របួសធ្ងន់ស្រាល០៣នាក់ ក្នុងហេតុការណ៍ផ្ទុះហ្គាសម៉ាសុីនត្រជាក់ នៅបឹងកេងកងទី១

ជាងជួសជុលម៉ាសុីនត្រជាក់ ០៣នាក់ ត្រូវបានរងរបួសធ្ងន់ស្រាល បញ្ជូនទៅមន្ទីរពេទ្យ ក្រោយផ្ទុះហ្គាសម៉ាសុីនត្រជាក់ កំឡុងពេលជួសជុល ។ ហេតុការណ៍នេះបង្កភ្ញាក់ផ្អើលកាលពីវេលាម៉ោង ១០ និង៤០នាទីព្រឹកថ្ងៃទី ២០ ខែមិថុនា ឆ្នាំ២០២៦ នៅចំណុចហាងសាច់អាំងបែបជប៉ុន លើបណ្តោយផ្លូវលេខ ៣២២ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។ 

តាមប្រភពព័ត៌មានពីបុគ្គលិកនៅហាងសាច់អាំងបែបជប៉ុនខាងលើបានប្រាប់ថា មុនកើតហេតុ បុរស ០៣នាក់ ដែលជាក្រុមជាងជួសជុលម៉ាស៊ីនត្រជាក់ប្រចាំហាងបានមកធ្វើការពិនិត្យម៉ាស៊ីនត្រជាក់នៅខាងក្រោយផ្នែកខាងនៃហាង ។ ភ្លាមៗនោះ មិនដឹងថាមានបញ្ហាអ្វីនោះ សង្ស័យខុសបច្ចេកទេសបណ្ដាល ក៏ស្រាប់តែផ្ទុះហ្គាសត្រជាក់ បណ្តាលអោយរបួសធ្ងន់០២នាក់ នឹងម្នាក់ទៀតរងរបួសស្រាល បញ្ជូនមន្ទីរពេទ្យតែម្តង ប៉ុន្តែមិនបង្កការឆាបឆេះនោះឡើយ។ 

ក្រោយកើតហេតុ សមត្ថកិច្ចមូលដ្ឋាន សហការជាមួយមន្រ្តីជំនាញអគ្គិភ័យ នៃស្នងការដ្ឋាននគរបាលរាជធានីភ្នំពេញ ធ្វើកំណត់ហេតុ រួចប្រគល់ជូនម្ចាស់ហាង និងណែនាំអោយមានករប្រុងប្រយ័ត្ន ដើម្បីបញ្ចប់ ៕ អត្ថបទ ៖ រដ្ឋា