ដួង សុខគា​៖ ​ខ្មែរត្រូវតែ​ថែភាសា​អក្សរជាតិ​ឱ្យបានគង់វង្ស​

​តារាប្រុស​ពហុជំនាញគឺលោក ដួង សុខគា​ បានចេញសារហាក់​មានចេតនា​ដាស់អារម្មណ៍​កូនខ្មែរ​ក៏ដូចជាអ្នកប្រើប្រាស់បណ្តាញសង្គមហ្វេសប៊ុកទាំងអស់ត្រូវចូលរួមថែរក្សាភាសាជាតិអក្សរជាតិ​ដោយគោរព និងឱ្យបានគង់វង្សក្នុងតម្លៃខ្ពស់។​

ពុំមែន​ទើបជាលើកទី១ទេដែលតារាប្រុស​លោក ដួង សុខគា ​តែងតែចេញមុខបំផុសស្មារតី​ដល់យុវជនដែលជាកូនខ្មែរ​គ្រប់រូបត្រូវនាំគ្នា​ចូលរួមថែរក្សាតម្លៃវប្បធម៌​ អរិយធម៌​ និងភាសា​ អក្សរជាតិដែលជាកេរ្តិ៍តំណែលមរតកដូនតាខ្មែរ។

​ជាក់ស្តែងពេលនេះលោកក៏បានពន្លយថា​ “ចាស់ៗពីដើមបើជួប​អ្នកណានិយាយខ្មែរ​អត់ច្បាស់គាត់ថា​ អត់ចេះខ្មែរទេបានជានិយាយប៉ៃឡាំៗ? បើជាខ្មែរត្រូវតែនិយាយខ្មែរឱ្យច្បាស់!”។

តារាពហុជំនាញរូបនេះបានបន្តថា “បងប្អូនណាមានខ្លួនល្មមហើយ!រហូតអ្នកច្រៀងខ្លះ​ប្រឹង​ធ្វើអារបៀបលែងច្បាស់កាច់ប្របេរ (បបូរ) ចង់ឱ្យគេថាយើងជាជនបរទេសមែនទេ?។ បើអ៊ីចឹងមែនមានតែចង់ថាខ្មែរមិនកើត? មើលងាយជនជាតិឯងប្រយ័ត្នដូនតាខឹងណាជួយថែគ្នា​ទៅកុំនាំគ្នាបំផ្លាញច្រើនពេក!”។

លោក ដួង សុខគា បានសង្កត់ធ្ងន់ទៀតថា កាតព្វកិច្ចមួយក្នុងចំណោមច្រើនយើងជាខ្មែរត្រូវតែថែភាសាជាតិ អក្សរជាតិដោយគោរព និងឱ្យបានគង់វង្សក្នុងតម្លៃខ្ពស់៕

អត្ថបទ៖ ចាន់រ៉ា