ផ្ទុះហ្គាសស្លាប់​មនុស្ស៦នាក់ក្នុងភោជនីយដ្ឋាន​ប្រទេសឆេក​

មនុស្ស ៦ នាក់បានស្លាប់ក្នុងហេតុការណ៍​ឆេះ​​ភោជនីយដ្ឋានមួយ​កន្លែង​នៅភាគពាយព្យនៃទីក្រុង Most របស់ប្រទេសឆេក ដែល​បង្ក​ឡើង​​ដោយសារ​តែ​​ការ​ផ្ទុះហ្គាស។ នេះបើយោងតាមការចេញផ្សាយរបស់សារព័ត៌មាន CNN កាល​ពី​ថ្ងៃទី១២ខែមករា​ឆ្នាំ​២០២៥។

ភ្នាក់ងារ​សង្គ្រោះ និង​អគ្គិភ័យរបស់ប្រទេសឆេកបានបង្ហោះលើប្រព័ន្ធផ្សព្វផ្សាយសង្គម X ថា ក្រៅពីមានអ្នកស្លាប់៦នាក់ មនុស្ស៨នាក់ផ្សេងទៀត បានរងរបួសនៅក្នុងការផ្ទុះហ្គាសដ៏ខ្លាំងក្លានេះ កាលពីល្ងាចថ្ងៃសៅរ៍។ លើសពីនេះ មនុស្ស៣០ នាក់ត្រូវបានជម្លៀសចេញពីភោជនីយដ្ឋាន និងអគារជុំវិញនោះ ខណៈដែលមានភ្ញៀវប្រហែល ២០ នាក់នៅក្នុងភោជនីយដ្ឋាននៅអំឡុងពេលផ្ទុះ។

បើតាមរដ្ឋមន្ត្រីក្រសួងមហាផ្ទៃលោក Vit Rakusan បានប្រាប់វិទ្យុក្នុង​ស្រុក​ថា មូលហេតុនេះទំនងជាហ្គាសម៉ាស៊ីនកម្តៅក្រឡាប់នៅក្នុងសួនច្បារមុខភោជនីយដ្ឋានទើបបណ្ដាលឲ្យមានការផ្ទុះ។ ទោះយ៉ាងណាមូលហេតុពិតប្រាកដនៃការផ្ទុះនេះកំពុងស្ថិតនៅក្រោមការស៉ើបអង្គេតនៅឡើយ៕

អត្ថបទ៖ ប៊ុន សុភាព