សន្តិសុខសង្គម

បើករថយន្តសុខៗ ផ្ទុះហ្គាសឆេះ របួសជនជាតិចិន ៣ នាក់ ខ្មែរម្នាក់

បានផុស

១ year មុន

នៅ

ថ្ងៃអង្គារ ២៣ កក្កដា ២០២៤

ដោយ

រថយន្តឡិចស៊ីសមួយគ្រឿង បំពាក់ហ្គាស ដើម្បីរត់តាក់ស៊ី ខណៈកំពុងបើកបរ ស្រាប់តែឆាបភ្លើងបារី ផ្ទុះឆេះ របួសធ្ងន់ជនជាតិចិន ៣ នាក់ (អតិថិជន) ចំណែកម្ចាស់រថយន្តជាជនជាតិខ្មែរ របួសស្រាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១១ និង ៣០ នាទីព្រឹក ថ្ងៃទី ២៣ ខែកក្កដា ឆ្នាំ ២០២៤ នៅចំណុចស្តុបមុខសាលាបឋម ហ៊ុនសែន ជម្ពូវ័ន ផ្លូវជាតិលេខ ៤ ភូមិព្រៃព្រីងជើង ២ សង្កាត់ចោមចៅទី ៣ ខណ្ឌពោធិ៍សែនជ័យ។

តាមប្រភពព័ត៌មានបានឲ្យដឹងថា មុនពេលកើតហេតុគេបានឃើញរថយន្តឡិចស៊ីស RX300 មួយគ្រឿង ពណ៌ស្ករ ពាក់ស្លាកលេខភ្នំពេញ 2AQ 9519 ជាប្រភេទឡានតាក់ស៊ី ធ្វើដំណើរតាមបណ្ដោយផ្លូវជាតិលេខ ៤ ទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែផ្ទុះឆេះបណ្ដាលឲ្យបុរសជនជាតិចិនចំនួន ៣ នាក់ រងរបួសរលាកពេញខ្លួន ចំណែកបុរសជនជាតិខ្មែរម្នាក់ ជាម្ចាស់រថយន្ត របួសស្រាល។

ដោយឡែកបើតាមការបញ្ជាក់ពីម្ចាស់រថយន្ត បានឲ្យដឹងថា រូបគាត់ ដឹកជនជាតិចិនទាំង ៣ នាក់ ចេញពីភ្នំពេញ បំណងទៅកំពង់សោម។ ក្នុងនោះដែរ ខណៈពេលកំពុងបើកបរ ជនជាតិចិនទាំងនោះ បានទាញបារីមកជក់ ដោយសារតែរថយន្តរបស់គាត់បំពាក់ហ្គាស ទើបហាមមិនឲ្យជក់បារីនោះទេ តែជនជាតិចិនទាំងនោះ មិនស្តាប់ ទើបឆាបផ្ទុះឆេះតែម្ដង។

ក្រោយកើតហេតុ ជនរងគ្រោះទាំងអស់ ត្រូវបានបញ្ជូនទៅមន្ទីរពេទ្យភ្លាមៗ។ ចំណែករថយន្ត ត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលចោមចៅទី ៣ រង់ចាំដោះស្រាយពេលក្រោយ៕

អត្ថបទ ៖ សុខា