៥ថ្ងៃអាជ្ញាធររាជធានីឃាត់យានយន្តល្មើសបម្រាមគោចរជាង១,២០០គ្រឿង

ភ្នំពេញ៖ ក្នុងរយៈពេល៥ថ្ងៃមកនេះ អាជ្ញាធររាជធានីភ្នំពេញបានឃាត់យានយន្តដែលបានល្មើសនឹងបម្រាមគោចរសរុបចំនួន១,២០៥គ្រឿង ក្នុងនោះមានរថយន្ត៣៤៥គ្រឿង និងម៉ូតូចំនួន៨៦០គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក សាន សុខសីហា អ្នកនាំពាក្យនៃស្នងការដ្ឋាននគរបាលជាតិ បានប្រាប់ឱ្យដឹងនៅរសៀលថ្ងៃទី០៤ ខែសីហានេះថា ក្នុងចំណោមយានយន្តចំនួន១,២០៥គ្រឿង បានធ្វើការផាកពិន័យរួចហើយចំនួន៣១១គ្រឿង ក្នុងនោះមានរថយន្តចំនួន៨៣គ្រឿង និងម៉ូតូចំនួន២២៨គ្រឿង។ ចំពោះយាន្តយន្តផ្សេងទៀតត្រូវបានយកមករក្សាទុកនៅតាមបណ្តាខណ្ឌចំនួន២៨៨គ្រឿង ក្នុងនោះមានរថយន្តចំនួន៥៧គ្រឿង និងម៉ូតូចំនួន២៣១គ្រឿង។

លោកមានប្រសាសន៍បន្តថា៖ “ចំណោមយានយន្តចំនួន១២០៥គ្រឿងបានធ្វើការផាកពិន័យរួចហើយចំនួន៣១១គ្រឿងក្នុងនោះមានរថយន្តចំនួន៨៣គ្រឿងនិងម៉ូតូចំនួន២២៨គ្រឿង។ ចំពោះយាន្តយន្តផ្សេងទៀតត្រូវបានយកមករក្សាទុកនៅតាមបណ្តាខណ្ឌចំនួន២៨៨គ្រឿងក្នុងនោះមានរថយន្តចំនួន៥៧គ្រឿងនិងម៉ូតូចំនួន២៣១គ្រឿង។ ក្រៅពីនេះក្រុមសមត្ថកិច្ចបានអប់រំណែនាំឱ្យពួកគាត់ត្រឡប់ទៅផ្ទះវិញ”។

លោកវរសេនីយ៍ឯក សាន សុខសីហា បានបន្តឱ្យដឹងទៀតថា អាជ្ញាធរ និងបន្តអនុវត្តឱ្យបានតឹងរឹងបន្ថែមទៀត តាមបទបញ្ជារបស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញក៏ដូចជាឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដោយបង្កើតឱ្យមានក្រុមអន្តរាគមន៍ពិសេសជាច្រើនក្រុម ដើម្បីចល័តតាមគ្រប់ច្រកល្ហកក៏ដូចជាតាមផ្លូវតូចៗ និងបណ្តាខណ្ឌតាមជាយក្រុង ដើម្បីត្រួតពិនិត្យមើលនៅមានហាងដែលបើកលក់ដូរ និងអ្នកដែលបន្តល្មើសជួបជុំប្រមូលផ្តុំផឹកស៊ី ល្មើសនិងបម្រាមគោចរ។

លោកបានបន្ថែមទៀតថា ជាលទ្ធផលអាជ្ញាធរបានធ្វើការឃាត់ខ្លួនអ្នកប្រព្រឹត្តល្មើសចំនួន២១នាក់ ដែលក្នុងនោះនៅខណ្ឌជ្រោយចង្វារចំនួន១៦នាក់ ដែលសុទ្ធតែជាក្មេងទំនើង មានសារធាតុស្រវឹងក្នុងខ្លួន ខណ្ឌពោធិ៍សែនជ័យឃាត់បានអ្នកជួបជុំផឹកស៊ីចំនួន៣នាក់ ខណ្ឌទួលគោក១នាក់ និងខណ្ឌកំបូល១នាក់។

លោកវរសេនីយ៍ឯក សាន សុខសីហា បានសំណូមពរឱ្យប្រជាពលរដ្ឋទាំងអស់ចូលរួមទាំងអស់គ្នា ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ជាពិសេសគឺប្រភេទបម្លែងថ្មីឌែលតា ។

គួរបញ្ជាក់ថាសាលារាជធានីភ្នំពេញ​បានដាក់ចេញស្តីពីការអនុវត្តបម្រាមគោចរចាប់ពីម៉ោង​​ ៩:០០នាទីយប់​ ដល់ម៉ោង​៣:០០នាទីទៀបភ្លឺ​រយៈពេល១៤ថ្ងៃ ចាប់ពីថ្ងៃទី២៩ ខែកក្កដា ដល់ថ្ងៃទី១២ ខែសីហា​ ឆ្នាំ២០២១ខាងមុខនេះ ដើម្បីទប់សស្កាត់ជំងឺកូវីដ-១៩ ពិសេសវីរុសប្រភេទ ដែលតា (Delta)៕

អត្ថបទ៖ សំអឿន