ខេត្តកោះកុង នឹងរៀបចំ «ពិធីបុណ្យពូនភ្នំទុរេនសាមគ្គី» រយៈពេល ២ ថ្ងៃ ដើម្បីទាក់ទាញភ្ញៀវទេសចរ

រដ្ឋបាលស្រុកថ្មបាំង ខេត្តកោះកុង នឹងរៀបចំ «ពិធីបុណ្យពូនភ្នំទុរេនសាមគ្គី» រយៈពេល ២ ថ្ងៃ ដើម្បីទាក់ទាញភ្ញៀវទេសចរជាតិ-អន្តរជាតិ ដែលមកកម្សាន្ត ហើយស្វែងយល់អំពីសក្តានុពលទេសចរណ៍ និង កសិកម្មក្នុងស្រុក។ នេះបើតាមសេចក្ដីជូនដំណឹងរបស់រដ្ឋបាលស្រុកថ្មបាំង កាលពីថ្ងៃទី ២៨ ខែមិថុនា ឆ្នាំ ២០២៦។

រដ្ឋបាលស្រុកថ្មបាំង បានឲ្យដឹងថា កម្មពិធីនេះ នឹងមានរៀបជាភ្នំផ្លែឈើសម្រាប់ភ្ញៀវទស្សនា និង ធ្វើបាយដំណើបទុរេនសម្រាប់ភ្ញៀវទេសចរពិសាភ្លក់។ ក្រោយពេលចប់កម្មវិធី នឹងយក ទៅឧបត្ថម្ភដល់វីរកងទ័ពជួរមុខ។ លើសពីនេះ ក៏មានការដាក់តាំងបង្ហាញ និង លក់ផលិតផលក្នុងស្រុកពី កសិករ និង អាជីវករ រួមទាំងភ្លក់រសជាតិទុរេន ដើម្បីឲ្យភ្ញៀវស្គាល់ពីសក្តានុពលទេសចរណ៍ និង កសិកម្មក្នុងស្រុកថ្មបាំង ផងដែរ។

រដ្ឋបាលស្រុកថ្មបាំង សង្ឃឹមជឿជាក់ថា ប្រជាពលរដ្ឋ និង ប្រជាកសិករ នឹងអញ្ជើញចូលរួមទស្សនា ព្រមទាំងឧបត្ថម្ភគាំទ្រក្នុងពិធីបុណ្យនេះឲ្យបានច្រើនកុះករផងដែរ។

ពិធីបុណ្យពូនភ្នំទុរេនសាមគ្គី នេះ នឹងប្រព្រឹត្តទៅនៅថ្ងៃទី ១១ ចាប់ពី ម៉ោង ៣ និង ០០ នាទីរសៀល និង ឆ្លងបុណ្យនៅថ្ងៃទី ១២ ខែកក្កដា ឆ្នាំ ២០២៦ ក្នុងបរិវេណវត្តសិលាមុន្នី គីរីរង្សី (វត្តថ្មបាំងលើ) ភូមិត្រពាំងឈើត្រាវ ឃុំឬស្សីជ្រុំ ស្រុកថ្មបាំង ខេត្តកោះកុង៕