មន្ត្រីក្រសួងអប់រំ៖ ការបើកដំណើរការគ្រឹះស្ថានសិក្សាឡើងវិញ ប្រព្រឹត្តិដោយរលូន

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ប្រាប់កម្ពុជាថ្មីនៅព្រឹកថ្ងៃទី១៦ ខែតុលានេះថា ការបើកដំណើរការគ្រឹះស្ថានសិក្សាឡើងវិញនៅតាមបណ្តារាជធានៅខេត្តនានាបានប្រព្រឹត្តិទៅដោយភាពរលូនតាមការគ្រោងទុក។

លោកបានបន្តថា៖ “ជាទូទៅ ការបើកដំណើរការគ្រឹះស្ថានសិក្សាសម្រាប់ការរៀន និងបង្រៀនតាមបណ្តុំនៅរាជធានី-ខេត្តដែលមានហានិភ័យទាប បាន និងកំពុងប្រព្រឹត្តទៅដោយមានលទ្ធផលអាចទទួលយកបានតាមការគ្រោងទុក ទន្ទឹមនឹងការអនុវត្តយ៉ាងខ្ជាប់ខ្ជួននូវគោលការណ៍ប្រតិបត្តិស្តង់ដារ និងវិធានការសុខាភិបាលដូចមានចែងក្នុងលិខិតលេខ៤៦ និង៥០”។

រហូតមកដល់ពេលនេះមានរាជធានីខេត្តចំនួន ២៥ ដែលបានបើកដំណើរសាកល្បងសាលារៀនឡើងវិញបន្ទាប់ពីក្រសួងបានអនុញ្ញាតឱ្យរាជធានីខេត្តបើកដំណើរការឡើងវិញនៅតំបន់មានហានិភ័យទាបរួចមក។

តាមអនុសាសន៍ដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ក្រសួងអប់រំ យុវជន និងកីឡាបានស្នើអភិបាល នៃគណៈអភិបាលរាជធានី-ខេត្ត ប្រធានមន្ទីរអប់រំ យុវជន និងកីឡា គណៈគ្រប់គ្រងសាលារៀនសហការអនុវត្តអភិក្រមចំនួន ៦ក្នុងនោះរួមមាន៖

១. នៅតាមទីជនបទដែលគ្មានហានិភ័យ ឬដែលមានហានិភ័យទាប គ្រឹះស្ថានសិក្សា គ្រប់កម្រិតអាចបើកដំណើរការបានដោយអនុវត្តការរៀនតាមបណ្តុំមិនលើសពី ១៥ នាក់ និងគោរពស្តង់ដាប្រតិបត្តិរបស់ក្រសួងអប់រំ យុវជន និងកីឡា និងគោលការណ៍របស់ក្រសួងសុខាភិបាល។

២. នៅតាមតំបន់ដែលមានហានិភ័យមធ្យម ត្រូវផ្ដល់អាទិភាពដល់សិស្សថ្នាក់ទី៩ និងទី១២។

៣. នៅតាមតំបន់មានហានិភ័យខ្ពស់ គួរបន្តបង្រៀនអនឡាញពីចម្ងាយ។

៤. បង្កើតគណៈកម្មការគ្រប់គ្រងសាលារៀនដោយមានការចូលរួមពីគណៈគ្រប់គ្រងសាលា តំណាងមាតាបិតា និងអាជ្ញាធរមូលដ្ឋាន ដើម្បីគាំទ្រសាលារៀន និងសម្រេចផ្អាកផ្នែកណា មួយនៃការរៀនតាមបណ្ដុំជាបណ្ដោះអាសន្ន ប្រសិនបើមានករណីសង្ស័យ។

៥. បន្តត្រួតពិនិត្យតាមដានអ្នកជំងឺថ្មី និងប្រភពនៃការឆ្លង ដើម្បីជៀសវាងការឆ្លងចូលក្នុង សាលារៀន។

៦. អាជ្ញាធររាជធានី ខេត្តបន្តការប្រុងប្រយ័ត្ន ដោយត្រូវវាយតម្លៃជាប្រចាំនូវស្ថានភាពជំងឺកូវីដ-១៩ រួមទាំងការធ្វើតេស្តរហ័សនៅពេលដែលមានករណីសង្ស័យដើម្បីដាក់ចេញ នូវវិធានការទប់ស្កាត់ទាន់ពេលវេលា៕

អត្ថបទ៖ សំអឿន