អ៊ីរ៉ង់ បញ្ជា​ដ្រូនបើក​បុកមូលដ្ឋានទ័ពអាមេរិកនៅ​បារ៉ែន និងផ្លោង​មីស៊ីលដាក់​ ហ្សកដានី ផ្អើលអស់​មជ្ឈិមបូព៌ា!

ស្ថានការណ៍នៅតំបន់មជ្ឈិមបូព៌ា បានផ្ទុះឡើងយ៉ាងក្តៅគគុក បន្ទាប់ពីកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានចេញមុខប្រកាសក្តែងៗថា ខ្លួនបានបើកការវាយប្រហារដោយផ្ទាល់ទៅលើមូលដ្ឋានទ័ពរបស់សហរដ្ឋអាមេរិក នៅក្នុងប្រទេសបារ៉ែន និងហ្សកដានី ដើម្បីសងសឹកឱ្យការដែលអាមេរិកបានវាយប្រហារលើកំពង់ផែ និងកោះនានារបស់ខ្លួន នៅតំបន់ច្រកសមុទ្រ Hormuz។ នេះ​បើយោងតាម​ការ​ចុះផ្សាយ​របស់ Al Jazeera នា​ថ្ងៃទី​១០ ខែ​មិថុនា ឆ្នាំ​២០២៦ នេះ។

ក្នុងសេចក្តីថ្លែងការណ៍​នៅ​លើ​ប្រព័ន្ធផ្សព្វផ្សាយរដ្ឋ ខាងកងទ័ពអ៊ីរ៉ង់ បានបញ្ជាក់ថា ខ្លួនបានប្រើប្រាស់ហ្វូងដ្រូនហោះទៅបុកទីស្នាក់ការកងពលធំទី​៥ របស់កងទ័ពជើងទឹកអាមេរិក នៅ​ប្រទេសបារ៉ែន ព្រមទាំងបានបាញ់មីស៊ីលរយៈចម្ងាយឆ្ងាយ ទៅកម្ទេចមូលដ្ឋានទ័ពអាកាសអាមេរិក នៅក្នុងតំបន់ Azraq នៃប្រទេសហ្សកដានី ថែមទៀតផង។

ការវាយប្រហារដ៏កំហុកនេះ បានធ្វើឱ្យប្រទេសជិតខាងដូចជា គុយវ៉ែត ដែលជាកន្លែងលាក់កងទ័ពអាមេរិកដ៏ធំមួយដែរនោះ ត្រូវប្រកាសអាសន្នជាបន្ទាន់ ដោយសារតែប្រព័ន្ធការពារដែនអាកាសរបស់ខ្លួន បានរកឃើញ និងកំពុងស្ទាក់ចាប់បំផ្លាញចោលនូវ «គោលដៅហោះហើររបស់សត្រូវ» ដែលកំពុងសំដៅចូលមកទឹកដីខ្លួនដូចគ្នា។

គួរបញ្ជាក់ថា ភ្លើងសង្រ្គាមដែលកំពុងឆាបឆេះយ៉ាងសន្ធោសន្ធៅនេះ បានកើតឡើងភ្លាមៗ បន្ទាប់ពីមានហេតុការណ៍តានតឹងខ្លាំងមួយកាលពីថ្ងៃអង្គារ ពោលគឺនៅពេលដែលឧទ្ធម្ភាគចក្រប្រយុទ្ធប្រភេទ Apache មួយគ្រឿងរបស់សហរដ្ឋអាមេរិក ត្រូវបានគេបាញ់ទម្លាក់នៅចំតំបន់ច្រកសមុទ្រ Hormuz ដែលជាផ្លូវនាវាចរណ៍ដ៏សំខាន់បំផុតមួយរបស់ពិភពលោក៕

ប្រែសម្រួល៖ ឈាង