ឯកអគ្គរាជទូតកម្ពុជា រួមតំណាងប្រទេសសមាជិកអាស៊ាន បានជួបប្រធានាធិបតីស្វ៊ីស ដើម្បីពង្រឹងសហការរវាងស្វីស និងអាស៊ាន

លោក កែ សុវណ្ណ ឯកអគ្គរាជទូតកម្ពុជាប្រចាំប្រទេសស្វីស រួមជាមួយនឹងឯកអគ្គរដ្ឋទូតបណ្តាប្រទេសសមាជិកអាស៊ាន កាលពីថ្ងៃទី១៨ ខែមិថុនា ឆ្នាំ២០២៦ បានចូលរួមកម្មវិធីទទួលទានអាហារការងារថ្ងៃត្រង់ប្រចាំឆ្នាំ ដែលបានរៀបចំដោយលោក Guy Parmelin ប្រធានាធិបតីស្វ៊ីស។ អាហារការងារថ្ងៃត្រង់នេះ បានឆ្លុះបញ្ចាំងឱ្យឃើញអំពីទំនាក់ទំនងដ៏រឹងមាំរវាងស្វ៊ីស និងអាស៊ាន។

ក្នុងកម្មវិធីនោះ លោកប្រធានាធិបតី Parmelin បានគូសបញ្ជាក់អំពីសារៈសំខាន់នៃការពង្រឹងកិច្ចសហប្រតិបត្តិការផ្នែកពាណិជ្ជកម្មនិងវិនិយោគរវាងស្វ៊ីស និងអាស៊ាន ដោយបានសង្កត់ធ្ងន់ជាពិសេសលើការអនុវត្តសេចក្តីថ្លែងការណ៍រួមនៃកិច្ចសហប្រតិបត្តិការ​រវាងអាស៊ាន និងសមាគមតំបន់ពាណិជ្ជកម្មសេរីអឺរ៉ុប (EFTA) ដើម្បីធ្វើឱ្យកាន់តែស៊ីជម្រៅនូវទំនាក់ទំនងសេដ្ឋកិច្ច។

លោកប្រធានាធិបតី​ ក៏បានលើកឡើងអំពីវិស័យអាទិភាពសំខាន់ៗ រួមមាន ពាណិជ្ជកម្មអេឡិចត្រូនិក សហគ្រាសធុនតូច និងមធ្យម (MSMEs) ឌីជីថលនីយកម្ម និងវិស័យសំខាន់ផ្សេងៗទៀត។

ឯកអគ្គរដ្ឋទូតបណ្តាប្រទេសសមាជិកអាស៊ាន បានសម្តែងការពេញចិត្តចំពោះការចូលរួមយ៉ាងសកម្មរបស់ស្វ៊ីសជាមួយអាស៊ាន ហើយបានកត់សម្គាល់ថា ភាពជាដៃគូ ដែលកំពុងរីកចម្រើន គឺនៅតែបន្តនាំមកនូវផលប្រយោជន៍ទៅវិញទៅមកសម្រាប់ភាគីទាំងពីរ។

ឯកអគ្គរាជទូតកម្ពុជា លោក កែ សុវណ្ណ បានជម្រាបជូនលោកប្រធានាធិបតី Parmelin អំពីចំណាប់អារម្មណ៍របស់កម្ពុជា ក្នុងការខិតខំស្វែងរកការចរចាកិច្ចព្រមព្រៀងពាណិជ្ជកម្មសេរីរវាងកម្ពុជា និងសមាគមពាណិជ្ជកម្មសេរីអឹរ៉ុប (EFTA) និងបានស្នើសុំការគាំទ្រពីលោកប្រធានាធិបតី Parmelin ដើម្បីជំរុញគំនិតផ្តួចផ្តើមនេះ៕