ចិន បញ្ជូននាវាចម្បាំងទៅក្បែរ តៃវ៉ាន់ ក្រោយលោកស្រី Tsai ជួបប្រធានសភាអាមេរិក

នៅថ្ងៃព្រហស្បតិ៍ទី០៦ខែមេសា ប្រទេសចិន បានបញ្ជូននាវាចម្បាំងទៅដែនទឹកជុំវិញកោះតៃវ៉ាន់ ខណៈទីក្រុងប៉េកាំងប្តេជ្ញាថា នឹងឆ្លើយតបយ៉ាងម៉ឺងម៉ាត់ ចំពោះជំនួបរវាងប្រធានាធិបតីនៃកោះដែលគ្រប់គ្រងដោយខ្លួនឯងមួយនេះ ជាមួយប្រធានសភាអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងនេះកើតឡើងចំពេលមានភាពតានតឹងកាន់តែខ្លាំងរវាងចិននិងតៃវ៉ាន់ ខណៈប្រធានសភាអាមេរិកលោក Kevin McCarthy បានទទួលមេដឹកនាំតៃវ៉ាន់លោកស្រី Tsai Ing-wen នៅរដ្ឋកាលីហ្វ័រញ៉ាកាលពីថ្ងៃពុធ ដោយលោកបានក្លាយជាឥស្សរជនជាន់ខ្ពស់បំផុតរបស់អាមេរិក ដែលជួបមន្ត្រីតៃវ៉ាន់នៅលើទឹកដីអាមេរិកក្នុងរយៈពេលប៉ុន្មានទសវត្សរ៍ចុងក្រោយ។

ទោះបីជាយ៉ាងណាក៏ដោយ ប្រទេសចិនបានព្រមានម្តងហើយម្តងទៀតថា ជំនួបបែបនេះមិនគួរកើតឡើងទេ។

ក្រសួងការពារជាតិតៃវ៉ាន់ បាននិយាយនៅព្រឹកថ្ងៃព្រហស្បតិ៍ថា នាវាចម្បាំងបីគ្រឿងបន្ថែម ត្រូវបានគេឃើញនៅក្នុងដែនទឹក ដែលពុះចែកកោះគ្រប់គ្រងដោយខ្លួនឯងមួយនេះ ពីចិនដីគោក។ ឧទ្ធម្ភាគចក្រប្រឆាំងនាវាមុជទឹក ក៏បានឆ្លងកាត់តំបន់កំណត់អត្តសញ្ញាណការពារដែនអាកាសរបស់កោះនេះផងដែរ។

គួរបញ្ជាក់ថា ថ្វីបើតៃវ៉ាន់ ត្រូវបានគ្រប់គ្រងដោយឡែកពីចិនអស់រយៈពេលជាង៧០ឆ្នាំមកហើយក៏ដោយ ប៉ុន្តែទីក្រុងប៉េកាំង បានចាត់ទុកកោះនេះជាផ្នែកមួយនៃទឹកដីរបស់ខ្លួន ហើយប្តេជ្ញាថានឹងដណ្តើមយកដោយប្រើកម្លាំងនៅថ្ងៃណាមួយប្រសិនបើចាំបាច់៕

ប្រែសម្រួល៖ Vann Vann

ប្រភព៖ TRT

ចុចអាន៖ ចិន ប្តេជ្ញាឆ្លើយតបម៉ឺងម៉ាត់ ចំពោះជំនួបកម្រិតខ្ពស់ រវាងអាមេរិក ជាមួយមេដឹកនាំតៃវ៉ាន់