរដ្ឋរបស់អ៊ីរ៉ង់ នៅថ្ងៃទី ៨ ខែមិថុនា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះជាយ៉ាងណា សេចក្តីថ្លែងការណ៍នោះមិនបានបញ្ជាក់លម្អិតអំពីឈ្មោះក្រុមដែលរងការវាយប្រហារ ប្រភេទអាវុធដែលបានប្រើប្រាស់ ឬចំនួនអ្នករងរបួស និងទំហំនៃការខូចខាតដែលបង្កឡើងដោយការវាយប្រហារនេះនៅឡើយទេ។ ជាក់ស្ដែង ខេត្ត Sulaymaniyah ដែលស្ថិតនៅក្នុងតំបន់ស្វយ័ត Kurdistan នៃប្រទេសអ៊ីរ៉ាក់ គឺជាទីតាំងឈរជើងរបស់ក្រុមប្រឆាំងឃើដអ៊ីរ៉ង់ជាច្រើន ដែលទីក្រុងតេហេរ៉ង់បានចោទប្រកាន់ម្តងហើយម្តងទៀតថា បានវាយប្រហារ និងញុះញង់ឲ្យមានអស្ថិរភាពនៅក្នុងប្រទេសអ៊ីរ៉ង់។

អ៊ីរ៉ង់បានបញ្ជាក់បន្ថែមទៀតថា ក្រុមទាំងនេះបម្រើឲ្យផលប្រយោជន៍របស់បណ្តាប្រទេសលោកខាងលិច និងអ៊ីស្រាអែល ហើយបានចាត់ថ្នាក់ក្រុមជីវពលឃើដ (Kurdish) ទាំងនោះថាជា អង្គភាពភេរវកម្ម។ ចាប់តាំងពីសង្រ្គាមនៅមជ្ឈិមបូព៌ាបានផ្ទុះឡើង អ៊ីរ៉ង់បានបើកការវាយប្រហារលើក្រុមទាំងនេះជាញឹកញាប់ ទោះបីជាបន្ទាយ និងជំរំធំៗរបស់ពួកគេភាគច្រើនត្រូវបានជម្លៀសចេញរួចហើយក៏ដោយ។

គួរបញ្ជាក់ថា ការវាយប្រហាររបស់កងកម្លាំង IRGC នេះ បានកើតឡើងតែប៉ុន្មានម៉ោងប៉ុណ្ណោះ បន្ទាប់ពីអ៊ីរ៉ង់បានបាញ់ស្រោចមីស៊ីលជាបន្តបន្ទាប់ទៅលើភាគខាងជើងនៃប្រទេសអ៊ីស្រាអែល។ មុននោះបន្តិច អ៊ីស្រាអែលក៏បានបាញ់មីស៊ីលចូលទៅក្នុងតំបន់ជាយក្រុងភាគខាងត្បូងនៃទីក្រុងបេរូត ដែលទីក្រុងទែលអាវីវ (Tel Aviv) អះអាងថា ជាមជ្ឈមណ្ឌលបញ្ជាការដ្ឋានរបស់ក្រុមហេសបូឡា និងជាកម្លាំងគាំទ្រដោយអ៊ីរ៉ង់៕

អត្ថបទ ៖ សាង ស្រីល័ក្ខ

ប្រធានសភាអ៊ីរ៉ង់៖ ​​​អ៊ីស្រាអែល​និងមូលដ្ឋានទ័ព​និង​ទ្រព្យ​​អាមេរិក​ ជាគោលដៅវាយ​បក​ស្រប​ច្បាប់របស់​អ៊ីរ៉ង់​