ព័ត៌មានអន្ដរជាតិ

ផ្ទុះបំពង់ឧស្ម័នក្រោមដីក្នុងទីក្រុងតូក្យូ បង្ករបួស១០នាក់ និងការជម្លៀសចេញ

បានផុស

១ year មុន

នៅ

ថ្ងៃអង្គារ ២៧ ឧសភា ២០២៥

ដោយ

ការផ្ទុះហ្គាសនៅឯការដ្ឋានសំណង់មួយក្នុងសង្កាត់ Edogawaក្នុងទីក្រុងតូក្យូ បណ្ដាលឲ្យមនុស្ស ១០ នាក់រងរបួស និងបានជំរុញឱ្យមានការជម្លៀសចេញជាបន្ទាន់នៅក្នុងតំបន់ជុំវិញ។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី២៧ខែឧសភានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ផ្ទុះនេះបានកើតឡើងនៅម៉ោង៩និង៣០នាទីព្រឹកថ្ងៃអង្គារនេះ ហើយបន្ទាប់មកមានផ្សែងខ្មៅ និងអណ្តាតភ្លើងឆាបឆេះរថយន្តនៅក្នុងអគារការដ្ឋាន។ ឆ្លើយតបទៅនឹងហេតុការណ៍នេះមានរថយន្តពន្លត់អគ្គីភ័យជាង៣០ គ្រឿងទៅកាន់កន្លែងកើតហេតុ និងអាចពន្លត់ភ្លើងបានក្នុងរយៈពេល ៩០នាទីក្រោយមក។

នាយកដ្ឋានពន្លត់អគ្គិភ័យទីក្រុងតូក្យូបានរាយការណ៍ថា អ្នករងរបួសរួមមានកម្មករសំណង់ និងអ្នករស់នៅក្នុងតំបន់ដែលមានអាយុចន្លោះពី ២០ ឆ្នាំ ដល់៧០ឆ្នាំ ប៉ុន្តែសុទ្ធតែមានរបួសដែលមិនគំរាមកំហែងដល់អាយុជីវិត។

សាក្សីនៅកន្លែងកើតហេតុ បានរៀបរាប់ថា មានសំឡេងផ្ទុះខ្លាំង និងញ័រដូចរញ្ជួយដី ធ្វើឱ្យខូចបង្អួច ខូចខាតអគារ កញ្ជក់ហាងនៅក្បែរនោះ និងខ្ទាតកម្ទេចកម្ទីនៅពាសពេញតំបន់នោះ។

អាជ្ញាធរ បានសន្និដ្ឋានថា ការផ្ទុះនេះកើតឡើងនៅពេលដែលកម្មករសំណង់ធ្វើឲ្យប៉ះពាល់ដល់បំពង់ឧស្ម័នក្រោមដីក្នុងពេលសាងសង់គម្រោងអគារខុនដូរមួយ។ ប៉ូលិសបានជម្លៀសអ្នកនៅក្បែរនោះចេញដើម្បីសុវត្ថិភាព និងបន្តស៊ើបអង្កេតរកមូលហេតុ និងវាយតម្លៃការខូចខាតសរុប៕