ព័ត៌មានអន្ដរជាតិ

លោក Zelensky ប្រាប់ឲ្យកងទ័ពរុស្ស៊ី វិលត្រលប់ទៅផ្ទះវិញ បើចង់រស់

បានផុស

៤ years មុន

នៅ

ថ្ងៃអង្គារ ៣០ សីហា ២០២២

ដោយ

ប្រធានាធិបតីអ៊ុយក្រែនលោក Volodymyr Zelensky បានជំរុញឲ្យទាហានរុស្ស៊ី រត់ចេញពីការវាយលុករបស់កងកម្លាំងអ៊ុយក្រែន នៅជិតទីក្រុង Kherson ភាគខាងត្បូង ដោយនិយាយថា យោធាទីក្រុងកៀវ កំពុងដណ្តើមយកទឹកដីរបស់ពួកគេមកវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសុន្ទរកថាពេលយប់កាលពីថ្ងៃចន្ទទី២៩ខែសីហា លោក Zelensky បានប្តេជ្ញាថា កងទ័ពអ៊ុយក្រែននឹងបណ្តេញកងទ័ពរុស្ស៊ីទៅព្រំដែន។

លោកនិយាយថា “ប្រសិនបើពួកគេចង់រស់ វាដល់ពេលហើយ ដែលយោធារុស្ស៊ីត្រូវរត់ចេញ។ សូមត្រលប់ទៅផ្ទះវិញ។ អ៊ុយក្រែនកំពុងដណ្តើមយកទឹកដីរបស់ខ្លួនមកវិញ”។

ស្របពេលជាមួយគ្នានោះ លោក Oleksiy Arestovych ទីប្រឹក្សាជាន់ខ្ពស់របស់លោក Zelensky បាននិយាយថា កងការពាររបស់រុស្សីត្រូវបានបំបែក ក្នុងរយៈពេលពីរបីម៉ោង។

លោកបន្ថែមថា កងកម្លាំងអ៊ុយក្រែន បានបាញ់ផ្លោងលើសាឡាង ដែលរុស្ស៊ីកំពុងប្រើដើម្បីផ្គត់ផ្គង់សព្វាវុធនៅច្រាំងខាងលិចនៃទន្លេ Dnipro ក្នុងតំបន់ Kherson។

គួរបញ្ជាក់ជាថ្មី រុស្ស៊ីបានចូលលុកលុយអ៊ុយក្រែនកាលពីថ្ងៃទី២៤ខែកុម្ភៈ នៅក្នុងអ្វីដែលខ្លួននិយាយថា ជា “ប្រតិបត្តិការយោធាពិសេស” ដើម្បីកម្ចាត់អ្នកជាតិនិយមអ៊ុយក្រែន និងការពារសហគមន៍និយាយភាសារុស្ស៊ី។

ទោះបីជាយ៉ាងណាក៏ដោយ អ៊ុយក្រែន និងសម្ព័ន្ធមិត្ត បានហៅប្រតិបត្តិការនេះថាជាសង្រ្គាមឈ្លានពានដែលមិនសមហេតុផលទាល់តែសោះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ អាមេរិក ថា រុស្ស៊ី កំពុងពិបាកជ្រើសរើសទាហាន ទៅប្រយុទ្ធនៅ អ៊ុយក្រែន