ព័ត៌មានជាតិ

ដល់រដូវបង្កងតាកែវហើយ កុំភ្លេចមកសាក មានតែប៉ុន្មានខែនេះទេ

បានផុស

៥ years មុន

នៅ

ថ្ងៃពុធ ៨ ធ្នូ ២០២១

ដោយ

បង្កងធម្មជាតិខេត្តតាកែវចាប់ផ្ដើមសំបូរហើយ ជាឱកាសដែលភ្ញៀវទេសចរមកពីគ្រប់ទិសទីអាចមកកម្សាន្ត និងសាករសជាតិបង្កងធម្មជាតិស្រស់ៗនៅ ខេត្តចំណាស់មួយនេះ។

លោក លី សាវេត អភិបាលរងខេត្តតាកែវបានប្រាប់កម្ពុជាថ្មីនៅ ព្រឹកនេះថា បង្កងធម្មជាតិខេត្តតាកែវមានតែប៉ុន្មានខែប៉ុណ្ណោះចាប់ពីខែ វិច្ឆិកាដល់ខែមករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលី សាវេត បានបញ្ជាក់ថា បង្កងគឺជាផលិតផលនិងជាអត្តសញ្ញាណរបស់ខេត្តតាកែវ។ ខេត្តមួយនេះតែងតែទទួលបានភ្ញៀវទេសចរជាតិ និងអន្តរជាតិដែលចង់មកសាករសជាតិបង្កងទឹកសាបដ៏ឆ្ងាញ់ពិសានេះ។

បើតាមលោកអភិបាលរងខេត្ត បង្កងធម្មជាតិខេត្តតាកែវមិនមែនសុទ្ធអាចរកបានរាល់ថ្ងៃឡើយ មានតែតាមរដូវតែប៉ុណ្ណោះ។ បង្កងធម្មជាតិខេត្តតាកែវ មានកេរ្តិ៍ឈ្មោះនិងរសជាតិឆ្ងាញ់ ហើយតម្លៃក៏ថ្លៃគួរសម។

អាជីវករលក់បង្កងមួយរូបដែលមានឈ្មោះស្រីតា នៅខេត្តតាកែវបានបញ្ជាក់ឲ្យកម្ពុជាថ្មីដឹងថា បង្កងធម្មជាតិខេត្តតាកែវរដូវនេះមិនសូវសំបូរទេដោយសារទឹកតូចជាងបណ្តាឆ្នាំមុនៗ។ ភាគច្រើនប្រភពបង្កងយកមកពីស្រុកអង្គរបុរី និងបុរីជលសារ។ បើតាមអាជីវកររូបនេះ បើទោះបីបង្កងធម្មជាតិឆ្នាំនេះមិនសូវសំបូរ ប៉ុន្តែតម្លៃក៏មិនមានឡើងថ្លៃនោះដែរ។

កន្លែងលក់បង្កងយីហោល្បីប្រចាំខេត្តតាកែវនេះក៏បានបញ្ជាក់តម្លៃបង្កងធម្មជាតិខេត្តតាកែវ ដោយលេខ ១ មួយគីឡូ ៤៥ ដុល្លារ និងលេខ ២ តម្លៃ ៣៥ ដុល្លារ។ តម្លៃនេះបានចុះបន្តិចកាលប៉ុន្មានថ្ងៃមុន លេខ ១ មួយគីឡូ ៤៨ ដុល្លារ។

លោក លី សាវ៉េត អភិបាលរងខេត្តតាកែវបានបញ្ជាក់ថា ភាពល្បីល្បាញនៃបង្កងខេត្តតាកែវ ក៏ជាផ្នែកមួយដែលបានទាក់ទាញទេសចរឆ្ងាយជិតចង់មកលេងខេត្តតាកែវ៕

អត្ថបទ៖ ប៊ុណ្ណារ៉ា