អាមេរិក ថា រុស្ស៊ី កំពុងពិបាកជ្រើសរើសទាហាន ទៅប្រយុទ្ធនៅ អ៊ុយក្រែន (មានវីដេអូ)

មន្ត្រីជាន់ខ្ពស់ នៅក្រសួងការពារជាតិអាមេរិក បាននិយាយកាលពីថ្ងៃចន្ទទី២៩ខែសីហាថា រុស្ស៊ីកំពុងពិបាក ក្នុងការកែនទាហានបន្ថែមទៀតដើម្បីប្រយុទ្ធនៅអ៊ុយក្រែន ហើយរុស្ស៊ី បានប្រមូល សូម្បីតែអ្នកជាប់គុកមកធ្វើជាទាហាន ហើយជ្រើសរើសមនុស្សមានវ័យចំណាស់ អ្នកមានកាយសម្បទាមិនល្អ និងខ្វះការបណ្តុះបណ្តាលឲ្យបម្រើការក្នុងជួរកងទ័ព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរូបនេះ បានសំដៅទៅលើក្រឹត្យរបស់ប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីថ្ងៃព្រហស្បតិ៍សប្តាហ៍មុន ដែលបញ្ជាឲ្យបង្កើនចំនួនកងទ័ពរបស់ប្រទេសនេះប្រហែល១០ភាគរយ ដល់១.១៥លាននាក់ ចាប់ពីខែមករាឆ្នាំក្រោយទៅ។

យោងតាមមន្ត្រីរូបនេះ, បន្ទាប់ពីជួបប្រទះនឹងបរាជ័យធំៗ និងការបាត់បង់កងទ័ពយ៉ាងធ្ងន់ធ្ងរក្នុងរយៈពេលប្រាំមួយខែនៃការលុកលុយប្រទេសអ៊ុយក្រែន មន្ទីរបញ្ចកោណជឿជាក់ថា “កិច្ចខិតខំប្រឹងប្រែងនេះ ទំនងជាមិនជោគជ័យទេ ដោយសារតែរុស្ស៊ី មិនបានបំពេញតាមគោលដៅបុគ្គលិក និងកម្លាំងជាប្រវត្តិសាស្ត្រ”។

មន្ត្រីរូបនេះបានប្រាប់អ្នកកាសែតថា “រុស្ស៊ីបានចាប់ផ្តើម ព្យាយាមពង្រីកកិច្ចខិតខំប្រឹងប្រែងជ្រើសរើសទាហានរួចទៅហើយ។ ​ពួកគេ​បាន​ធ្វើ​កិច្ចការ​នេះ ​មួយ​ផ្នែក​ដោយ​ការ​លុប​ចោល​ដែនកំណត់​អាយុ​ខ្ពស់​សម្រាប់កងទ័ព​ថ្មី​ ហើយ​ ក៏​ដោយ ​ការ​ជ្រើសរើស​អ្នក​ទោស​ផង​ដែរ​”។

ការសន្និដ្ឋានរបស់មន្ទីរបញ្ចកោណគឺថា ការជ្រើសរើសទាហានបន្ថែម អាចនឹងមិនបង្កើនអំណាចប្រយុទ្ធទាំងមូលប្រកបដោយប្រសិទ្ធភាពនៅត្រឹមចុងឆ្នាំនេះឡើយ។

នៅដើមខែសីហា អនុរដ្ឋមន្ត្រីការពារជាតិអាមេរិក លោក Colin Kahl បានប៉ាន់ប្រមាណថា ទាហានរុស្ស៊ី ពី ៧ ទៅ ៨ ម៉ឺននាក់ ត្រូវបានសម្លាប់ ឬរងរបួសនៅក្នុងប្រទេសអ៊ុយក្រែន ចាប់តាំងពីការលុកលុយនៅថ្ងៃទី ២៤ ខែកុម្ភៈ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក ផ្លាស់ប្តូរវិធីសាស្រ្តប្រើផ្លូវទឹកវិញ ដើម្បីបញ្ជូនអាវុធទៅ អ៊ុយក្រែន