និស្សិតច្បាប់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ទទួលតំណែងជើងឯកលេខ១ ក្នុងការប្រកួតតុលាការប្រឌិតកម្ពុជា ឆ្នាំ២០២៦

ក្រុមនិស្សិតច្បាប់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បានបង្ហាញសមត្ថភាពដ៏ប៉ិនប្រសប់ក្នុងការបកស្រាយ និងវិភាគផ្លូវច្បាប់ រហូតដណ្តើមបានជ័យលាភីលេខ១ ក្នុងការប្រកួតតុលាការប្រឌិតកម្ពុជា ឆ្នាំ២០២៦ (Cambodian Moot Court Competition 2026) បន្ទាប់ពីឆ្លងកាត់ការប្រកួតប្រជែងយ៉ាងស្វិតស្វាញជាមួយក្រុមនិស្សិតចំនួន ១៥ក្រុម មកពីសាកលវិទ្យាល័យចំនួន ៩ ។

ការប្រកួតដ៏សំខាន់ក្នុងវិស័យច្បាប់នេះ ត្រូវបានរៀបចំឡើងចាប់ពីថ្ងៃទី២៧ ដល់ថ្ងៃទី២៩ ខែមីនា ឆ្នាំ២០២៦ ដោយអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) សហការជាមួយសាកលវិទ្យាល័យបញ្ញាសាស្ត្រកម្ពុជា។ កម្មវិធីនេះមានគោលបំណងពង្រឹងសមត្ថភាពស្រាវជ្រាវ ការវិភាគគតិយុត្ត និងការអនុវត្តជំនាញវិជ្ជាជីវៈច្បាប់ ក្នុងសវនាការជាក់ស្តែងសម្រាប់និស្សិតច្បាប់នៅកម្ពុជា។

ជាលទ្ធផល ក្រុមនិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច សម្រេចបានសមិទ្ធផលយ៉ាងត្រចះត្រចង់ រួមមាន៖
– ពានរង្វាន់ជ័យលាភីលេខ១៖ ទទួលបានដោយក្រុមនិស្សិតដែលមានឈ្មោះ លោក អ៊ឹង ប៊ុនគៀត លោក ឡាយ គឹមលីន លោក ង៉ែត សុខវិសាល និងកញ្ញា ភាន លក្ខណា
– មេដាយសារណាលាយលក្ខណ៍អក្សរល្អបំផុតលេខ១៖ ទទួលបានដោយក្រុមនិស្សិតដែលមានឈ្មោះ លោក អ៊ឹង ប៊ុនគៀត លោក ឡាយ គឹមលីន លោក ង៉ែត សុខវិសាល និងកញ្ញា ភាន លក្ខណា
– មេដាយសារណាលាយលក្ខណ៍អក្សរល្អលេខ២៖ ទទួលបានដោយក្រុមនិស្សិតដែលមានឈ្មោះ កញ្ញា ចិន្តា បុប្ផាពេជ្រ កញ្ញា ខាំ សុផានិត កញ្ញា បុត្រ រតនាលីហ្សា និងកញ្ញា ឡាយ សុភា
– មេដាយឯកត្តជនសម្រាប់អ្នកថ្លែងតំណាងព្រះរាជអាជ្ញាល្អលេខ២៖ ទទួលបានដោយលោក ឡាយ គឹមលីន

ជោគជ័យដ៏អស្ចារ្យនេះ គឺជាមោទកភាពយ៉ាងខ្លាំងសម្រាប់សាកលវិទ្យាល័យ ដែលបង្ហាញពីកម្រិតនៃការប្តេជ្ញាចិត្តខ្ពស់ ការខិតខំប្រឹងប្រែងឥតឈប់ឈរ និងឧត្តមភាពក្នុងការអប់រំ និងបណ្តុះបណ្តាលផ្នែកច្បាប់របស់សាកលវិទ្យាល័យ។ ក្រុមនិស្សិតខាងលើទទួលបានការបង្វឹកពីគ្រូបង្វឹករួមមាន លោកមេធាវី ឡុង បញ្ញារិទ្ធិ និងលោកស្រីមេធាវី ហៀង ណៃហៀក ៕