មានអារម្មណ៍បែបណា ពេលឃើញអក្ខរា និស្សិតស្រីជ័យលាភីពិការភ្នែក សួររករូបថតខ្លួន បែបនេះ?

និស្សិតស្រីពិការភ្នែកជ័យលាភីមួយរូប នៅរសៀលថ្ងៃទី៩ ខែតុលានេះ បានស្វែងសួររករូបថតរបស់ខ្លួន បន្ទាប់ពីនាងទទួលទទួលសញ្ញាបត្រ បរិញ្ញាបត្រ កាលពីចុងខែកញ្ញា ឆ្នាំ២០២២ កន្លងទៅ។

អ្នកនាង ទ្រី រតនី បានផ្ញើសារ​ Telegram ទំនងជាសួរមិត្តរួមថ្នាក់ថា៖ “មានរូបថតខ្ញុំ ឬអត់បង? បើមានសូមជួយផ្ញើមក account ផ្ទាល់ខ្លួនរបស់ខ្ញុំផង។ ដោយសារតែខ្ញុំពីការភ្នែក មើលមិនឃើញរូបថតដែលបងផ្ញើចូលក្នុងគ្រុបនោះទេ។ មិនដឹងថា មានរូបខ្លួនឯង ឬអត់?”។

អ្នកទទួលសំណួរ បានឆ្លើយតបវិញ ព្រមទាំងផ្ញើរូបថតចំនួន ២ ប៉ុស្ដិ៍ ជូននាងភ្លាមៗវិញដែរ។

អ្នកប្រើប្រាស់បណ្ដាញសង្គមម្នាក់ឈ្មោះ Kay Taingim បានបញ្ជាក់ថា៖ “គាត់តស៊ូណាស់ ប្ដីគាត់ក៏ពិការភ្នែកដូចគ្នាដែរ ហើយគាត់ទាំងពីរនាក់ប្ដីប្រពន្ធសុទ្ធតែ​បានរៀនសូត្រមានចំណេះដឹងរៀងៗខ្លួន​ ពិសេសគាត់មានកូនស្រីម្នាក់ស្រស់ស្អាត (បុណ្យវាសនាល្អភ្នែកមិនពិការទេ)”។​

គួររំលឹកថា កាលពីថ្ងៃទី២៨ ខែកញ្ញា ឆ្នាំ២០២២ កន្លងទៅ សាកលវិទ្យាល័យគ្រប់គ្រង និងសេដ្ឋកិច្ច UME ខេត្តកំពង់ចាម បានរៀបចំពិធីប្រគល់សញ្ញាបត្រ​ ដល់និស្សិតជ័យលាភី បរិញ្ញាបត្រជាន់ខ្ពស់ បរិញ្ញាបត្រ បរិញ្ញា​បត្ររង ១៥០៥ អង្គ/នាក់ ក្រោមអធិបតីភាព ឯកឧត្តម​បណ្ឌិត​ ហ៊ុន​ ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជការកងទ័ពជើងគោក៕