ភ្លើងឆេះព្រៃខ្លាំងក្លានៅអាមេរិក ជម្លៀសមនុស្សរាប់ម៉ឺននាក់

មនុស្សរាប់ម៉ឺននាក់ត្រូវបានជម្លៀស ហើយផ្ទះរាប់រយខ្នងត្រូវបានបំផ្លាញ នៅពេលភ្លើងឆេះព្រៃរាលដាលពាសពេញរដ្ឋ Colorado សហរដ្ឋអាមេរិក។

ភ្លើងដែលឆេះរាលដាលយ៉ាងលឿន កំពុងដុតបំផ្លាញតំបន់ Boulder ភាគខាងជើងទីក្រុង Denver ហើយក្រុមមន្ត្រីបាននិយាយថា ការស្លាប់និងរបួសទំនងជាមាន ដោយសារភ្លើងឆេះរាលដាលកាន់តែខ្លាំង។

មនុស្សប្រហែល៣០,០០០នាក់នៅក្នុងទីក្រុង Louisville និង Superior ត្រូវបានប្រាប់ឲ្យចាកចេញពីផ្ទះរបស់ពួកគេកាលពីថ្ងៃព្រហស្បតិ៍។

ទន្ទឹមនឹងនេះដែរ ច្បាប់ដាក់រដ្ឋក្នុងគ្រាអាសន្ន ត្រូវបានប្រកាសដោយអភិបាល Jared Polis។

ខ្យល់បក់ក្នុងល្បឿនរហូតដល់ ១៦៩គីឡូម៉ែត្រក្នុងមួយម៉ោង បានជំរុញឲ្យភ្លើងឆេះ កាន់តែរីកធំឡើងៗនៅទូទាំងតំបន់ បន្ទាប់ពីមានគ្រោះរាំងស្ងួតជាប្រវត្តិសាស្រ្ត។

ភ្លើងឆេះព្រៃនៅរដ្ឋ Colorado ពីមុន បានកើតឡើងនៅតំបន់ជនបទ ប៉ុន្តែការឆេះចុងក្រោយនេះ កំពុងកើតឡើងនៅតំបន់ជាយក្រុងជាច្រើននៃរដ្ឋ។

គួរបញ្ជាក់ថា រដ្ឋ Colorado បាននិងកំពុងជួបប្រទះគ្រោះរាំងស្ងួតខ្លាំងក្លា ក្នុងរយៈពេលប៉ុន្មានឆ្នាំថ្មីៗនេះ។ បម្រែបម្រួលអាកាសធាតុបានបង្កើនហានិភ័យនៃភាពក្តៅស្ងួត ដែលទំនងជាបង្កជាភ្លើងឆេះព្រៃ៕

ប្រែសម្រួល៖ Vann Vann

ប្រភព៖ BBC

ចុចអាន៖ អូស្ត្រាលី ព្រមានពីភ្លើងឆេះព្រៃដ៏គ្រោះថ្នាក់ អាចរាលដាលរហូតដល់សម្លាប់មនុស្ស