ព័ត៌មានជាតិ

ឯកសារមួយបញ្ជាក់យ៉ាងច្បាស់តុកកែជាពូជសត្វព្រៃ បែងចែកច្រើនប្រភេទខុសៗគ្នា

បានផុស

៤ years មុន

នៅ

ថ្ងៃព្រហស្បតិ៍ ២ កញ្ញា ២០២១

ដោយ

យោងតាមឯកសាររបស់ក្រសួងកសិកម្ម រុក្ខាប្រមាញ់និងនេសាទកាលពីឆ្នាំ ២០០៧ បង្ហាញយ៉ាងច្បាស់ថា សត្វតុកកែជាពូជសត្វព្រៃមានដោយបង្គួរ ដែលត្រូវបានការពារដោយច្បាប់។

ក្នុងបញ្ជីឈ្មោះដែលមានសត្វព្រៃរាប់រយប្រភេទ បានចាត់ចំណាត់ថ្នាក់សត្វព្រៃជា ៣ ក្រុមគឺប្រភេទជិតផុតពូជ ប្រភេទមានដោយកម្រ និងក្រុមប្រភេទមានដោយបង្គួរ។

ក្នុងឯកសារបានបញ្ជាក់យ៉ាងច្បាស់ តុកកែស្ថិតក្នុងប្រភេទឧរង្គសត្វមានដោយបង្គួរ ហើយមានច្រើនប្រភេទដូចជា៖

-តុកកែ

-តុកកែកន្ទុយសំប៉ែត

-តុកកែក្រាំងថ្ម

-តុកកែខ្លួនរលោង

-តុកកែភ្នំក្រវាញ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពពួកសត្វព្រៃគ្រប់ប្រភេទត្រូវបានកំណត់ជាសម្បត្តិរបស់រដ្ឋ និងជាសមាសភាគនៃធនធានព្រៃឈើដែលរួមមាន ពពួកថនិកសត្វ បក្សីសត្វ ឧរង្គសត្វ បាណកសត្វ និងសត្វឥតឆ្អឹងកងផ្សេងៗទៀត ព្រមទាំងពងកូនរបស់វា។ ពពួកសត្វព្រៃទាំងអស់ ស្ថិតក្រោមការគ្រប់គ្រង ការសិក្សាស្រាវជ្រាវ និង ការអភិរក្សដោយរដ្ឋបាលព្រៃឈើ ដោយមិនរាប់បញ្ចូលត្រី និងសត្វបង្កកំណើតក្នុងទឹក។ លក្ខណៈវិនិច្ឆ័យសម្រាប់ចាត់ថ្នាក់ពពួកសត្វព្រៃត្រូវឈរលើលក្ខខណ្ឌសង្គម សេដ្ឋកិច្ច បរិស្ថានជាក់ស្តែង ផ្អែកតាមព័ត៌មានវិទ្យាសាស្ត្រថ្នាក់ជាតិ ឬអន្តរជាតិ។

យោងតាមប្រកាសលេខ ០២០ ប្រ.ក កសក ចុះថ្ងៃទី២៥ ខែ មករា ឆ្នាំ២០០៧ របស់ក្រសួងកសិកម្ម មានការបែងចែកសត្វព្រៃមានច្រើនក្រុមមានដូចជា៖

១-ក្រុមប្រភេទជិតផុតពូជ គឺជាប្រភេទសត្វព្រៃទាំងឡាយនៅក្នុងធម្មជាតិ ដែលចំពោះមុខដង់ស៊ីតេនៃសារព័ន្ធ និងភូមិសាស្ត្រនៃទីជម្រករបស់វា ត្រូវបានថយចុះយ៉ាងឆាប់រហ័សក្នុងរយៈពេលដប់ (១០) ឆ្នាំចុងក្រោយ ឬ ក្នុងរយៈពេល បី(៣) ជំនាន់តំណពូជនៅក្នុងធម្មជាតិ និងជាប្រភេទដែលមានសារៈសំខាន់ខាងផ្នែកវិទ្យាសាស្ត្រ ព្រមទាំងមានតម្លៃសេដ្ឋកិច្ចខ្ពស់។

២-ក្រុមប្រភេទមានដោយកម្រ គឺជាប្រភេទសត្វព្រៃទាំងឡាយនៅក្នុងធម្មជាតិ ដែលចំពោះមុខដង់ស៊ីតេនៃ សារព័ន្ធរបស់វាមានកម្រិតទាប កម្រជួបប្រទះ ឬមានដោយកម្រ ដែលអាចជួបប្រទះតែនៅក្នុងទីជម្រកណាមួយជាក់លាក់ ឬ ជាស្ថានិកប្រភេទ និងអាចប្រឈមមុខចំពោះការគំរាមកំហែង ឈានទៅរកការផុតពូជនៅក្នុងធម្មជាតិ ។

៣-ក្រុមប្រភេទមានដោយបង្ហូរ គឺជាប្រភេទសត្វព្រៃទាំងឡាយនៅក្នុងធម្មជាតិ ដែលចំពោះមុខដង់ស៊ីតេនៃ សារព័ន្ធរបស់វា មានកម្រិតច្រើនបង្គួរ មានរបាយទូលំទូលាយ មានសក្តានុពលបន្តពូជឆាប់រហ័ស និងរងការគំរាមកំហែងតិចតួចក្នុងតម្រូវការសង្គមសេដ្ឋកិច្ច។ ប្រភេទសត្វព្រៃក្នុងក្រុមមានដោយបង្គួរ រួមមានគ្រប់ប្រភេទសត្វ ដែលមិនបានចាត់ថ្នាក់ក្នុងក្រុមប្រភេទជិតផុតពូជ និង ក្រុមមានដោយកម្រ។

បើតាមមន្រ្តីនាយកដ្ឋានសត្វព្រៃនៃក្រសួងកសិកម្ម រុក្ខាប្រមាញ់ និងនេសាទបង្ហាញពីតួលេខសត្វព្រៃដែលមាននៅប្រទេសកម្ពុជាក្នុងនោះមាន៖

– ថនិកសត្វប្រហែល ១៦២ប្រភេទ

– សត្វស្លាបប្រហែល ៦០១ប្រភេទ

– ឧរង្គសត្វប្រហែល១៧៥ ប្រភេទ

– ថលជលិកសត្វប្រហែល ៧៥ ប្រភេទ

អត្ថបទ៖ ប៊ុណ្ណារ៉ា