ល្មើសបម្រាមគោចរ៖ ម្ចាស់ ហាង ផ្ទះឈើម្ហូបខ្មែរថៃ ២នាក់ និងភ្ញៀវ៨នាក់ ត្រូវសមត្ថកិច្ច បញ្ជូនទៅតុលាការ

កម្លាំងសមត្ថកិច្ច នៃស្នងការដ្ឋាន នគរបាលរាជធានីភ្នំពេញ នៅព្រឹកថ្ងៃទី១២ ខែសីហានេះ បានបញ្ជូនម្ចាស់ហាងផ្ទះឈើម្ហូបខ្មែរថៃ ២នាក់ និងភ្ញៀវ៨នាក់ ទៅតុលាការ ដើម្បីចាត់ការបន្តតាមច្បាប់ ពាក់ព័ន្ធនឹងករណី​បើក​ហាងផឹកស៊ី ល្មើសនឹងបម្រាមគោចរ។

លោកវរសេនីយ៍ឯក សាន សុខសីហា អ្នកនាំពាក្យ នៃស្នងការដ្ឋាននគរបាល រាជធានីភ្នំពេញ បានថ្លែងប្រាប់អ្នកសា​រ​ព័ត៌មានកម្ពុជាថ្មីថា ម្ចាស់ហាងផ្ទះឈើម្ហូបខ្មែរថៃ​ ចំនួន​២នាក់ និងភ្ញៀវចំនួន​៨នាក់​ សរុបចំនួន​១០នាក់​ (ស្រីម្នាក់)​ ដែលបើកហាង​ និងចូលទៅផឹកស៊ី ល្មើសនឹងបម្រាមគោចរ​ នៅសង្កាត់ស្ទឹងមានជ័យ២​ ខណ្ឌមានជ័យ​ ត្រូវបានបញ្ជូន ទៅសាលាដំបូងរាជធានីភ្នំពេញ​ នៅព្រឹកថ្ងៃទី១២​ ខែសីហា​ ឆ្នាំ២០២១នេះ​។

គួររំលឹកថា បន្ទាប់ពីទទួលបានខំមិន ពីប្រជាពលរដ្ឋ ក្នុងផេកស្នងការដ្ឋាន នគរបាលរាជធានីភ្នំពេញ​ ទាក់ទងទៅនឹងហាងមួយកន្លែងឈ្មោះ​ ផ្ទះឈើម្ហូបខ្មែរថៃ​ នៅសង្កាត់ស្ទឹងមានជ័យ២​ ខណ្ឌមានជ័យ​ ដែលបើកល្មើសបម្រាមគោចរ​។ ភ្លាមៗនោះកម្លាំងគណ:បញ្ជាការ ឯកភាពខណ្ឌមានជ័យ​ ដឹកនាំដោយអភិបាលរងខណ្ឌ និងមានការចូល​រួម ពីលោកវរសេនីយ៍ឯក​ ម៉េង​ វិមានតារា អធិការនគរបាលខណ្ឌមានជ័យ​ បានដឹកនាំកម្លាំងចុះបង្ក្រាប​ និងបិទទីតាំងល្មើស​ ដោយបានឃាត់ខ្លួនម្ចាស់ហាង និងភ្ញៀវចូលទៅផឹកស៊ី មួយចំនួនទៀត៕