មកដឹងចំនួនប្រទេសនៅទូទាំងពិភពលោកដែលជំពាក់បំណុល ចិន

ដោយដកស្រង់ទិន្នន័យដែលប្រមូលបានពីធនាគារពិភពលោក, ទស្សនាវដ្ដី Forbes បាននិយាយថា ប្រទេសចំនួន ៩៧ នៅទូទាំងពិភពលោកកំពុងស្ថិតនៅក្រោមបំណុលរបស់ចិន ខណៈប្រទេសដែលជំពាក់ចិនភាគច្រើនមានទីតាំងនៅទ្វីបអាហ្វ្រិក ប៉ុន្តែក៏មាននៅអាស៊ីកណ្តាល អាស៊ីអាគ្នេយ៍ និងប៉ាស៊ីហ្វិកផងដែរ ។

ចំណែកប្រទេសជាប់បំណុលកំពូលទាំង ៥ របស់ប្រទេសចិនគឺ ប៉ាគីស្ថានមានចំនួន ៧៧.៣ ពាន់លានដុល្លារ, អង់ហ្គោឡា ៣៦.៣ ពាន់លានដុល្លារ, អេត្យូពី ៧.៩ ពាន់លានដុល្លារ, កេនយ៉ា ៧.៤ ពាន់លានដុល្លារ និងស្រីលង្កា ៦.៨ ពាន់លានដុល្លារ ។

ទន្ទឹមនោះ ប្រទេសដែលមានចំណូលទាបក្នុងពិភពលោកជំពាក់ ៣៧ ភាគរយនៃបំណុលរបស់ពួកគេលើប្រទេសចិនក្នុងឆ្នាំ ២០២២ នេះ បើប្រៀបធៀបទៅនឹងបំណុលទ្វេភាគីត្រឹមតែ ២៤ ភាគរយប៉ុណ្ណោះចំពោះប្រទេសដទៃទៀតនៅលើពិភពលោក ។

ប្រទេសចិនបានផ្តល់ហិរញ្ញប្បទានយ៉ាងច្រើនសន្ធឹកសន្ធាប់ដល់ប្រទេសកំពុងអភិវឌ្ឍន៍ក្នុងរយៈពេល ២ ទស្សវត្សកន្លងមកនេះ ដោយបានគាំទ្រដល់គម្រោងទាំងសាធារណៈ និងឯកជន ជាពិសេសគឺគំនិតផ្តួចផ្តើមខ្សែក្រវាត់ និងផ្លូវ ។

គំនិតផ្តួចផ្តើមនេះគឺជាគោលនយោបាយការបរទេសដ៏លេចធ្លោរបស់ប្រធានាធិបតី Xi Jinping ដែលបានបើកដំណើរការក្នុងឆ្នាំ ២០១៣ ដើម្បីបណ្តាក់ទុននៅក្នុងប្រទេស និងអង្គការអន្តរជាតិជិត ៧០ ដោយបានជំរុញប្រទេសចិនឲ្យមានភាពលេចធ្លោជាសកលនៅក្នុងហិរញ្ញវត្ថុអភិវឌ្ឍន៍អន្តរជាតិ ៕

ប្រែសម្រួលដោយ ៖ ជីវ័ន្ត

ប្រភព ៖ The Nations

ចុចអាន ៖ ប្រទេសអាស៊ីខាងត្បូងចំនួន ៣ កំពុងជំពាក់បំណុល ចិន វ័ណ្ឌ ក