សមត្ថកិច្ច បង្ក្រាបបានឈ្មួញស្តុកសត្វព្រៃខុសច្បាប់មួយកន្លែង នៅកណ្ដាលក្រុងសៀមរាប

កម្លាំងរដ្ឋបាលព្រៃឈើសៀមរាប សហការជាមួយ ក្រុមអន្តរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ និងកងរាជអាវុធហត្ថលើផ្ទៃប្រទេស បានចុះបង្ក្រាបទីតាំងស្តុកសត្វព្រៃមួយកន្លែង នៅថ្ងៃទី២៥ ខែធ្នូ ឆ្នាំ២០២៤ នៅបរិវេណទីតាំងលក់ផ្កា ស្ថិតនៅភូមិស្ពានជ្រាវ សង្កាត់សៀមរាប ក្រុងសៀមរាប ដឹកនាំដោយលោកប៉ុក តារា ព្រះរាជអាជ្ញារងនៃអយ្យការអមសាលាដំបូងខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានបានឲ្យដឹងថា ដោយមានសេចក្តីរាយការណ៍ថា ឈ្មួញខាងលើបានលួចទទួលទិញសត្វព្រៃគ្រប់ប្រភេទ យកមកចែកចាយនៅក្នុងខេត្តសៀមរាប ទើបកម្លាំងជំនាញចុះមកបង្ក្រាប និងដករហូតសត្វព្រៃទាំងនោះយកទៅព្រលែងវិញ។

ជាមួយគ្នានេះ មន្ត្រីជំនាញរដ្ឋបាលព្រៃឈើខេត្តសៀមរាប បានឲ្យដឹងថា ប្រតិបត្តិការនេះ ដកហូតបានសត្វ ក្អែកទឹកតូចរស់ចំនួន៦០ក្បាល និងមាន់ទឹករស់១ក្បាល ហើយសត្វទាំងនេះ ត្រូវបានក្រុមអន្តរាគមន៍បង្ក្រាបបទល្មើសសត្វព្រៃចល័តយកទៅរក្សាទុកនៅសួនសត្វភ្នំតាម៉ៅ។ ចំពោះម្ចាស់ទីតាំងខាងលើត្រូវបានកម្លាំងសមត្ថកិច្ចកសាងសំណុំរឿង បញ្ជូនទៅតុលាការដើម្បីចាត់ការទៅតាមផ្លូវច្បាប់៕

ដោយ៖ជុន កុសល