បញ្ជូនជនសង្ស័យពីរនាក់ កាប់ទន្ទ្រានដីព្រៃសហគមន៍ ព្រៃឡង់ ស្ទឹងត្រែង ទៅតុលាការ

នៅរសៀលថ្ងៃទី៣១ ខែមីនានេះ ជនសង្ស័យចំនួន ២ នាក់ ត្រូវបានកម្លាំងសហគមន៍ និងប្រជាការពារចាប់ឃាត់ខ្លួន បញ្ជូនឱ្យជំនាញកសាងសំណុំរឿងបញ្ជូនទៅកាន់តុលាការ។

លោក នួន ពិសី នាយករងដែនជំរកសត្វព្រៃ ព្រៃឡង់ ស្ទឹងត្រែង បានបញ្ជាក់ថា ក្រោយពីទទួលបានជនសង្ស័យនេះ មន្ត្រីជំនាញបានរៀបចំកសាងសំណុំរឿង ពាក់ព័ន្ធនឹងករណីកាប់ព្រៃរានយកដី ដោយអនុវត្តតាមច្បាប់ស្តីពីព្រៃឈើ និងច្បាប់ស្តីពីការការពារធនធានធម្មជាតិ បញ្ជូនជនសង្ស័យទាំង ២ នាក់ទៅតុលាការ ខេត្តស្ទឹងត្រែង ដើម្បីចាត់ការបន្តតាមនីតិវិធី។

លោក ចឹក ម៉ុន ប្រជាការពារភូមិ នៅភូមិក្របីជ្រុំ បានបញ្ចាក់ថា នេះជាសកម្មភាពចុះបង្ក្រាបបទល្មើសធនធានធម្មជាតិ និងការកាប់ទន្ទ្រានដីព្រៃសហគមន៍របស់ប្រជាពលរដ្ឋនៅ ចំណុចត្រពាំងត្បែង និងត្រពាំងឈ្លីក ដែលស្ថិតនៅក្នុងឃុំក្បាលរមាស ស្រុកសេសាន ខេត្តស្ទឹងត្រែង។

លោក ចឹក ម៉ុន បានឱ្យដឹងថា ការបង្ក្រាបនេះ កម្លាំងប្រជាសហគមន៍ និងកម្លាំងប្រជាការពារភូមិចំនួន ២៥ នាក់បានចុះបង្រ្កាបឃាត់ខ្លួនជនសង្ស័យបាន ២ នាក់ និងដកហូតបានវត្ថុតាងបានមានដូចជា ម៉ាស៊ីនកាត់ឈើធុនតូចចំនួន ០៧ គ្រឿង និងម៉ូតូចំនួន ៦ គ្រឿង ប្រគល់ជូនទៅសមត្ថកិច្ចជំនាញបន្តអនុវត្តតាមនិតិវិធី។

ប្រជាការពារភូមិ រូបនេះបន្តថា ជនសង្ស័យទាំង ២ នេះ ទី១ ឈ្មោះ យួស សុសកាំរី ភេទប្រុស អាយុ ៣៥ ឆ្នាំ ទី២ ឈ្មោះ ពូក សាលី ភេទប្រុស អាយុ ២០ ឆ្នាំ។ អ្នកទាំងពីជាជនជាតិខ្មែអ៊ិស្លាម ទីលំនៅមិនពិតប្រាកដ។

គួរបញ្ជាក់ថា ជនសង្ស័យទាំងពីរនាក់ត្រូវបានកម្លាំងសហគមន៍ រួមជាមួយប្រជាការពារភូមិឃាត់ខ្លួន កាលពីថ្ងៃទី២៩ ខែមីនា ឆ្នាំ២០២២ ក្នុងភូមិសាស្ត្រភូមិក្របីជ្រុំ ឃុំក្បាលរមាស ស្រុកសេសាន ខេត្តស្ទឹងត្រែង៕

អត្ថបទ៖ ងិន លីម