សន្តិសុខសង្គម

ផ្ទុះកំប៉ុងហ្គាសនៅយានដ្ឋាន ១ កន្លែង ក្នុងខណ្ឌទួលគោក រងរបួសមនុស្ស ០២ នាក់

បានផុស

១ year មុន

នៅ

ថ្ងៃចន្ទ ១៦ ធ្នូ ២០២៤

ដោយ

បុរសចំនួន ០២ នាក់ រងរបួសរលាកពេញខ្លួន ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ខណៈកំពុងចាញ់ថ្នាំឡានក្បែរចង្ក្រានហ្គាស ស្រាប់តែផ្ទុះឡើង បង្កការភ្ញាក់ផ្អើលដល់សមត្ថកិច្ចចុះអន្តរាគមន៍កាលពីវេលាម៉ោង ១០ និង ០៥ នាទី ព្រឹក ថ្ងៃទី ១៦ ខែធ្នូ ឆ្នាំ ២០២៤ នៅចំណុចផ្លូវ ៤៣០ កែងផ្លូវមុនីរ៉េត ស្ថិតក្នុងភូមិ ១៦ សង្កាត់បឹងសាឡាង ខណ្ឌទួលគោក រាជធានីភ្នំពេញ។

តាមសម្ដីបុរសម្នាក់ឈ្មោះ ណូរ៉ា អាយុ ៣៥ ឆ្នាំ មុខរបរបើកយានដ្ឋានបាញ់ថ្នាំនៅកន្លែងកើតហេតុខាងលើ បានប្រាប់ឲ្យដឹងថា មុនកើតហេតុមានជាងកំពុងធ្វើការបាញ់ថ្នាំឡានដូចសព្វដង តែថ្ងៃនេះជាងបានបាញ់ថ្នាំក្បែរចង្ក្រានបាយដែលចុងភៅកំពុងធ្វើម្ហូប ស្រាប់តែផ្ទុះកំប៉ុងហ្គាសតូចសាយភាយមកបណ្ដាលឲ្យរលាកបុរស ០២ នាក់។ ភ្លាមៗ នោះ ជាងឡានដូចគ្នា ក៏បានយកម៉ូតូដឹកជនរងគ្រោះទៅមន្ទីរពេទ្យដើម្បីសង្គ្រោះ ព្រមទាំងសុំឲ្យសមត្ថកិច្ចមូលដ្ឋានជួយអន្តរាគមន៍ហៅរថយន្តពន្លត់អគ្គិភ័យមកបាញ់ការពារកុំឲ្យឆេះរាលដាលដល់ផ្ទះប្រជាពលរដ្ឋជិតខាង។

បន្ទាប់ពីទទួលបានព័ត៌មានខាងលើរួច សមត្ថកិច្ច និងអាជ្ញាធរមូលដ្ឋាន បានចុះមកដល់កន្លែងកើតហេតុ រួមនឹងរថយន្តពន្លត់អគ្គិភ័យរបស់ការិយាល័យបង្ការពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញដែលប្រចាំការនៅអធិការដ្ឋានខណ្ឌចំនួន ០១ គ្រឿង និងមានការយកអាសាពីប្រជាពលរដ្ឋក្បែរកន្លែងកើតហេតុយកបំពង់ពន្លត់អគ្គិភ័យតាមផ្ទះរៀងខ្លួនមកជួយបាញ់ពន្លត់អស់ចំនួន ២០ បំពង់តូច-ធំ ក៏រលត់ទៅវិញជាស្ថាពរ ដោយរថយន្តពន្លត់អគ្គិភ័យបានចុះមកដល់ដែរ តែមិនបានបាញ់នោះទេ។

ករណីខាងលើនេះ មិនបានរាលដាលដល់ផ្ទះអ្នកជិតខាងនោះឡើយ គ្រាន់តែធ្វើឲ្យខូចខាតសម្ភារៈក្នុងយានដ្ឋានខាងលើតិចតួចប៉ុណ្ណោះ តែបង្កឲ្យមនុស្ស ០២ នាក់ រងរបួសរលាក់ខ្លួនប្រាណ ដែលជាជាងឡានក្នុងយានដ្ឋានខាងលើ ហើយថៅកែយានដ្ឋានក៏បានដឹកជនរងគ្រោះទៅមន្ទីរពេទ្យ ដើម្បីព្យាបាលរបួសផងដែរ៕

អត្ថបទ ៖ សុខា